Read Runyoro - rutooro Kus 1 Bible Online

Kus 1 - Runyoro - rutooro bible

Kus 1

¹Kunu nukwo okusuukururwa Ruhanga oku yahaire Yesu Kristo kwoleka abaheereza be, bamanye ebikaba nibiija kubaho bwango. Binu akabimanyisa naatuma malaika hali omuheereza we Yohaana,

²ayahandiikire byona ebi yaboine naajurra ebigambo bya Ruhanga n'obwakaiso bwa Yesu.

³W'omugisa anyakusoma ebigambo binu eby'okuranga, kandi b'omugisa abo abanyakuhurra n'abanyakukwata ebihandiikirwe omu kitabu kinu; habwokuba akasumi kali haihi kuhika.

⁴Nyowe Yohaana nimpandiikira ebitebe musanju eby'abaikiriza ebiri omu Asiya. Nimbagondeza omugisa n'obusinge ebinyakuruga hali Ogu anyakubaho, ayabaireho, kandi ow'okwija, n'ebinyakuruga hali emyoyo musanju enyakwikara omumaiso g'ekitebe ky'obukama bwe,

⁵kandi ebinyakuruga hali Yesu Kristo kaiso omwesigwa ayabandize kuhumbuuka omu bafu, kandi anyakulema abakama b'ensi. Ogu anyakutugonza, ayatwihire omu bibi byaitu naatucunguza esagama ye,

⁶yatufoora bukama kandi banyakatagara ba Ruhanga Ise, aheebwe ekitiinisa n'obusobozi ebiro n'ebiro. Amiina.

⁷Ngugwo naizira omu bicu, kandi buli riiso lirimurora, n'abo abaamucumisire balimurora; kandi enganda zoona ez'omunsi zirimuterra empamo. Egokwo. Amiina.

⁸Mukama Ruhanga agamba ati: “Ninyowe Ntandiko, ninyowe Mpeero.”[1] Anyakubaho, ayabaireho, kandi ow'okwija, Kamara-byona.

⁹Nyowe Yohaana mwene wanyu, anyakubagana na inywe omu Yesu: emihito n'okugumiisiriza ebitutungisa obukama, nkaba ndi omu kizinga ekirukwetwa Patimo, nkwatirweyo habw'okurangirra ekigambo kya Ruhanga n'okumanyisa abantu ebya Yesu.

¹⁰Ha kiro kya Mukama, obu natemberwe Mwoyo, enyuma yange nahurra iraka likooto nk'ery'engwara,

¹¹nirigamba liti: “Ebi orukurora bihandiike omu kitabu, obitwekere ebitebe musanju by'abaikiriza abali: Efeeso, Sumiruna, Perugamo, Tiyatiira, Saadisi, Filadelufiya na Layodikeeya.”

¹²Nubwo nakubuutukire kurora ow'akaba naabaza na nyowe. Obu nakubuutukire, narora ebikondo musanju eby'etaara, bya zaabbu;

¹³hagati y'ebikondo ebi nkarora omu arukusisana Omwana w'omuntu, ajwaire ekanzu eraihire, ayeteegere omu kifuba omweko gwa zaabbu;

¹⁴omutwe gwe n'isoke rye bikaba nibyera ti nk'ebyoya by'entaama njeru, nibyera nk'ebirika. Amaiso ge gakaba nigaaka nk'endimi z'omurro;

¹⁵ebigere bye bikaba nibisisana omulinga oguzigwire, ogusemereziibwe omu kyoto; kandi iraka lye likaba nirisisana nk'iraka ery'amaizi amaingi agarukuhirra;

¹⁶omu mukono gwe ogw'obulyo akaba akwasire enyunyuuzi musanju, omu kanwa ke haarugamu empirima etoire ey'amoogi abiri, kandi amaiso ge gakaba nigangasana nk'izooba erirukujwa n'amaani.

¹⁷Obu namurozire, nagwa ha bigere bye nasisana nk'anyakufiire. Baitu yantaho omukono gwe gw'obulyo, naampuumuza ati: “Otatiina, ninyowe ow'okubanza, owa ha mpero,

¹⁸kandi hati nyomiire. Nkafa, baitu okuruga hati ndaikaraga ndi mwomeezi ebiro byona, kandi nyina ebisumuruzo by'Orufu n'eby'Okuzimu.

¹⁹Handiika ebi orukurora, ebinyakuroho hati kandi ebiribaho hanyuma.

²⁰Amakuru agaserekerwe ag'enyunyuuzi musanju ezi orozire omu mukono gwange ogw'obulyo, n'ag'ebikondo musanju eby'etaara eza zaabbu nugo ganu: enyunyuuzi musanju imanyisa bamalaika ab'ebitebe musanju by'abaikiriza, kandi ebikondo musanju eby'etaara bimanyisa ebitebe ebi byonyini.”