Read Runyoro - rutooro Kus 3 Bible Online

Kus 3 - Runyoro - rutooro bible

Kus 3

¹“Handiikira malaika ow'ekitebe eky'abaikiriza ekiri Saadisi noogamba oti: Binu nibyo bigambo by'Ogu anyakwina emyoyo musanju eya Ruhanga n'enyunyuuzi musanju. Naagira ati: “Mmanyire ebikorwa byawe, oyetwa mwomeezi kandi kunu ofiire!

²Sisiimuka, ogumye ebi okyasigaize, biri haihi kuhwaho; habwokuba nindora ebikorwa byawe nkooku bitarukuhika omu maiso ga Ruhanga wange.

³Hati nu oijuke ebi wahairwe n'ebi wahuliire; nibyo ogumye, kandi oyegarukemu. Obu otasisiimuke ndiija nk'omusuma, kandi tolimanya kasumi aka ndikuhikiraho.

⁴Omu Saadisi okyainamu abake abatarasiisire bijwaro byabo. Baligenda na nyowe bajwaire ebirukwera, habwokuba bakisemeriire.

⁵Ogu anyakusingura, nukwo alijwara ati ebijwaro ebirukwera, kandi ibara lye tindiriragaza omu kitabu eky'obwomeezi; baitu ndimuranga omumaiso ga Isenyowe n'ag'obwomeezi; baitu ndimuranga omumaiso ga Isenyowe n'ag'abamalaika be.

⁶Anyakwina okutu, ahurre Mwoyo ebi arukugambira ebitebe eby'abaikiriza.”

⁷“Handiikira malaika ow'ekitebe eky'abaikiriza ekiri Filadelufiya noogamba oti: Binu nibyo bigambo by'Ogu Ahikiriire, ow'amazima kandi anyakwina ekisumuruzo kya Daudi. Nuwe ogu anyakukingura hatarukubaho n'omu anyakukinga; kandi anyakukinga hatarukubaho n'omu anyakukingura. Naagira ati:

⁸“Mmanyire ebikorwa byawe. Dora ntaire omu maiso gaawe orwigi orukingwirwe, orutasobora kukingwa muntu n'omu. Mmanyire nkooku oina amaani make, baitu nabwo okakwata ekigambo kyange kandi otanyehooge.

⁹Ab'omu isorrokaniro lya Sitaani, abeeyeta Bayudaaya kunu tibalibo kwo, nibabiiha kwonka--ndabahambiriza baije bagwe ha bigere byawe, nukwo bamanye nkooku nakugondeze.

¹⁰Habwokuba okakwata ekigambo kyange ekirukuhabura kiti: Gumiisiriza; nikyo na nyowe ndikulindira omu kasumi ak'okwohebwa okuliizira ensi yoona, okulenga abo abarukwikara omunsi.

¹¹Ninyija bwango; gumiza kimu eki oinakyo, tihaikara kubaho akunyagaho ekondo yawe.

¹²Ogu anyakusingura, ndimufoora nyomyo omunju ya Ruhanga wange, taligirugamu naakake. Ndimuhandiikaho ibara lya Ruhanga wange n'ibara ly'orubuga rwa Ruhanga wange nurwo Yerusaalemu oruhyaka orusirimuka niruruga omw'iguru mba Ruhanga wange Mmuhandiikeho n'ibara lyange erihyaka.

¹³Anyakwina okutu, ahurre Mwoyo ebi arukugambira ebitebe eby'abaikiriza.”

¹⁴“Handiikira malaika ow'ekitebe eky'abaikiriza ekiri Laodikeya noogamba oti: ‘Binu nibyo bigambo by'Ogu arukwetwa “Kibekwo”, kaiso omwesigwa kandi ow'amazima, endugirro ya byona Ruhanga ebi yahangire. Naagira ati:

¹⁵“‘Mmanyire ebikorwa byawe: torukufuka kandi torukwokya. Haakire waakufukire rundi waakwokeze!

¹⁶Baitu habw'okusangwa oli kooyakooya, torukufuka kandi torukwokya, ninyija kukutanaka, onduge omu kanwa!

¹⁷Ningira niiwe arukugamba oti: Ndi muguuda, ebintu nibinyizira kurungi, tinyina eki ndukwetaaga; kandi kunu torukumanya nkooku oli munaku, w'okuganyirwa, museege, kihimbaara, kandi noogenda busa.

¹⁸Nahabweki ninkuhabura: onguleho zaabbu enyakusemeziibwe omurro, nukwo obe muguuda. Onguleho n'ebijwaro ebirukwera, bikuswekerre, bikwiheho ensoni ez'okurorwa noogenda busa; kandi onguleho omubazi ogw'okuta omumaiso, nukwo orole.

¹⁹Abo aba ngonza, mbahana kandi mbafubira; nahabweki wekambe kandi oyegarukemu.

²⁰Hurra nu, nyemeriire ha rwigi ninyeranga; omuntu weena obu ahurra iraka lyange akakingura orwigi, ninyija kutaahamu, mmuhikeho, nukwo tulye hamu.

²¹Ogu anyakusingura, ndimwikiriza aikarre na nyowe ha kitebe kyange eky'obukama, nka nyowe oku nasingwire, naikarra na Isenyowe ha kitebe kye eky'obukama.

²²Anyakwina okutu, ahurre Mwoyo ebi arukugambira ebitebe eby'abaikiriza.’”