Read Runyoro - rutooro Bac 9 Bible Online

Bac 9 - Runyoro - rutooro bible

Bac 9

¹Abimereki mutabani wa Yerubaali akagenda Sekemu hali ba nyinarumi, yagambira abantu boona ab'oruganda, ab'ekika kya nyina ati:

²“Mukaguze abantu aba Sekemu muti: ‘Kiki eki murukukira kugonza, kulemwa batabani ba Yerubaali boona ensanju rundi kulemwa omu wenka?’ Kandi mwijuke nyowe nkooku ndi wanyu w'omunju.”

³Banyinarumi, ebi baabigambira abantu ba Sekemu; baasiima kukurata Abimereki, habwokuba bakagamba bati: “Abimereki, w'owanyina itwe.”

⁴Bamusumika ebicweka by'efeeza nsanju, baabiiha omunju ya Baali-beresi, ebi nibyo Abimereki yaihahoga kusasura abantu ababi kandi entabiganya abaamuhonderaga.

⁵Abimereki akagenda Ofura omunju ya ise, haibaale limu akaita abaise nsanju batabani ba Yerubaali, yabaitira haibaale limu. Baitu Yosamu macura ga Yerubaali yasigaraho, habwokuba akeesereka.

⁶Abantu boona aba Sekemu na boona ab'enju ya Beesi-miiro bakeesorooza baagenda Sekemu baata Abimereki hantebe, y'obukama.

⁷Yosaamu obu yahuliire ekigambo eki, akagenda yayemerra hamutwe gw'orusozi Gerizimu, yatoka muno naagamba ati: “Mutege amatu mumpulirize, inywe abantu ba Sekemu, na Ruhanga nukwo abahurre.

⁸Ira muno, emiti ekagenda kukoma omukama ow'okugirema; yagamba omuti omuzaituni eti: ‘Niiwe obe mukama waitu otuleme.’

⁹Omuzaituni gwagigarukamu guti: ‘Nsige nta amagita gange aganyakwekonyezibwa okuha embandwa n'abantu ekitiinisa, ngu ningenda kulema emiti?’

¹⁰Emiti yagamba omuti Omutini

¹¹eti: ‘Ija obe mukama waitu.’ Omutini gwagarukamu guti: ‘Nsige obunuzi bwange n'ebijuma ngu ngende kulema emiti?’

¹²Emiti yagamba omuti Omuzabbibbu eti: ‘Iwe, niiwe ija otuleme.’

¹³Omuzabbibbu gwagigarukamu guti: ‘Ndeke nta amaarwa gange aganyakusemeza embandwa n'abantu, ngu ngende kulema emiti?’

¹⁴Emiti yoona nubwo yagambiire amakerre eti: ‘Iwe niiwe ija otuleme.’

¹⁵Nandiki amakerre gati: ‘Obumuraaba nimwenda kunfoora mukama wanyu, mbaleme mwina omutima omurungi, mwije omukiituuru kyange; obumuraayanga kwija, amakerre garugwemu omurro gusiiriize emikogoto eya Lebbanoni.’

¹⁶“Okufoora Abimereki mukama, mukakora ekihikire kandi mukakikora n'omutima omurungi? Yerubaali n'enju ye yoona, mukamukoorra ekintu ekirungi nka uwe okuyakozire ebirungi?

¹⁷Ise nyowe ayabarwaniriire, yahayo obwomeezi bwe, yabajuna Abanyamidyani,

¹⁸hati kiro kinu eka ye niyo mwizire kurwanisa? Abatabani be nsanju mubaitiire ha ibaale limu. Abimereki, mutabani w'omuzaana we, mwamufoora omukama ow'okulema abantu ba Sekemu, habwokuba w'oruganda rwanyu!

¹⁹Obumuraaba mumukozire ekihikire kandi eky'obwinganiza hali Yerubaali neeka ye, Abimereki abege kusemererwa kwanyu, na inywe mubege kusemererwa kwe.

