Read Runyoro - rutooro Kus 12 Bible Online

Kus 12 - Runyoro - rutooro bible

Kus 12

¹Kandi haazooka omwiguru ekintu ekirukuhuniriza muno: omukazi ajwaire izooba, okwezi kuli hansi y'ebigere bye, kandi ha mutwe ajwaire ekondo ey'enyunyuuzi ikumi na ibiri.

²Omukazi ogu akaba akulize, naataaga habw'okurumwa ebisa, ali omu busaalizi obw'okuzaara.

³Kandi omwiguru haazooka ekirukuhuniriza ekindi; nikyo ekijoka ekikooto ekirukutukura, ekiina emitwe musanju, amahembe ikumi, n'ekondo musanju ha mitwe yakyo.

⁴Omukira gwakyo gwasingorra kimu kya kasatu eky'enyunyuuzi ez'omwiguru, gwazinaga hansi. Ekijoka kyayemerra omumaiso g'omukazi ow'akaba ali haihi kuzaara, nukwo kisonsomere omwana we naakyamuzaara ati.

⁵Yazaara omwana w'obwojo ow'akaba ali w'okulema amahanga goona naagalemesa omwigo ogw'ekyoma, baitu omwana we yasahurwa, yatwarwa omba Ruhanga na ha kitebe eky'obukama bwe.

⁶Omukazi yairukira omwirungu nambere Ruhanga akaba amuteekaniriize ekiikaro h'asobora kuroleererwa kurungi okumara ebiro rukumi bibiri n'enkaaga.

⁷Nubwo obulemu bwacwekere omwiguru, Mikairi na bamalaika be baarwana n'ekijoka; kandi ekijoka na bamalaika baakyo baarwana,

⁸baitu baasingurwa, kandi tibaagaruka kutunga kiikaro omu iguru.

⁹Ekijoka eki kikooto kyahungurwa hansi, niyo enjoka egi eya ira enyakwetwa Omwohi kandi Sitaani, anyakubiihabiiha ensi yoona--yahungurwa omunsi hamu na bamalaika be.

¹⁰Kandi nahurra iraka erikooto omwiguru nirigamba liti: “Hati okujuna, amaani, n'obukama bwa Ruhanga waitu hamu n'obusobozi obwa Kristo we biizire, habwokuba omulegi wa bagenzi baitu, anyakubalega hali Ruhanga waitu nyamusana n'ekiro, abingirwe omwiguru.

¹¹Bamusingwize okufa kw'Omwana gw'Entaama n'obwakaiso bw'amananu obu bamuheriire; batataatirre bwomeezi bwabo, nangwa baikiriza n'okumufeera.

¹²Nahabweki, semererwa iwe iguru, na inywe abaliikaramu! Baitu ziribabona inywe ensi n'enyanja, habwokuba Omwohi abaiziiremu aina ekiniga kingi, kandi amanyire nkooku asigaize akasumi kake!”

¹³Ekijoka obu kyarozire nkooku kihungwirwe omunsi, kyaronza omukazi ayazaire omwana omwojo.

¹⁴Baitu omukazi akaheebwa amapapa abiri ag'isamba erikooto, nukwo asobole kwiruka ekijoka, agende omu irungu, omu kiikaro nambere akaba naija kuroleerererwa okumara akasumi akali nk'emyaka esatu n'ekicweka.

¹⁵Ekijoka eki kyabooga ekisaaru ky'amaizi maingi, nikigaiha omu kanwa kaakyo, gahondere omukazi, nukwo entunga yago emutwale hara;

¹⁶baitu ensi yakoonyera omukazi agu, yayesama, yamira ekisaaru ekyaboogerwe ekijoka.

¹⁷Nubwo ekijoka kyabiihiriirwe omukazi, kyagenda kurwanisa oruzaaro rwe orwasigaireho, nubo abo abakwata Ebiragiro bya Ruhanga kandi abajurra Yesu.

¹⁸Nubwo ekijoka kyayesimbire ha musa gw'enyanja.