Read Runyoro - rutooro 3Yoh 1 Bible Online

3Yoh 1 - Runyoro - rutooro bible

3Yoh 1

¹Nyowe omukuru, ninkuhandiikira iwe Gaayo, enganzi yange, ou ngonza omu mazima.

²Omugonzibwa, ninsaba byona bikugendere kurungi, kandi obe mwomeezi omu mubiri nkooku oli kurungi omu mwoyo.

³Nkasemererwa muno abamu ha bagenzi baitu obu baizire bammanyisa nkooku orukwekambira amazima kandi noogahondera kwo.

⁴Busaho ekisobora kundeetera omuhimbo okukira kuhurra abaana bange nkooku barukuhondera amazima.

⁵Omugonzibwa, obu okoonyera ab'oruganda, munomuno abagenyi abatamanyirwe, obu nookora ekintu eky'obwesigwa.

⁶Kandi abo nubo abaamanyisize ekitebe kyona ky'abaikiriza ha ngonzi zawe. Kyakubaire kirungi kwongera kubaboherra omu rugendo rwabo omu mulingo ogusiimwa Ruhanga ou oheereza.

⁷Bakaimukya orugendo oru habwa Kristo kandi bataikirize kutwara akantu koona abakafiiri aka bakaba nibagonza kubaha.

⁸Habweki tusemeriire kugumya abantu nk'abo, nukwo tusobole kubakoonyera ha mulimo ogw'okurarangya amazima.

⁹Nyowe nyina ebi naahandikiire ekitebe ky'abaikiriza, baitu Diyoterefe anyakugonza kwebembera boona, taikiriza ebi ndagira.

¹⁰Habweki obu ndiija, ndibaijukya ebi akora nantebya kubi. Tagarukira hali eki kyonka, baitu ayanga n'okujwahukirra ab'oruganda, nangwa naatanga n'abo abagonza kubajwahukirra, kandi ababinga omu kitebe ky'abaikiriza.

¹¹Omugonzibwa, otakuratira abarukukora ebibi, baitu okuratire abarukukora ebirungi. Ogu anyakukora ebirungi, nuwe wa Ruhanga; kandi anyakukora ebibi, takaroraga Ruhanga.

¹²Demeetiriyo, abantu boona bamubazaaho kurungi, kandi n'amazima nago nigamuheera obwakaiso. Na nyowe ninkigumya, kandi mumanyire obwakaiso bwange nkooku buli bw'amazima.

¹³Mbaire nyina bingi eby'okubahandiikira, baitu tindukwenda kubihandiikisa akacumu na bwino.

¹⁴Ninihira kubarora bwango, nukwo tubaze niturorangana.

¹⁵Obusinge bube na iwe. Banywani baitu nibakuramukya. Ondamukize banywani baitu, buli omu.