Read Runyoro - rutooro Kus 2 Bible Online

Kus 2 - Runyoro - rutooro bible

Kus 2

¹“Handiikira malaika ow'ekitebe eky'abaikiriza ab'Efeeso noogamba oti: Binu nibyo bigambo by'Ogu anyakukwasire enyunyuuzi musanju omu mukono gwe gw'obulyo, kandi anyakugendera hagati y'ebikondo musanju ebya zaabbu. Naagira ati:

²“Nyowe mmanyire ebikorwa byawe, okwekamba kwawe, n'okugumiisiriza kwawe; kandi mmanyire nkooku otasobora kugumiisiriza ababi, baitu okutegereza abo abanyakweyeta bakwenda kunu tibalibo kwo, wasanga bali b'ebisuba.

³Mmanyire nkooku orukugumiisiriza muno, nooyemera bingi habwange kandi tojwaha.

⁴Baitu eki ndukukujunaana nkinu: tokyaina engonzi ezi okaba oinazo okubanza.

⁵Nukwo nu, ijuka ha warugiriire kugwa; oyegarukemu, okole ebi wakoraga okubanza. Obu otaakole oti, ndikuhikaho, ekikondo ky'etaara yawe nkiihe omu kiikaro kyakyo, rundi buli oyegarukiremu.

⁶Ekirungi eki ndukukusiimaho nkinu: noonoba ebikorwa by'ekitebe ky'Abanikola [2]

⁷Anyakwina okutu, ahurre Mwoyo ebi arukugambira ebitebe ky'abaikiriza. Anyakusingura ndimwikiriza kulya ha muti ogw'obwomeezi ogunyakuli omunsi ya Ruhanga ey'okuhiirwa.”

⁸“Kandi handiikira malaika ow'ekitebe eky'abaikiriza ekiri Sumiruna noogamba oti: Binu nibyo bigambo by'ow'okubanza kandi owa ha mpero, ayafiire kandi yahumbuuka. Naagira ati:

⁹“Mmanyire omuhito gwawe n'obunaku bwawe (kunu oli muguuda); kandi mmanyire ebihangirro by'abo abeeyeta Bayudaaya, kunu tibalibo kwo, baitu isorrokaniro lya Sitaani.

¹⁰Otatiina ebi orukwija kubonabona. Hurra nu, Omwohi amaliriire kuta omu nkomo abamu omuli inywe, nukwo mulengesibwe. Nimwija kumara ebiro ikumi nimubonesibwa. Mugume okuhika ha kufa, nubwo na nyowe ndibaha ekondo ey'obwomeezi.

¹¹Ogu anyakwina okutu, ahurre Mwoyo ebi arukugambira ebitebe by'abaikiriza. Anyakusingura, okufa okwa kabiri tikwina eki kulimukoraho.”

¹²“Kandi handiikira malaika ow'ekitebe eky'abaikiriza ekiri Perugamo noogamba oti: Binu nibyo bigambo by'Ogu anyakwina empirima enyakutoire ey'amoogi abiri. Naagira ati:

¹³“Mmanyire h'oikara, oku nuho hali ekitebe eky'obukama bwa Sitaani; baitu iwe okyagumiire ha ibara lyange kandi oteehooge nkooku orukunyikiriza, noobu haakubaire omu biro by'Antipa, kaiso wange omwesigwa, ayaitiirwe owaanyu oku nambere Sitaani aikara.

¹⁴Baitu nyina ebigambo bike ebi ndukubajunaana: oku mwinayo abantu abamu abarukwikiriza enyegesa za Balaamu ayahabwire Balaki kwesiitaaza abaana ba Isirairi, nukwo balye ebyokulya ebihongiirwe abacwezi kandi beemarre ha busiihani.

¹⁵Kandi mwina n'abamu abarukuhondera enyegesa ez'Abanikola.

¹⁶Hati nu mwegarukemu. Kakuba muteegarukamu, ninyija kubahikaho bwango, abo boona mbarwanise n'empirima ey'akanwa kange.

¹⁷“Anyakwina okutu, ahurre Mwoyo ebi arukugambira ebitebe by'abaikiriza. Anyakusingura, ndimuha byokulya ebiserekerwe, niyo maanu;[3] kandi ndimuha ibaale erirukwera erihandiikirweho ibara erihyaka eritamanyirwe muntu n'omu, okwihaho ogu anyakulirukirwe.”

¹⁸“Handiikira malaika ow'ekitebe eky'abaikiriza ekiri Tiyatiira noogamba oti: Binu nibyo bigambo by'Omwana wa Ruhanga, anyakwina amaiso agarukwaka nk'endimi z'omurro, kandi ebigere ebirukusisana omulinga oguzigwire. Naagira ati:

¹⁹“Mmanyire ebikorwa byawe, engonzi zawe, okwikiriza kwawe, obuheereza n'okugumiisiriza kwawe; kandi nimmanya ebikorwa ebi orukukora hati nkooku birukukira ebyabandize.

²⁰Baitu kinu nikyo ndukukujunaana: n'okyaikiriza omukazi ogu Yezabeeli, arukweyeta murangikati, nuwe ahabisa abaheereza bange kandi naabeegesa kwemarra ha busiihani n'okulya ebihongiirwe embandwa.

²¹Nkamuha akasumi ak'okwegarukamu, baitu akanga kuleka obusiihani bwe.

²²Hati nu ninyija kumuleetera endwara emuzingike, kandi abo abasiihana nawe ndibaleetera emihito nyingi, rundi buli balekere ebi arukukora;

²³kandi n'abaana be ndibaita. Nukwo ebitebe byona eby'abaikiriza bimanye nkooku ali nyowe arukwetegereza ebiteekerezo n'emitima; kandi buli omu omuli inywe ndimuha ebisemeriire ebikorwa bye.

²⁴“Baitu abandi abasigaireho, inywe abali Tiyatiira abatarukuhondera nyegesa egi, abatakeegere abandi eri beeta ifubo lya Sitaani, nyowe nimbagambira nti: Tindukwija kubongeraho bulemeezi obundi.

²⁵Kyonka mugumize kimu eki mwinakyo okuhika obu ndiija.

²⁶Ow'aliba asingwire kandi ahikiriize ebi ndukwenda okuhika ha mpero, ndimuha obusobozi obw'okulema amahanga,

²⁷nyowe nkooku naabuhairwe Isenyowe. Aligalemesa omwigo ogw'ekyoma, agasasangule nk'omubumbi oku asasangura ebinaga.

²⁸Kandi ndimuha enyunyuuzi ey'omu rukyakya (nuwe Kristo).

²⁹Anyakwina okutu, ahurre Mwoyo ebi arukugambira ebitebe by'abaikiriza.”