Read Runyoro - rutooro Kus 13 Bible Online

Kus 13 - Runyoro - rutooro bible

Kus 13

¹Nyowe nkaba nyemeriire ha musa gw'enyanja; kandi narora ekinyamaiswa nikiimuka omu nyanja kiina amahembe ikumi, emitwe musanju, ekondo ikumi ha mahembe gaakyo, kandi ha mitwe yakyo hahandiikirweho ibara erirukujuma Ruhanga.

²Ekinyamaiswa eki narozire, kikaba nikisisana engo, ebigere byakyo nibisisana eby'edubu, akanwa kaakyo nikasisana ak'entale. Ekijoka kyakiha amaani gaakyo, n'ekitebe kyakyo eky'obukama, n'obusobozi bwakyo obwingi.

³Ogumu ha mitwe yakyo gukaba nigusisana ogwina ekihuta ekirukusobora kukiita, baitu ekihuta eki ekyakusoboire kukiita, kyakira; kandi abantu boona ab'ensi bahondera ekinyamaiswa bahuniriire.

⁴Abantu baaramya ekijoka eki, habwokuba obusobozi bwakyo kikabuha ekinyamaiswa, kandi baaramya n'ekinyamaiswa nibagamba bati: “Nooha arukusisana ekinyamaiswa, kandi nooha asobora kukirwanisa?”

⁵Ekinyamaiswa eki kyaheebwa akanwa k'okugamba ebigambo eby'okwekuliriza n'eby'okujuma Ruhanga, kandi kyaikirizibwa okukozesa obusobozi bwakyo okumara ameezi amakumi ana n'abiri.

⁶Kyayesamya akanwa kaakyo kubaza eby'okujuma Ruhanga, nikijuma ibara lye, n'ekiikaro eki aikaramu, n'abo abaikara omwiguru.

⁷Kandi kyaikirizibwa okurwanisa abantu ba Ruhanga n'okubasingura. Kyaheebwa obusobozi ha nganda zoona, ha bantu boona, ha ngambo zoona, na ha mahanga goona.

⁸Kandi boona abaikara omunsi baliramya ekinyamaiswa eki. Nubo abo ab'amabara gaabo gatarahandiikiirwe okuruga ha kuhangwa kw'ensi omu kitabu eky'obwomeezi eky'Omwana gw'Entaama ayatambirwe.

⁹Anyakwina okutu, ahurre:

¹⁰Ogu ow'okunyagwa, anyagwe omu bwiru; ogu anyakwisa empirima, nawe aitwe n'empirima. Aho nuho harukwetaagirwa okwikiriza n'okugumiisiriza okw'abantu ba Ruhanga.

¹¹Nubwo narozire ekinyamaiswa ekindi ekyakununukire omu itaka; kiina amahembe abiri nk'entaama, kyabaza nk'ekijoka.

¹²Kyakozesa obusobozi bwona obw'ekinyamaiswa eky'okubanza, na kiri kikiroleeriire. Kyahambiriza ensi n'abagirumu kuramya ekinyamaiswa eky'okubanza ekyakizire ekihuta kyakyo eky'okukiita.

¹³Kyakora ebirukuhuniriza, kyaragira omurro guruge omwiguru gugwe hansi, abantu nibarora.

¹⁴Ebihuniriza ebi kyaikiriziibwe kukora omu maiso g'ekinyamaiswa eky'okubanza bikahabisa abo abaikara omunsi. Kikabaragira kukora ekisisani eky'okunyumirizaaho ekinyamaiswa eki ekyahutaaziibwe empirima, baitu kyagaruka kyayomeera.

¹⁵Kyaikirizibwa kuhuuha orwoya omu kisisani eki ky'ekinyamaiswa, nukwo kisobole kubaza; kandi kyaikirizibwa n'okwita abo abarukwanga kuramya ekisisani eky'ekinyamaiswa.

¹⁶Kyahambiriza boona, abato n'abakuru, abaguuda n'abanaku, ab'obugabe n'abairu, bateebweho akarorwaho ha mukono ogw'obulyo rundi ha buso,

¹⁷nukwo haleke kubaho n'omu asobora kugura n'okutunda, rundi buli aina akarorwaho ako, niryo ibara ly'ekinyamaiswa, rundi enamba y'ibara lyakyo.

¹⁸Eki kintu ky'okwetegereza: arukwetegereza ayezorre amakuru ag'enamba y'ekinyamaiswa eki, habwokuba nayo namba y'abantu. Enamba yakyo, rukaaga mu nkaaga, na mukaaga.