Read Runyoro - rutooro Kus 16 Bible Online

Kus 16 - Runyoro - rutooro bible

Kus 16

¹Nubwo nahuliire iraka erikooto eryarugire omu Nju ya Ruhanga ey'omwiguru, nirigambira bamalaika omusanju liti: “Mugende museese omunsi ebibindi musanju eby'ekiniga kya Ruhanga.”

²Malaika ow'okubanza yagenda yaseesa omunsi ebiri omu kibindi kye, abantu abakaba baina akororwaho ak'ekinyamaiswa kandi abaaramize ekisisani kyakyo baacweka ebihooya ebibi ebirukununka.

³Malaika owa kabiri yaseesa omu nyanja ebiri omu kibindi kye, enyanja yafooka nk'esagama y'omuntu afiire, kandi buli kintu ekyomeezi ekikaba kiri omu nyanja kyafa.

⁴Malaika owa kasatu yaseesa ebiri omu kibindi kye omu bisaaru n'omu maziba, byafooka sagama.

⁵Nahurra malaika anyakurolerra amaizi ago naagamba ati: “Niiwe Ahikiriire, anyakuroho kandi ayabaireho, encwa yawe enu y'obulyo.

⁶Habwokuba abantu bakaseesa esagama y'abarukwera n'abarangi, hati na Iwe obahaire esagama, niyo banywe. Niyo basemeriire!”

⁷Kandi nahurra iraka erirukuruga ha itambiro nirigamba liti: “Ego, MUKAMA Ruhanga ow'obusobozi bwona, encwa yawe y'amazima kandi y'obulyo!”

⁸Malaika owa kana yaseesa ebiri omu kibindi kye ha izooba, lyaikirizibwa okusiiriiza abantu n'ekibabu kyalyo.

⁹Abantu baasiirizibwa ekibabu eky'amaani, kandi baakondereza ibara lya Ruhanga anyakwina obusobozi ha mihito egi, bateegarukemu kandi baayanga kumuha ekitiinisa.

¹⁰Malaika owa kataano nawe yaseesa ebiri omu kibindi kye ha kitebe ky'obukama eky'ekinyamaiswa. Obukama bwakyo bwaswekwa omwirima; abantu baayeruma endimi habw'okuhururwa

¹¹baakondereza Ruhanga ow'omu iguru habw'okuhururwa oku n'ebihooya ebi bacwekere, baitu bateegarukemu ebi baakozire.

¹²Malaika owa mukaaga yaseesa ebiri omu kibindi kye ha kisaaru ekikooto Efuraate. Amaizi gaakyo gaayomera kimu, nukwo hateekanizibwe omuhanda abakama abarukuruga Burugaizooba ogu basobora kurabamu.

¹³Kandi narora emyoyo emibi esatu, erukusisana ebikere, neeruga omu kanwa k'ekijoka, omu kanwa k'ekinyamaiswa, n'omu kanwa k'omurangi ow'ebisuba.

¹⁴Egi niyo myoyo ya Sitaani enyakukora ebihuniriza, enyakugenda omu bakama ab'ensi zoona kubasorooza baije ha bulemu ha kiro kikuru ekya Ruhanga ow'obusobozi bwona.

¹⁵(“Dora, ninyija nk'omusuma! W'omugisa ogu anyakwikara naarora, akalina ebijwaro bye, nukwo aleke kugenda busa, abantu bakamurora enjuuro!”)

¹⁶Emyoyo egi yasorooleza abakama omu kiikaro ekirukwetwa omu Ruhebburaayo: Aramagedoni.

¹⁷Malaika owa musanju yaseesa omu mwanya gw'iguru ebiri omu kibindi kye. Iraka likooto lyaruga ha kitebe ky'obukama ekiri omu Nju ya Ruhanga nirigamba liti: “Kihoire!”

¹⁸Haakurataho emirabyo, okuhinda kw'amaani, okubbaruka kw'enkuba, n'omusisa gw'amaani ogutakabahoga abantu baakaba kubaho omu nsi. Omusisa ogu gukaba gw'amaani muno.

¹⁹Orubuga orukuru rwayahukanizibwa omu bicweka bisatu, n'embuga enkuru ez'amahanga zaagwa, zaahwerekerra, baitu Ruhanga ateebwe Bbabbulooni, yaijuka orubuga oruranganwa kurunywisa ekikopo kyona ekiijwire empotole ey'ekiniga kye.

²⁰Ebizinga byona byamirwa, n'ensozi zoona zaabura;

²¹kandi orubaale orw'amabaale amakooto againa obulemeezi obwa kilo makumi ataano buli limu, rwaruga omwiguru rwateera abantu, kandi baakondereza Ruhanga habw'omuhito ogw'orubaale ogwabatiinisize muno.