Read Runyoro - rutooro Bac 7 Bible Online

Bac 7 - Runyoro - rutooro bible

Bac 7

¹Gidyoni, n'abantu boona abaakaba ainabo, baimuka kara, baateera orukande haihi n'iziba erya Harodi; kandi orukande orw'Abanyamidyani rukaba rubali ha bukiizi obw'emoso omukihanga, haihi n'orusozi orwa Molehe.

²MUKAMA yagambira Gidyoni ati: “Abantu aboinabo bahinguraine obwingi, tinsobora kubaha kusingura Abanyamidyani. Abaisirairi bataliikara kunyenyumirizaaho nibagamba bati: ‘Amaani gaitu nugo gatusingwize.’

³Habweki, gambira abantu boona oti: ‘Omuntu weena omutini kandi arukutukumira, agaruke omuka.’ Abantu emitwaro ebiri omu nkumi ibiri baagaruka omuka, omutwaro gumu nubo baasigara.”

⁴MUKAMA yagambira Gidyoni ati: “Na hati abantu bakyali baingi muno; obasirimule ifo hamaizi nyowe nuho ndaabakulengeseza; ou ndaakugambira nti: ‘Ogu agende na iwe, nuwe oragenda na we’; n'oundagamba nti: ‘Ogu atagenda na uwe,’ atagenda.”

⁵Gidyoni yatwara abantu hamaizi; MUKAMA yamuragira ati: “Weena araakomba amaizi n'orulimi nk'embwa, ogu omwemereze wenka; noogu araateeza amaju kunywa amaizi, na uwe omwemereze wenka.”

⁶Omuhendo gw'abantu abaakombere amaizi n'orulimi gukahika ebikumi bisatu; abandi boona abaasigaireho bakateeza amaju nukwo banywe amaizi.

⁷MUKAMA yagambira Gidyoni ati: “Nabantu abo ebikumi bisatu abanyakunywire amaizi n'orulimi nubo ndukwija kubajunisa, nkuhe kusingura Abanyamidyani; abandi boona obaleke, buli omu agaruke omuka ye.”

⁸Ensoha n'engwara ezi bakaba bainazo yazibaihaho; Abaisirairi boona yabaragira, buli omu agaruke omuheema ye, yasigaza ebikumi bisatu. Orukande orw'Abanyamidyani rukaba rumuli ifo omukihanga.

⁹Ha kiro eki kyonyini omu bwire bw'ekiro, MUKAMA yamugambira ati: “Imuka ogende oseesire orukande rw'Abanyamidyani; ninyija kubakuha obasingule.

¹⁰Obworaaba nootiina kusirimukayo wenka, ogende n'omuheereza wawe Pura.

¹¹Otege okutu ohurre Abanyamidyani ebibarukugamba, eki nikyo kiraakuha amaani ag'okubaseesira.” Nubwo Gidyoni yagenda hamu n'omuheereza we Pura, baahikaho abaserikale abakaba bali omurukande baina eby'okurwanisa.

¹²Abanyamidyani, Abamaleki, n'abantu boona aba Burugaizooba, bakaba bagoomere omukihanga nk'enzige; engamiya zaabo ikaba itarukusobora kubarwa, zikaba nizisisana nk'omusenyi ogwa hamusa gw'enyanja.

¹³Gidyoni nambere yahikiire, hakaba haroho omusaija ow'akaba naarootorra mutaahi we ekirooto ati: “Ndosirege nindora keeki enyakucumbirwe omunsaano eya sayiri neegwa omurusiisira orw'Abanyamidyani, yahika ha heema yagiteera, yagwa, yayejumika, yagwera kimu hansi.”

¹⁴Mugenzi we yamugambira ati: “Otagira oroosire kindi na kindi, keeki egi nikyo ekitara kya Gidyoni mutabani wa Yowaasi omuntu wa Isirairi; Abanyamidyani niihe lyabu lyona, Ruhanga alimuhaire kulisingura.”

¹⁵Gidyoni obuyahuliire ekirooto nkooku kirootoroirwe kandi nkooku kisoboroirwe kurungi, yateeza amaju yaramya, yagaruka omurukande rwa Isirairi yagamba ati: “Mwimuke! MUKAMA ihe ery'Abanyamidyani alibataire omungaro!”

¹⁶Abasaija abo ebikumi bisatu, yababaganizaamu ebicweka bisatu, boona yabakwasa engwara n'ensoha kandi omu buli nsoha atairemu ekimuli ekirukwaka.

¹⁷Yabagambira ati: “Munteho amaiso, ekindaakora na inywe nikyo mukole; obu ndaahika harukande nambere rurukutandikira, ekindaakora, nikyo na inywe mukole.

¹⁸Obundaateera engwara na boona abandaaba ndi nabo na inywe muteere engwara ha mbaju ez'orukande rwona, kandi mutoke nimugamba muti: ‘Habwa MUKAMA, na habwa Gidyoni.’ ”

¹⁹Abalinzi abahyaka obubakaba nibakyayemerra bati, ha ntandiko ey'ekisisimuko eky'itumbi, Gidyoni n'abasaija kikumi abaakaba ainabo baahika harukande; baateera engwara, baayata ensoha ezibakaba bakwasire.

²⁰Abasaija bali abaabaganiziibwemu ebicweka bisatu, baateera engwara, baayata ensoha, bakwaata ebimuli omu mukono ogw'emoso, kandi omu mukono ogw'obulyo bakwaata engwara ez'okuteera. Baatooka nibagamba bati: “Empirima habwa MUKAMA na habwa Gidyoni!”

²¹Buli omu yayemerra omukiikaro kye, baagota orukande, ihe ery'Abanyamidyani lyona lyairuka; lyairuka lyagenda niritoka.

²²Abasaija ba Gidyoni ebikumi bisatu obubaatiire engwara zaabo, MUKAMA yaleetera abanyanzigwa okurwanisangana bonka na bonka n'ebitara byabo; ihe lyairuka lyagenda Besi-sita enyakuroleriire Zerera, lyahika ha mutaano gwa Aberi-mehora haihi na Tabasi.

²³Abantu ba Isirairi boona: aba Nafutaali, Asera n'aba Manaase, boona bakeetwa baahondera Abanyamidyani.

²⁴Gidyoni yatuma abakwenda barabangane omunsi yoona ey'ensozi naagamba ati: “Musirimuke murwanise Abanyamidyani mukwate ebiikaro by'okwambukiraho okuhika Besi-bara na Yorudaani nukwo baleme kwambuka.” Abasaija ba Efuraimu nukwo bayesirwe bakwate ebikaro by'okwambukiraho okuhikira kimu Besi-bara na Yorudaani.

²⁵Baahondeera Abanyamidyani; bakakwata abadumizi babiri Abanyamidyani: Olebu na Zeebu. Olebu bamwitira ha mwandara gwa Olebu, Zeebu bamwitira handeeba eya Zeebu. Emitwe yabo, ogwa Olebu n'ogwa Zeebu, bakagireetera Gidyoni obuseeri bwa Yorudaani.