Read Runyoro - rutooro Kus 21 Bible Online

Kus 21 - Runyoro - rutooro bible

Kus 21

¹Nubwo narozire iguru erihyaka n'ensi empyaka. Habwokuba iguru ery'okubanza n'ensi ey'okubanza bikaba bihoireho, kandi enyanja ekaba etakyaroho.

²Narora orubuga orurukwera, Yerusaalemu oruhyaka, nirusirimuka niruruga omwiguru hali Ruhanga, ruteekaniziibwe nk'omugole ou bakunisiize iba.

³Kandi nahurra iraka likooto niriruga ha kitebe ky'obukama nirigamba liti: “Hati mumanye Ruhanga nkooku aikara n'abantu be. Aliikara nabo, babe bantu be, nawe wenka aliikara omulibo.

⁴Alibasusura amaizi goona ag'omu maiso gabo. Orufu tiruligaruka kubaho, noobu kwakuba okuganya, rundi okurra, rundi obusaasi. Habwokuba ebintu ebya kara biriba bihoireho.”

⁵Ogu ow'akaba asingire ha kitebe eky'obukama yagamba ati: “Hati ebintu byona nimbifoora bihyaka!” Yayongera yagamba ati: “Handiika binu, habwokuba binu bigambo by'okwesiga kandi by'amazima.”

⁶Nubwo yangambiire ati: “Byona bihikiriziibwe! Ninyowe Alufa na Omega, amakuru gaabyo: Entandiko kandi Empero. Weena anyakukwatwa iroho ndimuha amaizi agatali g'okugura, agarukuruga omu iziba ery'amaizi ag'obwomeezi.

⁷Weena anyakusingura, bunu nubwo buliba bugwetwa bwe: Ndiba Ruhanga we, kandi uwe aliba mwana wange.

⁸Baitu abatiini, abataikiriza, abanugwa, abaisi b'abantu, abasiihani, abarogo, abaramya abacwezi n'abanyabisuba boona, omugabo gwabo eriba enyanja erukwaka omurro n'obuganga. Nukwo okufa okwa kabiri.”

⁹Nubwo haizire omu ha baamalaika omusanju, abakaba baina ebibindi musanju ebiijwire emihito musanju eya ha mpero, yangambira ati: “Ija, nkwoleke Omugole, omukazi w'Omwana gw'Entaama.”

¹⁰Yantwara ha rusozi orukooto kandi oruraihire ntemberwe Mwoyo Ahikiriire, yanyoleka orubuga orurukwera, Yerusaalemu, nirusirimuka niruruga omwiguru hali Ruhanga,

¹¹rwina ekitiinisa kya Ruhanga. Okwangasana kwarwo nikusisana ibaale ery'omuhendo omukooto, nirusisana ibaale yasipi, nirwengengeta nka ibaale kristalo.

¹²Rukaba rwehinguliriziibwe ekigo ekikooto kandi ekiraihire. Kiina amalembo ikumi n'abiri, ha malembo ago haroho bamalaika ikumi na babiri; kandi na ha malembo hahandiikirweho amabara ag'enganda ikumi na ibiri ez'Abaisirairi.

¹³Ha Burugaizooba amalembo asatu, bukiizi bw'emoso amalembo asatu, bukiizi bw'obulyo amalembo asatu, na Bugwa-izooba amalembo asatu.

¹⁴Ekigo ky'orubuga oru kikaba kiina amabaale g'omusingi ikumi n'abiri agahandiikirweho amabara ikumi n'abiri ag'abakwenda ikumi na babiri ab'Omwana gw'Entaama.

¹⁵Malaika ayabalize na nyowe, akaba aina orubango orwa zaabbu orw'okulengesa orubuga, amalembo gaarwo n'ebisiika byarwo.

¹⁶Orubuga oru rukaba rwina embaju ina ezirukwingana, obura bwarwo bwainganaga n'obugazi bwarwo. Orubuga yarulengesa orubango, rwahikya kilomita enkumi ibiri n'ebbina; obura, obugazi n'obwemi bwarwo nibwingana.

¹⁷Malaika yayongera yalenga ekisiika kyarwo, kyahikya mita nkaaga oburaiha, abantu nkooku baalenga.

¹⁸Ekisiika kikombekwa na mabaale g'omuhendo agarukwetwa yasipi, baitu orubuga rukombekwa na zaabbu yonyini, erukumuliikana nk'ekirahule.

¹⁹Emisingi ey'ekisiika ky'orubuga ekaba etonerwe n'amabaale ag'omuhendo aga buli mulingo. Omulingo ogw'okubanza, niryo ibaale yasipi, erya kabiri saafiro, erya kasatu kalukeedoni, erya kana simaragido,

²⁰erya kataano sarudoni, erya mukaaga saarudiyo, erya musanju kirisoolito, erya munaana beerilo, erya mwenda topaazi, erya ikumi krisoopuraso, erya ikumi na limu yasinto, erya ikumi n'abiri ametisito.

²¹Amalembo ikumi n'abiri, nugo amabaale ag'eruuru ikumi n'ibiri, buli irembo lyombekerwe n'eruuru emu yonka; kandi ikuute ery'orubuga likaba likozirwe na zaabbu yonyini, erukumuliikana nk'ekirahule.

²²Omu rubuga oru ntarolemu Nju ya Ruhanga, habwokuba MUKAMA Ruhanga ow'obusobozi bwona n'Omwana gw'Entaama nubo Nju ya Ruhanga y'orubuga oru.

²³Kandi orubuga oru tirurukwetaaga izooba rundi okwezi eby'okurujwera, habwokuba ekitiinisa kya Ruhanga nikyo kyererezi kyarwo kandi Omwana gw'Entaama niyo taara yarwo.

²⁴Amahanga galigendera omu kyererezi kyarwo; kandi abakama b'ensi baliruleetamu ekitiinisa kyabo.

²⁵Amalembo gaarwo tigalikingwa nyamusana omurundi na gumu; kandi oku, obwire tibwairege.

²⁶Baliruleetamu ekitiinisa ky'amahanga n'itungo lyago.

²⁷Baitu ekintu kyona ekitasemiire tikirirutaahamu, noobwakubaire omuntu weena anyakukora ekirukunugwa rundi eby'obugobya; baitu halitaahamu abo bonka abaahandiikirwe omu kitabu eky'obwomeezi eky'Omwana gw'Entaama.