Read Runyoro - rutooro Kus 18 Bible Online

Kus 18 - Runyoro - rutooro bible

Kus 18

¹Ebi obu byahoire, narora malaika ondi naasirimuka naaruga omwiguru, aina obusobozi bwingi, kandi ensi yayangasana habw'ekitiinisa kye.

²Yayamirra n'iraka ery'amaani ati: “Rugwire Bbabbulooni orubuga rukuru! Rugwire! Rufookere bwikaro bw'emizimu, bwikaro bwa buli mwoyo mubi gwona, bwikaro obwikarwamu buli kinyonyi kyona ekirofu kandi ekirukunobwa;

³habwokuba amahanga goona gatamiire obubi bw'obusiihani bwarwo, kandi abakama ab'ensi basiihaine narwo, n'abasuubuzi ab'ensi baguudahaire habw'itungo erirugire omu rwanju rwarwo.”

⁴Nubwo nahuliire iraka erindi erirukuruga omwiguru nirigamba liti: “Inywe, bantu bange, muturuke muruge omu rubuga oru, timwikara kwetaba omu bibi byarwo, mukabagana ha mihito yarwo.

⁵Ebibi byarwo bituumire kuhika ha iguru, kandi Ruhanga aijukire obubi bwarwo.

⁶Murukole nkooku rwakozire abandi, kandi mururongoole kabiri habw'ebi rwakozire, ekikopo ky'amarwa ag'empotole aga rwabanywisize, inywe murugarurremu kabiri.

⁷Nkooku rwayenyumiize rwonka kandi rwagira orwanju, na inywe nukwo murusaalize kandi murutuntuze muti. Noobu ruraaba nirugamba omu mutima gwarwo ruti: ‘Nyikaliire nk'Omugo, tindi mufakaati, obujune tibulimpikaho’,

⁸baitu kiro kimu emihito yarwo eriruhikaho: orufu, okuganya na kiihe, kandi rulyokebwa omurro; habwokuba MUKAMA Ruhanga ow'obusobozi bwona nuwe arukurucwera omusango.”

⁹Abakama ab'ensi abaasiihaine kandi abaayanjukire narwo, balirulirirra kandi baruterre empamo obu balirora omwika gwarwo nigucuuka.

¹⁰Balyemerra hara, nibatiina kururora nirubonabonesibwa, kandi baligamba bati: “Ai bambi! Ai Bambi! Iwe rubuga orukuru! Iwe Bbabbulooni orubuga orw'amaani! Ekifubiro kyakuhikaho omu saaha emu yonka.”

¹¹Abasuubuzi ab'omunsi nibarulirirra kandi nibarugaragarra, habwokuba busaho n'omu akyayongera kubaguraho bintu byabo:

¹²zaabbu, efeeza, amabaale g'omuhendo n'eruuru; bafuta enungi eya kahuukya, engoye eza liiri n'ezirukutukura; n'emiti yoona erukuboya kurungi; ebintu byona ebyakozirwe omu masanga, byona ebyabaizirwe omu miti ey'omuhendo, omu mulinga ogw'omuherre, ekyoma ekigumire n'amabaale agarukwangasana;

¹³eby'okuboyesa ebyokulya, ebirungo, eseeta, omugaju, emyamirro, amarwa, amagita, ensaano enungi n'engano; ente n'entaama; embaraasi n'ebigaali byazo, hamu n'abairu rubaale--nukwo kiti nambere abantu bahingisibwamu ebintu.

¹⁴“Amagoba omwoyo gwawe aga gwayegombere, gakurugireho, kandi byona ebi wayekunisaaga hamu n'ekitiinisa kyawe obifeerirwe, toligaruka kubirora!”

¹⁵Abasuubuzi ab'ebintu ebi, abaaguudahaziibwe itungo ery'orubuga oru, balyemerra hara, nibatiina kururora nirubonabonesibwa, nibaganya kandi nibarra bati:

¹⁶“Ai bambi! Ai bambi! Orubuga orukuru, orwajwaraga bafuta enungi, ey'erangi kahuukya n'erukutukura, orwatonerwe n'ezaabbu, amabaale ag'omuhendo n'eruuru!

¹⁷Obuguuda obu bwona buhwerekereziibwe omu saaha emu yonka.” Kandi bakama b'emeeri, n'abo abagenderamu, abalimba n'abo abanyakusuburra ha nyanja baayema hara,

¹⁸nibaborooga muno obu baarozire omwika gwarwo nigucuuka, bayekaguza bati: “Rubuga ki orwainganaga orubuga runu orukuru?”

¹⁹Baayeseesa ecuucu ha mitwe. Obu, nibaganya, nibarra kandi nibeesaalinga bati: “Ai bambi! Ai bambi! Orubuga orukuru, orwaguudahaize boona abakaba baina emeeri ha nyanja! Ruhwerekereziibwe omu saaha emu.

²⁰Iwe iguru, inywe abahikiriire, abakwenda n'abarangi murwebugire, habwokuba Ruhanga arusingisize omusango habwanyu!”

²¹Nubwo malaika ow'amaani yakomere ibaale erirukwingana orubengo orukooto, yalihungura omu nyanja naagamba ati: “Bbabbulooni orubuga orukuru nukwo rulinagwa hansi n'amaani ruti, kandi tiruligaruka kuzooka.

²² Amaraka g'abateezi b'endongo n'ag'abazini, ag'abateezi b'enseegu hamu n'ag'abateezi b'engwara, tigaligaruka kuhulirwa omuli iwe; kandi omukozi w'omulimo gwona taligaruka kuzooka omuli iwe; n'iraka ery'orubengo tiririgaruka kuhulirwa omuli iwe.

²³Kandi ekyererezi eky'etaara tikirigaruka kwakira omuli iwe. Iraka erya kigabura n'erya kigabuka tiririgaruka kuhulirwa omuli iwe. Mazimakwo abasuubuzi bawe bakaba bali bantu barangaanwa omunsi, habwokuba amahanga goona okagabiihabiiha n'oburogo bwawe.

²⁴Kandi omu rubuga oru hakaba haseesekeremu esagama ey'abarangi n'abahikiriire, n'eya boona abaisirwe omunsi.”