²⁰Baitu eki obu kiraaba kitali kwo, Abimereki arugwemu omurro gusiiriize abantu aba Sekemu n'ab'enju ya Besi-miiro; rundi omurro guruge omubantu ba Sekemu n'ab'enju ya Besi-miiro; gusiiriize Abimereki.”

²¹Yosaamu habw'okutiina Abimereki mugenzi we, akairuka yagenda Beeri, nuho yaikara.

²²Abimereki, akalema Isirairi emyaka esatu.

²³Ruhanga yaleta kunobangana hagati ya Abimereki n'abantu ba Sekemu; abantu ba Sekemu nukwo kugobeza Abimereki.

²⁴Ekya bakoleze eki, nikyo ekibi Abimereki yakozire abaana nsanju batabani ba Yerubaali n'esagama yabo yaseesire, bihikeho Abimereki owa ise bo ayabaisire, kandi bihikeho n'abantu ba Sekemu abaamutairemu amaani kwita bagenzi be.

²⁵Abantu ba Sekemu bakata abasaija ha mitwe y'ensozi beeserekerre Abimereki, abantu abo baanyagaga boona abaabarabahoga, abaabaga bakwasire omuhanda ogu. Eki Abimereki, yakimanya.

²⁶Gaali mutabani wa Ebedi, hamu n'ab'oruganda rwe bakagenda Sekemu; abantu aba Sekemu baamwesiga. Bakagenda omumisiri yabo baanoga emizabbibbu, baija baagijunga, baakora obugenyi.

²⁷Baataaha omunju ya Ruhanga wabo, baalya, baanywa, baabazaaho kubi Abimereki.

²⁸Gaali mutabani wa Ebedi, yakaguza ati: “Abimereki nuwe oha, kandi itwe abantu ba Sekemu tuli bantu ba mulingo ki kumuheereza? Tali mutabani wa Yerubaali? Uwe na Zebuli omunyoro we bataheereze abasaija ba Hamora ise Sekemu? Kandi itwe, tusobora tuta kuheereza Abimereki?

²⁹Haa boojo; kakuba ninyowe mbaire nindema abantu abo! Abimereki naakumwihireho. Naakumugambiire nti: ‘Kanyisa ihe ryawe, oije orwane.’ ”

³⁰Zebuli omunyoro w'orubuga, obu yahuliire Gaali mutabani wa Ebedi ebiyagambire, yabiihirwa muno.

³¹Yatuma abakwenda hali Abimereki ow'akaba ali Aruma, naagamba ati: “Gaali mutabani wa Ebedi n'ab'oruganda rwe, mbanu baizire Sekemu, baleesire akatabanguko omurubuga bakurwanise.

³²Habweki, ogende ekiro hamu n'abasaija bawe aboinabo, mwesereke omukisaka.

³³Nyenkya izooba obuliraaba nirituruka, oimuke kara, oseesire orubuga; Gaali n'abantu be, obubaraija kukurwanisa, aho obakole kyona ekyorukusobora.”

³⁴Abimereki n'abantu boona abaakaba ainabo, bakaimuka ekiro, baayesereka haihi na Sekemu, beebaganizeemu ebicweka bbina.

³⁵Gaali mutabani wa Ebedi yarugayo, yayemerra omu muhanda ogw'irembo ly'orubuga; Abimereki n'abantu be abaakaba ainabo obubaamuboine naarugayo naayemerra omwirembo ly'orubuga, baaruga nambere bakaba beeserekere.

³⁶Gaali obuyababoine yagambira Zebuli ati: Weewe, dora abantu mbali nibaruga ha mitwe y'ensozi! Zebuli yagarukamu Gaali ati: “Noorora ebiituuru by'ensozi, nibyo orukweta bantu.”

³⁷Gaali yagaruka yagamba ati: “Barungi, abantu mbali, nibaruga omu nsozi hagati, kandi ekicweka ekimu nikiruga ha bukiizi obw'omuti omuhomozi ogw'abafumu.”

