Read Runyoro - rutooro Kus 22 Bible Online

Kus 22 - Runyoro - rutooro bible

Kus 22

¹Nubwo malaika yanyolekere ekisaaru eky'amaizi ag'obwomeezi, ekirukwangasana nk'ibaale kristaalo, ekirukugera nikiruga ha kitebe ky'obukama ekya Ruhanga n'eky'Omwana gw'Entaama,

²nikiraba hagati y'ikuute ery'orubuga orukuru. Ha buli rubaju orw'ekisaaru hakaba haliyo emiti y'obwomeezi enyakwina ebijuma byayo by'emiringo ikumi n'ebiri, enyakwana ebijuma buli kwezi; kandi ebikoora byayo bikaba biri by'okutambira abantu ab'amahanga.

³Omu rubuga oru tihaligaruka kuzookamu kintu kyona ekikyenerwe, baitu haraikaramuga ekitebe ky'obukama ekya Ruhanga n'eky'Omwana gw'Entaama, kandi abaheereza be balimuramya.

⁴Balirora amaiso ge, kandi ibara lye liriba ha buso bwabo.

⁵Obwire tibuligaruka kwira; tibalyetaaga kererezi ky'etaara rundi izooba, habwokuba MUKAMA Ruhanga nuwe araabamulikiraga kandi balirema ebiro byona.

⁶Hanyuma malaika yangambira ati: “Ebigambo binu by'okwesiga kandi by'amazima. MUKAMA Ruhanga anyakuha abarangi omwoyo ogw'okuranga, atumire malaika we ayoleke abaheereza be ebiri haihi kubaho.”

⁷Kandi Yesu yagamba ati: “Hati nu, ndi haihi kwija. W'omugisa ogu arukukwata ebigambo ebyarangirwe ebiri omu kitabu kinu.”

⁸Nyowe Yohaana, ninyowe ayahuliire kandi ayarozire ebintu ebi. Obu nabihuliire kandi mbirozire, najuumara ha bigere bya malaika ayabinyolekere kumuramya;

⁹baitu yantanga ati: “Otakisura! Nyowe ndi muheereza nka iwe kandi nka bagenzi bawe abarangi, kandi nk'abo abakwata ebigambo ebiri omu kitabu kinu. Ramya Ruhanga!”

¹⁰Kandi yanteererra ati: “Ebigambo ebyarangirwe ebiri omu kitabu kinu otabiculerra, habwokuba akasumi kabyo kali haihi kuhika.

¹¹Arukukora kubi, leka akole kubi, arukusiisa, leka asiise; arukukora ebihikire, leka abikole; kandi arukwera, ayeyongere omu burukwera.”

¹²Yesu yagamba ati: “Dora ndi haihi kwija. Nyina empeera ey'okusasura buli omu habw'ebi yakozire.

¹³Ninyowe Alufa na Omega, amakuru gaakyo: Ow'okubanza kandi Nw'okumalirra, Entandiko kandi Empero.”

¹⁴B'omugisa abo aboogya ebijwaro byabu bakabyeza, nukwo baikirizibwe kulya ha bijuma by'emiti y'obwomeezi n'okutaaha orubuga orukuru nibaleetwa omu malembo.

¹⁵Aheeru yarwo haikarayo embwa, abarogo, abasiihani, abaisi b'abantu, abaramya abacwezi na boona abagonza kandi abaikaliza eby'obugobya.

¹⁶“Nyowe Yesu, nkutumiire malaika wange akumanyise binu, nukwo bigasire ebitebe by'abaikiriza. Ninyowe kikoro kandi mwijukuru ow'oruganda rwa Daudi, enyunyuuzi erukwangasana ey'omu rukyakya.”

¹⁷Mwoyo Ahikiriire n'Omugole nibagamba bati: “Rugayo.” Kandi weena arukuhurra, leka agambe ati: “Rugayo.” Kandi wena anyakukwasirwe iroho, leka aije; na weena arukwetaaga, leka anywe amaizi ag'obwomeezi agatarukugurwa.

¹⁸Nyowe Yohaana, nimpabura weena arukuhurra ebigambo ebyarangirwe ebiri omu kitabu kinu: Kakuba omuntu abyongeraho, Ruhanga alimwongeraho emihito enyakusoboroirwe omu kitabu kinu.

¹⁹Kandi omuntu kakuba abikeehyaho, Ruhanga talimwikiriza kuhika ha muti ogw'obwomeezi n'omu rubuga orurukwera, ebisoboroirwe omu kitabu kinu.

²⁰Ogu arukugumya binu naagamba ati: “Mazimakwo ndi haihi kwija.” Nukwo kibe! Ija MUKAMA Yesu!

²¹Embabazi za MUKAMA Yesu ziikale n'abantu be boona. Amiina.