Read Runyoro - rutooro Yud 1 Bible Online

Yud 1 - Runyoro - rutooro bible

Yud 1

¹Nyowe Yuda, omuheereza wa Yesu Kristo kandi mugenzi wa Yakobbo, nimpandiikira abo abaayesirwe, abagonzibwa omu Ruhanga Isiitwe, kandi abaalinzirwe habwa Yesu Kristo.

²Embabazi, obusinge, n'engonzi byeyongere omuli inywe.

³Abagonzibwa, habw'ekihika kingi eki mbaire nakyo eky'okubahandiikira ebirukukwata ha kujunwa kwaitu, ndozire nikyetaagwa muno okubahandiikira nimbateererra: murwanirre enyikiriza abantu ba Ruhanga ei baahairwe omurundi gumu, kyahwa.

⁴Habwokuba haroho abantu abamu abaatutaahiremu tutarukumanya. Nubo abo abaarangirweho ira nkooku balisingwa omusango. Bali bantu abatatiina Ruhanga, abahindura embabazi za Ruhanga waitu nibaifoora byekwaso by'okukora eby'obusiihani, baayanga Omulemi waitu omu wenka kandi MUKAMA Yesu Kristo.

⁵Ebi noobu muraaba mwabimanyire ira, baitu hati ningonza kubaijukya nkooku MUKAMA, ayajunire abantu be naabaiha omunsi Misiri, akongera yahwerekereza abo abataramwikiriize.

⁶Na bamalaika abataralinzire rukarra rw'obukuru bwabo bakaruga omu kiikaro kyabo, akabaikaza omu mwirima kasira, baboherwe omu njegere ezi batalirugamu okuhika ha kiro kikuru eky'okucwererwaho omusango;

⁷nk'ab'omu Sodomu na Gomora n'embuga ezindi ezaaherraineho oku baayetabwire omu busiihani n'omu rwanju orutali rw'obuhangwa, bakafubirwa omu murro ogutahwaho, babe kyokurorraho kyaitu.

⁸Omu mulingo nugwo gumu, abantu abo basiisa emibiri yabu, nibatwalirizibwa ebirooto byabo, bagaya obusobozi bwa Ruhanga kandi bajuma ab'ekitiinisa ab'omu iguru.

⁹Noobwakubaire Mikairi, omukuru wa baamalaika, obu akaba naahakaniza Sitaani, akamuteeza empaka ha by'omubiri gwa Musa, atagonze kumucwera omusango naamugaya, baitu akamugambira ati: “Leka MUKAMA wenka nuwe akuhane.”

¹⁰Baitu abantu banu bagaya kyona eki batarukwetegereza, kandi batwalirizibwa ebintu ebi bamanyire habw'obuhangwa bwabo nk'enyamaiswa ezitaina magezi, kandi nibyo bibahwerekereza.

¹¹Balikibona! Habwokuba bakwasire omuhanda gwa Kaini, beenaga omu nsobi eya Balaamu habw'okwetungira amagoba, kandi bahwerekererra omu bwemi bwa Koora.

¹²Nubo abo abasiisa amagenyi ganyu ag'engonzi habwokuba bakora ebintu bya buli mulingo bataina nsoni, nibeefaaho bonka. Bali nk'ebicu ebitarumu njura, ebirukutwarwa omuyaga; rundi nk'emiti etaana bijuma omu kasumi kaabyo, eyafiire yaleka, kandi yasindukira kimu.

¹³Bali nk'ebigonzi by'enyanja erukusikuka, nibarugwamu esaabu n'orwondo. Bali nk'enyunyuuzi ezirukwenjeera, abaayahuliirwe okwikara omu mwirima kasira ebiro byona.

¹⁴Abo nubo Enoka ow'omu bwijukuru bwa musanju okuruga h'Adamu yarangireho naagamba ati: “Kinu mukyetegereze, MUKAMA naija n'abahikiriire be obuhumbe n'obuhumbe

¹⁵kucwera abantu boona omusango, n'okugusingisa abo abatatiina Ruhanga habw'ebibi byona ebi baamukozire omu mulingo mubi, na habw'ebigambo ebibi abasiisi abatatiina Ruhanga ebi baamubalizeeho.”

¹⁶Abo nubo ntontorromi, bahyemi, abalemwa okwegomba kwabo okubi, abeehaahira n'ebigambo bingi, bantu abanwekanweka abandi, nukwo bagire eki babaihaho.

¹⁷Baitu inywe abagonzibwa, kibahikiriire kwijuka abakwenda ba MUKAMA waitu Yesu Kristo ebi baarangire.

¹⁸Bakabagambira bati: “Omu biro bya ha mpero halibaho abasekerezi abatatiina Ruhanga, abalemwa okwegomba kwabu okubi.”

¹⁹Abo nubo abaleetereza okwebaganizaamu, bantu b'ensi abataina Mwoyo wa Ruhanga.

²⁰Baitu inywe, abagonzibwa, mugumire kandi mweyongere ha nyikiriza yanyu erukwera muno; musabirege omu Mwoyo Ahikiriire.

²¹Mwikale omu ngonzi za Ruhanga, mutegereze obwomeezi obutahwaho MUKAMA waitu Yesu Kristo obu alibaha habw'embabazi ze.

²²Abo abarukugurukyagurukya, mubahwitule;

²³abandi mubajune, nimubasahura omu murro; n'abandi mubagirre embabazi, baitu nimwegendereza, nangwa munobe n'ekijwaro ekisiisirwe ebibi byabo eby'orwanju.

²⁴Ekitiinisa, obukuru, obulemi n'obusobozi bibe hali Ogu arukusobora kubalinda mutagwa, akabahikya omu maiso g'ekitiinisa kye mutaina kamogo kandi mukyanganukire.

²⁵Ebi byona biheebwe Ruhanga omu wenka anyakutujuna naaraba omu Yesu Kristo MUKAMA waitu ayabaireho ira lyona, anyakuroho hati, kandi ow'alibaho ebiro n'ebiro. Amiina.