³⁸Zebuli yagarukamu Gaali ati: “Iwe ayagambire oti: ‘Abimereki nuwe oha, itwe kuba bairu be?’ Hati emyehembo yawe yazaara ki? Banu tinubo bantu aba wagayire? Hati nu, rugayo ogende obarwanise.”

³⁹Gaali yagenda ayebembiire abantu ba Sekemu, yarwanisa Abimereki.

⁴⁰Gaali yairuka, Abimereki yamuhambya, baingi baagwa bahutaire kuhikira kimu hairembo ly'orubuga.

⁴¹Abimereki akaikara Aruma; Zebuli yabinga Gaali n'ab'oruganda rwe, batongere kwikara Sekemu.

⁴²Ha kiro ekyakurasireho, abasaija bakagenda omumisiri. Eki, Abimereki yakimanya.

⁴³Nukwo kukwata abantu, akababaganizaamu ebicweka bisatu, baayesereka omumisiri; obuyaboine abantu nibaruga omurubuga, yabajumbutukira, yabagwamu yabaita.

⁴⁴Abimereki n'ekicweka eky'abantu abaakaba ainabo, bairuka baagenda omumaiso, baayemerra hamuhanda ogw'irembo ly'orubuga. Omukasumi nuko kamu, ebicweka ebibiri ebindi, byagwera abantu boona abakaba bali omumisiri baabaita.

⁴⁵Abimereki yarwanisa orubuga izooba lyona, yaruhamba, obuyamazire kwita abakaba barurumu n'okuruseesa, yaruseeserra ekisura.

⁴⁶Abantu boona aboomu munaara gwa Sekemu, obubaahuliire eki, baasingirwa omukisiika eky'enju ya Baali-beresi.

⁴⁷Abimereki akamanya abantu aboomu munaara gwa Sekemu nkooku beesoroize hamu.

⁴⁸Nukwo kutemba orusozi Zarumooni hamu n'abantu be; yakwata endemu yatema ekitaagi hamuti, yakihimba yakita haibega. Yagambira abantu be ati: “Ekimurozire ninkora, na inywe nikyo mukole, kandi mukikole bwangu nkooku nkozire.”

⁴⁹Abantu boona baatema, buli muntu ekitaagi, baahondera Abimereki, baabituuma ha bigo, baabicumika omurro. Abantu boona ab'omunaara gwa Sekemu, abasaija n'abakazi abarukuhika nk'orukumi, baafa.

⁵⁰Abimereki yagenda Tebezi, orubuga oru yarugota, yaruhamba.

⁵¹Omurubuga oru, hakaba harumu omunaara ogugumire, ogwabantu ab'omurubuga oru, baasingiirwemu. Abasaija boona n'abakazi baayekingiramu, baatemba eruguru omukasu kagwo.

⁵²Abimereki akataahirra aboomu munaara yabarwanisa yaizira kimu hamulyango gw'omunaara agucumike omurro.

⁵³Omukazi omu yahungurra Abimereki ensiiso, yamuteera omutwe, yamubberengura oruhanga.

⁵⁴Abimereki nukwo kweta bwango ow'akaba amukwatiire eby'okurwanisa bye, yamugambira ati: “Somora empirima yawe onsonge, abantu bataliija kugamba ngu: ‘Nkaitwa omukazi.’ ” Omusigazi we nukwo kumusimba empirima, Abimereki yafa.

⁵⁵Abaisirairi obubaarozire Abimereki amazire kufa, baarugayo, buli muntu yakwata ogw'owabo.

⁵⁶Omusango Abimereki oguyacwire hali ise, ogw'okwita bagenzi be ensanju, Ruhanga nukwo yagumusaswire ati.

⁵⁷Obubi bwona obw'abantu ba Sekemu, Ruhanga akabubagarurra, omukyeno gwa Yosaamu mutabani wa Yerubaali gwabahikaho.