Read Runyoro - rutooro Bac 8 Bible Online

Bac 8 - Runyoro - rutooro bible

Bac 8

¹Abantu ab'omunsi ya Efuraimu bakagambira Gidyoni bati: “Habwaki, otaratwesire obuwagendaga kurwanisa Abanyamidyani?” Baamujunaana muno.

²Yabagarukamu ati: “Ekinsoboire kukora, tikirukwingana n'ekyanyu mukozire. Neebi ebike Abefuraimu ebimukozire nibikirra hara ebyoruganda rwange rwoona orwa Abyezeri ebirukozire.

³Ruhanga abahaire kwita abadumizi ba Midyani: Olebu na Zeebu. Ekyanyu mukozire, tikirukukira ekinakozire?” Obu yagambire eki, ekiniga kyabahwaho.

⁴Gidyoni yahika ha kyambu Yorudaani, yayambuka hamu n'abasaija ebikumi bisatu abaakaba ainabo, bajwahire, baitu nibakyahondera abanyanzigwa.

⁵Obuyahikire Sukoosi aho yagambira abasaija ba Sukoosi ati: “Mbeesengeriize, muhe abantu bange abarukumpondera ebyokulya; habwokuba bajwahire muno, nyowe nimpondera Zeba na Zalimuna abakama ba Midyani.”

⁶Abalemi ba Sukoosi baakaguza bati: “Itwe kuha ihe ryawe ebyokulya, Zeba na Zalimuna obakwasire?”

⁷Gidyoni yagarukamu ati: “Nukwo mwagira? Ruhanga obwalimpa nkakwata Zeba na Zalimuna, inywe ndibateeza amahwa n'amakongora ag'omwirungu.”

⁸Obuyarugire aho, yagenda Penweri, ab'oku nabo yabasaba nk'ekiyasabire aba Sukoosi, abantu ba Penweri baamugarukamu nk'aba Sukoosi okubaamugarukiremu.

⁹Yabagambira ati: “Obundigaruka n'obusinge, omunaara gunu ndigucwacwana.”

¹⁰Omu kasumi ako, Zeba na Zalimuna bakaba bali omukiikaro Kalikoli niihe ryabu erikaba lirumu abasaija omutwaro gumu n'enkumi itaano, boona abakaba basigaire haihe ryona ery'abantu ba Burugaizooba, habwokuba hakaba hafiire abasaija karwana emitwaro ikumi n'ebiri.

¹¹Kugenda oku, Gidyoni akatwarwa omuhanda ogwatwaraga abaraara mu heema, Burugaizooba bwa Noba na Yogobeha; yaseesira ihe, liteetegekere.

¹²Zeba na Zalimuna bairuka, yabahondera, abakama abo ababiri aba Midyani, Zeba na Zalimuna yabakwata, ihe lyabu lyona lyararanga.

¹³Obulemu obubwahoire, Gidyoni mutabani wa Yowaasi nubwo yagarukire, yaleetwa ha ntembotembo y'orusozi Heresi.

¹⁴Yakwata omusigazi wa Sukoosi, yamukaguliiriza; omusigazi nukwo kuhandiikira Gidyoni amabara g'abalemi n'abakuru ba Sukoosi, abasaija baahika nsanju na musanju.

¹⁵Gidyoni yahikaho abasaija ba Sukoosi yabagamba ati: “Zeba na Zalimuna ka mbanu! Nimwijuka obu mwayangire kunkonyera? Mwayanga kuha abasaija bange ebyokulya abakaba bajwahire muno, ngu habwokuba nkaba ntakakwasire Zeba na Zalimuna?”

¹⁶Yasorooza abakuru b'orubuga, yakwata amahwa n'amakongora eby'omwirungu yafubira abantu ba Sukoosi.

¹⁷Yaseesa omunaara gw'orubuga Penweri, abantu ab'omu rubuga yabaita.

