Read Runyoro - rutooro Kus 10 Bible Online

Kus 10 - Runyoro - rutooro bible

Kus 10

¹Aho narora malaika ondi ow'amaani naasirimuka naaruga omu iguru, ali omu kicu, n'omuhangazima guli haruguru y'omutwe gwe. Ha maiso ge nigangasana nk'izooba, amaguru ge gali nk'enyomyo z'omurro.

²Omu mukomo gwe akwasire akazingo k'ekitabu akasuukwirwe. Okuguru kwe okw'obulyo yakuta ha nyanja, kandi okw'obumoso yakuta ha bwerre.

³Yayamirra n'iraka likooto nk'entale erukubbuukura. Obu yayamiriire, enkuba musanju zaagamba.

⁴Enkuba omusanju obu zaamazire kugamba, nkaba nyeteekaniize kuhandiika, baitu nahurra iraka erirukuruga omwiguru nirigamba liti: “Enkuba musanju, ebi zaagamba obiculerre, otabihandiika.”

⁵Malaika ou naboine ayemeriire ha nyanja na ha bwerre, omukono gwe ogw'obulyo yagwimukya haiguru,

⁶yarahira Ogu anyakwomeera ebiro byona, ayahangire iguru, ensi, anyanja, n'ebinyakubirumu byona, naagamba ngu, tihakyaroho kukeerereza okundi,

⁷baitu omu biro malaika owa musanju ebi aliterramu engwara, nubwo Ruhanga alihikiriza entegeka ye ey'ensita nkooku yagambiire abarangi abamuheereza.

⁸Nubwo iraka eri nahuliire niriruga omwiguru, lyayongera lyangambira liti: “Genda oihe akazingo k'ekitabu ekyanjurwirwe omu ngaro za malaika anyakwemeriire ha nyanja na ha bwerre.”

⁹Nagenda hali malaika ogu, namusaba ampe akazingo k'ekitabu. Uwe yangarukamu ati: “Nkako, kakwate okalye; nikaija kukuruma omu nda, baitu omu kanwa karakunurra nk'obwoki.”

¹⁰Akazingo ako nakaiha omu mukono gwa malaika nakalya; omu kanwa kange kakaba nikanura nk'obwoki, baitu obu namazire kukalya, narumwa omu nda.

¹¹Malaika yangambira ati: “Osemeriire kugaruka kuranga ebiriizira abantu ab'enganda nyingi, amahanga, engambo, n'abakama.”