Read Runyoro - rutooro Kus 17 Bible Online

Kus 17 - Runyoro - rutooro bible

Kus 17

¹Nubwo omu ha bamalaika omusanju abakaba baina ebibindi musanju, yaizire yangambira ati: “Rugayo, nkwoleke omusango ogucwerirwe malaaya rurangaanwa, nurwo rubuga oruli hagati y'ebisaaru bingi.

²Nuwe ayasiihaine n'abakama b'ensi; kandi abantu abaikara omunsi baatamiizibwa obubi bw'obusiihani bwe.”

³Malaika yantwara omwirungu ndi omu Mwoyo Ahikiriire, narora omukazi aikaliire ha kinyamaiswa rugaaju, ekinyakwijwire amabara maingi agarukujuma Ruhanga, kiina emitwe musanju n'amahembe ikumi.

⁴Omukazi akaba ajwaire ekijwaro eky'erangi ya kahuukya n'erukutukura tukutuku, ayekunisize n'ezaabbu, amabaale g'omuhendo n'eruuru. Omu ngaro akwasire ekikopo kya zaabbu ekiijwire ebinugwa n'obubi obw'obusiihani bwe.

⁵Ha buso bwe hahandiikirweho ibara eritarukumanywa makuru nirigamba liti: “Babbulooni orubuga orukuru, kizaara abamalaaya n'ebinugwa eby'ensi yoona.”

⁶Kandi narora omukazi atamiire esagama ey'abantu ba Ruhanga n'ey'abakaiso abaferiire Yesu. Obu narozire omukazi ogu nkahunirra muno;

⁷nukwo malaika ogu kunkaguza ati: “Kiki ekirukukuhuniriza? Kankwatire ensita ey'omukazi ogu kandi n'ey'ekinyamaiswa eki atembere eky'emitwe musanju n'amahembe ikumi.

⁸Ekinyamaiswa eki orozire, kikaba kiroho, hati tikiroho, baitu nikiija kugaruka nikiruga omu kiina ekitaina h'okugarukira, nukwo kigende kihwerekereziibwe. Kandi abantu abaikara omunsi, ab'amabara gaabu batarahandiikirwe omu kitabu eky'obwomeezi ensi yakaaba kuhangwa, balihunirra kurora ekinyamaiswa eki, habwokuba kikaba kiroho, hati tikiroho, baitu nikiija kugaruka.

⁹“Kinu nikikengwa omuntu ow'amagezi: emitwe musanju neemanyisa ensozi musanju omukazi ezi aikaliireho;

¹⁰kandi neemanyisa abakama musanju: abataano halibo bakafa, omu aroho, kandi ondi takaizire; baitu obu aliija, aliikaraho akasumi kake.

¹¹Kandi ekinyamaiswa ekikaba kiroho, ekitaroho hati, nuwe mukama owa munaana, baitu naabalirwa omu bali omusanju kandi naija kuhwerekerezibwa.

¹²“Amahembe ikumi ag'orozire nigamanyisa abakama ikumi abatakabaire kuteera engoma, baitu nibaija kulemera hamu n'ekinyamaiswa eki kumara esaaha emu yonka.

¹³Abo bakaikirraniza, baacwa amagezi ag'okukwasa ekinyamaiswa eki amaani gaabo n'obusobozi bwabo.

¹⁴Balirwanisa Omwana gw'Entaama, baitu uwe alibasingura, habwokuba nuwe Mulemi w'abalemi kandi MUKAMA w'abakama. Kandi balisingurwa abo abali hamu nawe, nubo abaayesirwe, abaakomerwe kandi abeesigwa.”

¹⁵Malaika yagaruka yangambira ati: “Ebisaaru ebi orozire nambere malaaya aikaliire, nibimanyisa abantu ab'emiringo nyingi, ebitebe by'abantu, amahanga n'engambo nyingi.

¹⁶Kandi amahembe ikumi ag'orozire, go hamu n'ekinyamaiswa birinoba malaaya ogu, birimwehindukirra, birimutwara busa, birijunjubura omubiri gwe, birimusiiririza kimu n'omurro,

¹⁷habwokuba Ruhanga akakita omu mitima yabo okwikirraniza n'okuhikiriza entegeka ei yamutegekiire, nukwo obusobozi bwabo obw'okulema babuhe ekinyamaiswa okuhika ebigambo bya Ruhanga obu birikahikirizibwa.

¹⁸Omukazi ou orozire, nurwo rubuga orukuru orunyakulema abakama b'ensi.”