Read Runyoro - rutooro Kus 11 Bible Online

Kus 11 - Runyoro - rutooro bible

Kus 11

¹Hanyuma naheebwa oruti orw'okulengesa, orurukusisana orubango; haabaho ayandagiire ati: “Imuka, olenge Enju ya Ruhanga n'itambiro, kandi obale abo abaramizaamu;

²baitu otalenga ezigati ey'aheeru y'Enju egi; yo ogireke, habwokuba ehairwe Abanyamahanga kandi balirubaatirra orubuga orurukwera okumara ameezi makumi ana n'abiri.

³Kandi abakaiso bange ababiri ndibaha obusobozi obw'okuranga okumara ebiro rukumi rumu omu bikumi bibiri n'enkaaga, baliranga bajwaire ebiguniya.”

⁴Abakaiso abo niyo emiti ey'oliva, n'ebikondo bibiri eby'etaara ebinyakuli omu maiso ga MUKAMA w'ensi yoona.

⁵Kakuba habaho weena arukubakora kubi, omurro gulibaruga omu kanwa, gumaleho abanyanzigwa baabo. Kakuba habaho weena arukubakora kubi, nawe nukwo ali w'okwitwa ati.

⁶Baina obusobozi obw'okukinga iguru, nukwo enjura ereke kugwa omu biro ebi balimara nibaranga. Kandi baina obusobozi ha maizi okugahindura sagama, n'okuleeta omunsi buli muhito gwona ha bakagondiize hoona.

⁷Obu balikamara kuha obwakaiso bwabu, ekinyamaiswa ekinyakuruga omu kiina ekitaina h'okugarukira kiribarwanisa, kibasingule, kibaite;

⁸kandi emitumbi yabu erigaraamirra omu ikuute ery'orubuga orukuru nambere MUKAMA wabo yabambiirwe ha musaraba, orubuga orusisanizibwa Sodomu na Misiri.

⁹Abantu aba buli mulingo, buli ruganda, buli ngambo, n'aba buli ihanga emitumbi yabo baligihanga amaiso okumara ebiro bisatu n'ekicweka, batarukwikiriza eziikwe omu kituuro.

¹⁰Kandi abo abaliba bali omunsi balibeebugira, balisemererwa kandi balitwekerangana ebisembo, habwokuba abarangi abo ababiri baabatuntuzaaga muno.

¹¹Baitu obu haahingwireho ebiro bisatu n'ekicweka, orwoya orw'obwomeezi orwarugire hali Ruhanga rukabataahamu, baayemerra; n'abo boona abaababoine baatiina muno.

¹²Nubwo abakaiso abo ababiri baahuliire iraka likooto erirukuruga omwiguru nirigamba liti: “Mutembe, mwije hanu!” Baatemba omu iguru, bali omu kicu, abanyanzigwa baabo nibabarora.

¹³Kandi omu kasumi ako haabaho omusisa ogw'amaani, kimu kya ikumi eky'orubuga kyagwa; abantu kasanju baitwa omusisa, kandi abaasigaireho baatina muno, baakugiza Ruhanga ow'omwiguru.

¹⁴Omuhito ogwa kabiri guhoire, hati ogwa kasatu gumalize kwija.

¹⁵Nubwo malaika owa musanju yatiire engwara ye, omu iguru haahulirwa amaraka makooto agaagambire gati: “Obukama bw'ensi buhindukire, bwaba bwa MUKAMA waitu n'Ogu ou yaseesireho amagita (nuwe Kristo), kandi alirema ebiro byona.”

¹⁶Abakuru amakumi abiri na bbana abanyakwikarra ha bitebe byabu omu maiso ga Ruhanga baajuumara, baamuramya,

¹⁷nibagamba bati: “Nitukusiima MUKAMA Ruhanga ow'obusobozi bwona, anyakuroho kandi ayabaireho, habwokuba oyegaruliire obusobozi bwawe, wajuumura engoma.

¹⁸Amahanga gakabiihirwa muno, hati akasumi kawe kahikire ak'okugafubira: abafiire okucwerwa omusango, n'abaheereza baawe okuheebwa empeera, nubo abarangi n'abahikiriire n'abo abakutiina, abato n'abakuru kandi nuko kasumi ak'okumaraho abahwerekereza ensi.”

¹⁹Aho Enju ya Ruhanga ey'omwiguru yakingurwa, kandi esanduuko ey'endagaano yazooka omu Nju ye; haabaho emirabyo, okuhinda kw'amaani, okubbaruka kw'enkuba, omusisa n'orubaale rwingi.