¹⁸Nubwo Gidyoni yakagwize Zeba na Zalimuna ati: “Abasaija aba mwaitiire Tabora bali nkaha?” Baamugarukamu bati: “Nkooku iwe oli, nabo nukwo bakaba bali, buli omu hali bo, yasisanaga omwana w'omukama.”

¹⁹Gidyoni nubwo yagarukiremu ati: “Bakaba bali bagenzi bange, batabani ba nyina nyowe kinzaara. Ndahiire Ruhanga omwomeezi, obu mwakubaire mutabaisire, na nyowe tinakubaisire.”

²⁰Kandi yagambira Yeseri omuzigaijo gwe ati: “Imuka obaite.” Baitu omusigazi yatiina kubaita, habwokuba akaba akyaali musigazi muto.

²¹Nubwo Zeba na Zalimuna baagambire bati: “Iwe wenka imuka otwite, habwokuba omuntu nkooku aba, n'amaani ge nukwo gaba.” Gidyoni yaimuka, yaita Zeba na Zalimuna, yatwara ebintu ebirungi ebikaba biri omubikya eby'engamiya zaabo.

²²Nubwo abantu ba Isirairi baagambiire Gidyoni bati: “Otuleme, iwe na batabani bawe, n'abaijukuru bawe, habwokuba otujunire watwiha omu mikono y'Abanyamidyani.”

²³Gidyoni yabagambira ati: “Nyowe tindukwija kubalema, kandi na mutabani wange tarukwija kubalema, MUKAMA nuwe arukwija kubalema.”

²⁴Kandi yabagambira ati: “Munyikirize mbasabe ekintu; buli musaija omuli inywe, ampe empeta eza ha matu eziyanyagire.” (Baajwaraga empeta eza zaabbu, habwokuba bakaba bali Baisimairi).

²⁵Baagarukamu bati: “Nitwija kwikuha n'omutima gumu.” Baayanjurra orugoye, buli musaija yanagaho empeta eza ha matu eziyanyagire.

²⁶Empeta eza ha matu eza zaabbu eziyasabire, zikahikya kiloguraamu eza zaabbu nka amakumi abiri otabaliiremu ebintu ebirungi, eminiga n'ebijwaro eby'erangi eya kahukya, ebyajwarwaaga abakama ba Midyani, otaihireho enkoba ezikaba ziri omubikya eby'engamiya zaabo.

²⁷Zaabbu egi, Gidyoni akagikoramu ekisisani yakita omu Ofura omurubuga rwe. Abaisirairi boona bakasiga Ruhanga baakiramya, Gidyoni n'ekaye kyabafookera mutego.

²⁸Abanyamidyani nukwo baalemerwe bati Abaisirairi, tibaayongera kubatalibaniza. Omu biro bya Gidyoni, ensi ekagwagwana okumara emyaka amakumi ana.

²⁹Yerubaali mutabani wa Yowaasi, yagenda yaikara omuka y'owaabo;

³⁰akazaara abaana nsanju, abaarugire omunda ye, habwokuba akaba aina abakazi baingi.

³¹Na mukazi we ow'aheeru ow'akaba ali Sekemu, akamuzarra omwana w'obwojo yamuruka ibara Abimereki.

³²Kandi Gidyoni mutabani wa Yowaasi yafa akuzire muno, yaziikwa omukituuro ekya ise Yowaasi, omurubuga Ofura orwa Ababyezeeri.

³³Gidyoni obu yamazire kufa, Abaisirairi bakongera baarugaho Ruhanga baaramya ba Baali. Baali-Berisi nuwe baafora ruhanga wabo.

³⁴Kandi abantu ba Isirairi bataijuke MUKAMA Ruhanga wabo, ayabajunire omumikono y'abanyanzigwa baabo boona abakaba babeehinguliriize.

³⁵Kandi eka ya Yerubaali (nuwe Gidyoni) habw'ebirungi ebingi ebyakaba akoliire Isirairi batagikwatirwe mbabazi.