Read Runyoro - rutooro Kus 6 Bible Online

Kus 6 - Runyoro - rutooro bible

Kus 6

¹Nubwo narozire Omwana gw'Entaama naabambura emanyiikirizo ey'okubanza ha manyikirizo musanju, kandi nahurra ekimu ha bihangwa ebbina ebyomeezi nikigamba n'iraka nk'ery'okuhinda kw'enkuba kiti: “Rugayo!”

²Narora embaraasi rweru, etemberwe omuntu akwasire obuta; yaheebwa ekondo, yaramaga kusingura kandi yasingurra kimu.

³Omwana gw'Entaama obu yabambwire emanyiikirizo eya kabiri, nahurra ekihangwa ekyomeezi ekya kabiri nikigamba kiti: “Rugayo!”

⁴Haarugayo embaraasi endi rugaaju. Ow'akaba agitembere yaikirizibwa kwiha obusinge omunsi, nukwo abantu baitangane; kandi yaheebwa empirima enkooto.

⁵Omwana gw'Entaama obu yabambwire emanyiikirizo eya kasatu, nahurra ekihangwa ekyomeezi ekya kasatu nikigamba kiti: “Rugayo!” Narora embaraasi rwozi. Ow'akaba agitembere akwasire minzaani omu ngaro ze;

⁶nahurra ekirukusisana iraka niryema hagati y'ebihangwa bbina abyomeezi, nirigamba liti: “Endengo ey'engano erukwera ebe mpeera y'ekiro kimu; baitu amagita n'amarwa obikwate mpora!”

⁷Omwana gw'Entaama obu yabambwire emanyiikirizo eya kana, nahurra iraka ery'ekihangwa ekyomeezi ekya kana nirigamba liti: “Rugayo!”

⁸Narora embaraasi rubuubi. Ow'akaba agitembere, ibara lye nuwe Rufu, kandi Kuzimu emuhondiire; byaheebwa obusobozi ha kimu kya kana eky'ensi, okukiisa empirima, kiihe, ebidanda, n'enyamaiswa ez'omunsi.

⁹Omwana gw'Entaama obu yabambwire emanyiikirizo eya kataano, narora hansi y'itambiro emyoyo y'abo abaisirwe habw'ekigambo kya Ruhanga, na habw'obwakaiso obu baahaire;

¹⁰baatoka n'iraka likooto bati: “Ai Kamarabyona, ahikiriire kandi ow'amazima, olimara kasumi ki otakacweriire musango abo abaikara omunsi, kandi olibahoora di enzigu habw'esagama yaitu?”

¹¹Nubwo buli omu omuli bo yahairwe ekanzu erukwera, kandi baagambirwa kwongera kuhuumuraho akasumi, okuhika omuhendo ogw'abaheereza bagenzi baabo na bataahi baabo ab'okwitwa nka bo obu gulikahika.

¹²Omu kubonekerwa kwange, Omwana gw'Entaama obu yabambwire emanyiikirizo eya mukaaga, haabaho omusisa ogw'amaani; izooba lyaraara, lyasisana orugoye orurukwiragura, okwezi kwona kwatukura nk'esagama,

¹³enyunyuuzi eza haiguru zaaragalika hansi, nk'omuti omutini oku guragalikya ebijuma byagwo omu bwire bwa kasambura obu gutengesibwa ihunga;

¹⁴iguru lyahwaho nk'omuzingo ogukubirwe, buli rusozi na buli kizinga byaihururwa omu biikaro byabyo.

¹⁵Nubwo abakama b'ensi n'abantu ab'ekitiinisa, engabwa ez'amahe, abaguuda, ab'amaani kandi buli muntu: omwiru n'ow'obugabe baayeserekere omu maingira n'omu mabaale ag'omu nsozi;

¹⁶baataagira ensozi n'amabaale ago bati: “Mutugwere, mutusereke amaiso g'Ogu anyakusingire ha kitebe ky'obukama; kandi mututabule ekiniga ky'Omwana gw'Entaama;

¹⁷habwokuba ekiro kikuru eky'okucweraho omusango kihikire, nooha asobora kukyemera?”