Read Runyoro - rutooro Kus 5 Bible Online

Kus 5 - Runyoro - rutooro bible

Kus 5

¹Omu mukono ogw'obulyo gw'Ogu anyakusingire ha kitebe ky'obukama, nkaroramu omuzingo gw'ekitabu oguhandiikirwe embaju zombi, oguboherwe emanyiikirizo musanju;

²kandi narora malaika ow'amaani naarangirra n'iraka likooto ati: “Nooha asemeriire kwanjurra omuzingo n'okucwa emanyiikirizo zagwo?”

³Baitu hatabeho n'omu omwiguru, rundi omunsi, rundi okuzimu ayasoboire kwanjurra omuzingo n'okugusoma.

⁴Na nyowe nkarra muno habw'okuburwaho n'omu ow'akaba asemeriire kwanjurra omuzingo n'okugusoma.

⁵Nubwo omu ha bakuru yangambiire ati: “Leka kurra; orole Entale ey'orunganda rwa Yuda, Ekikoro kya Daudi, asingwire. Nahabweki uwe asobora kwanjurra omuzingo n'okubambura emanyiikirizo zagwo musanju.”

⁶Hagati y'ekitebe ky'obukama n'ebihangwa bbina ebyomeezi, n'omu bakuru abo hagati, nkarora Omwana gw'Entaama ayemeriire, naasisana nk'anyakutambirwe, aina amahembe musanju n'amaiso musanju, agarukumanyisa emyoyo musanju Ruhanga ei yatumire omunsi yoona.

⁷Yagenda yaiha omuzingo omu mukono ogw'obulyo ogw'Ogu ow'akaba asingire ha kitebe ky'obukama.

⁸Obu yamazire kutwara omuzingo, ebihangwa ebbina ebyomeezi n'abakuru amakumi abiri na bbana baajuumara omumaiso g'Omwana gw'entaama, buli omu akwasire endongo n'ebibindi bya zaabbu ebiijwire omugaju, nubwo bumanyisa okusaba kw'abahikiriire.

⁹Baazina ekizina ekihyaka nibagamba bati: “Niiwe osemeriire kutwara omuzingo n'okubambura emanyiikirizo zagwo, habwokuba okaitwa, wacungurra Ruhanga abantu n'okufa kwawe, noobaiha omu buli ruganda, buli ngambo, omu bantu boona n'omu mahanga goona.

¹⁰Wabafoora bukama kandi banyakatagara ba Ruhanga waitu, nubo balirema omunsi.”

¹¹Omu kubonekerwa kwange nahurra amaraka ga bamalaika baingi batarukusobora kubarwa, beehinguliriize ekitebe ky'obukama, n'ebihangwa ebyomeezi, n'abakuru abo.

¹²Boona nibagamba n'iraka likooto bati: “Mwana gw'Entaama ayatambirwe asemeriire kuheebwa obusobozi, obuguuda, amagezi, amaani, okunyumizibwa, ekitiinisa n'okukugizibwa!”

¹³Kandi nkahurra ebihangwa byona ebiri omwiguru, omunsi, okuzimu, n'omu nyanja na byona ebinyakugirumu nibigamba biti: “Ogu anyakusingire ha kitebe ky'obukama, hamu n'Omwana gw'Entaama, bakugizibwe, banyumizibwe, baheebwe ekitiinisa n'obusobozi ebiro n'ebiro!”

¹⁴Kandi ebihangwa ebbina ebyomeezi byagamba biti: “Nukwo kibe kiti!” Abakuru baajuumara ha nsi, baaramya.