Read Runyoro - rutooro Kus 19 Bible Online

Kus 19 - Runyoro - rutooro bible

Kus 19

¹Ebi obu byahoire, nahurra iraka likooto erirukusisana ery'ekitebe ky'abantu baingi abali omwiguru nibazina bati: “Haleluya! [4] Okujuna, ekitiinisa n'obusobozi, byona bya Ruhanga waitu.

²Habwokuba encwa ye y'amazima kandi y'obulyo. Malaaya rurangaanwa ayasiisire ensi n'obusiihani bwe amusingisize omusango kandi amuhoire enzigu habw'esagama y'abaheereza be.”

³Baayongera baayamirra bati: “Haleluya! Omwika ogurukuruga omu rubuga oru guraikaraga nigucuuka ebiro byona.”

⁴Kandi abakuru amakumi abiri na bbana, hamu n'ebihangwa ebbina ebyomeezi baajuumara hansi, baaramya Ruhanga anyakwikaliire ha kitebe eky'obukama nibagamba bati: “Nukwo kibe kiti. Haleluya!”

⁵Kandi iraka lyaruga ha kitebe ky'obukama niryamirra liti: “Muhaisanize Ruhanga waitu, inywe inywena abaheereza be, inywe abamutiina abato n'abakuru!”

⁶Nubwo nahuliire iraka erirukusisana ery'ekitebe ky'abantu baingi, erirukuhirra nk'amaizi amaingi kandi erirukuhinda nk'okubbaruka kw'enkuba z'amaani niritoka liti: “Haleluya! MUKAMA Ruhanga waitu ow'obusobozi bwona ahangiriize.

⁷Katusemererwe, tukyanganuke kandi tumukugize, habwokuba obugenyi bw'obugole obw'Omwana gw'Entaama buhikire, kandi Omugole we ayeteekaniize;

⁸akaikirizibwa kujwara bafuta erukunekaneka, erukwera kandi esemiire” habwokuba bafuta erukunekaneka neemanyisa ebikorwa ebirungi eby'abahikiriire.

⁹Malaika yangambira ati: “Handiika oti: B'omugisa abaraliziibwe ha kiihuro ky'obugenyi bw'obugole obw'Omwana gw'Entaama.” Malaika yayongera ati: “Ebi nibyo bigambo bya Ruhanga ebya mazima.”

¹⁰Aho najuumara ha bigere bye kumuramya, baitu yantanga ati: “Otakisura! Nyowe ndi muheereza nka iwe, kandi nk'abagenzi bawe abagumya ebya Yesu. Ramya Ruhanga.” Habwokuba ekisembo kyona eky'okuranga kisigikira ha bwakaiso Yesu obu yahaire.

¹¹Nubwo narozire iguru likingwirwe, haazookayo embaraasi rweru! Ogu ow'akaba agitembere, naayetwa Mwesigwa kandi Mazima, nuwe acwa emisango omu bulyo kandi arwana obulemu omu bwinganiza.

¹²Amaiso ge nigasisana endimi z'omurro, ha mutwe gwe ajwaire ekondo nyingi, kandi hahandiikirweho ibara eritarukumanywa muntu n'omu kwihaho uwe wenka.

¹³Ajwaire ekanzu enyakwibikirwe omu sagama, kandi ibara eri bamweta niryo Kigambo kya Ruhanga.

¹⁴Ab'amahe ag'omwiguru baamuhondera batembere embaraasi nyingi rweru, bajwaire bafuta erukunekaneka, erukwera kandi esemiire.

¹⁵Omu kanwa ke haarugamu empirima enyakutoire ey'okutemesa amahanga, kandi aligalemesa omwigo ogw'ekyoma; abanyanzigwa be alibarubatirirra omu ndeeba ey'ekiniga kya Ruhanga ow'obusobozi bwona.

¹⁶Ha kanzu ye na ha mpirima ye hahandiikirweho ibara: MUKAMA w'abakama kandi Mulemi w'abalemi.

¹⁷Aho narora malaika ayemeriire omu izooba, yayeta n'iraka likooto enyonyi zoona eziharruka haiguru omu burangasa ati: “Mwije mwesorooze ha kiihuro ekikuru kya Ruhanga!

¹⁸Mwije mulye enyama ey'abakama, ey'engabwa ez'amahe, n'ey'emanzi: enyama ey'embaraasi n'abatembi baazo, n'ey'abantu boona, ab'obugabe n'abairu, abato n'abakuru!”

¹⁹Narora ekinyamaiswa eki, n'abakama ab'ensi, n'amahe gaabu ageesoroize kurwanisa Ogu anyakwikaliire ha mbaraasi n'okurwanisa ihe rye.

²⁰Ekinyamaiswa kyahambwa hamu n'omurangi ow'ebisuba ayakozire ebihuniriza omumaiso gaakyo. (Ebihuniriza ebyahabisize abo abatairweho akarorwaho k'ekinyamaiswa n'abo abaaramize ekisisani kyakyo.) Ekinyamaiswa n'omurangi ow'ebisuba byanagwa omu nyanja y'omurro erukwaka n'obuganga bikyali byomeezi.

²¹Abaasigaireho bakaitwa empirima y'Ogu anyakwikarra ha mbaraasi, niyo mpirima enyakuruga omu kanwa ke; amahungu goona gaalya gaaniha emitumbi yabo.