Read Runyoro - rutooro Kus 7 Bible Online

Kus 7 - Runyoro - rutooro bible

Kus 7

¹Ebi obu byahoire, nkarora bbana beemeriire ha mbaju ina ez'ensi, nibatangirayo emiyaga ena ey'ensi, haleke kubaho omuyaga ogurukuteera omunsi, ha nyanja rundi ha muti gwona.

²Nagaruka narora malaika ondi naatemba naaruga Buruga-izooba, akwasire emanyiikirizo ya Ruhanga omwomeezi, yayeta n'iraka likooto bamalaika abbana abakaba bahairwe obusobozi obw'okukora kubi ensi n'enyanja,

³naagamba ati: “Mutakora kubi ensi, enyanja noobu yakuba emiti, okuhika obu turakamara okuta emanyiikirizo ha buso bw'abaheereza aba Ruhanga waitu.”

⁴Kandi nahurra omuhendo gw'abatairweho emanyiikirizo, baahikaga akasiiriira kamu, obukumi bbuna mu nkumi ina, abaarugire omu buli ruganda orw'Abaisirairi.

⁵Ab'omu ruganda rwa Yuda abatairweho emanyiikirizo kakumi mu nkumi ibiri; ab'omu ruganda rwa Rubbeeni, kakumi mu nkumi ibiri; ab'omu ruganda rwa Gadi, kakumi mu nkumi ibiri;

⁶ab'omu ruganda rw'Aseeri, kakumi mu nkumi ibiri; ab'omu ruganda rwa Nefutaali, kakumi mu nkumi ibiri; ab'omu ruganda rwa Manaasse, kakumi mu nkumi ibiri;

⁷ab'omu ruganda rwa Simyoni, kakumi mu nkumi ibiri; ab'omu ruganda rwa Leevi, kakumi mu nkumi ibiri; ab'omu ruganda rwa Isaakaari, kakumi mu nkumi ibiri;

⁸ab'omu ruganda rwa Zebbuluni, kakumi mu nkumi ibiri; ab'omu ruganda rwa Yosefu, kakumi mu nkumi ibiri; ab'omu ruganda rwa Benyamiini abatairweho emanyiikirizo, kakumi mu nkumi ibiri.

⁹Ebi obu byahoire, narora ekitebe kikooto eky'abantu, omuntu aba ataakusoboire kubara, abaarugire omu mahanga goona, omu nganda zoona, omu bantu boona n'omu ngambo zoona beemeriire omumaiso g'ekitebe ky'obukama, n'omumaiso g'Omwana gw'Entaama, bajwaire ekanzu ezirukwera, bakwasire omu ngaro amataagi g'enkindo,

¹⁰nibatokera haiguru n'iraka likooto bati: “Okujuna nikuruga hali Ruhanga waitu anyakusingire ha kitebe ky'obukama, na hali Omwana gw'Entaama!”

¹¹Kandi bamalaika abakaba beemeriire beehinguliriize ekitebe ky'obukama, beehinguliriize n'abakuru, n'ebihangwa bbina ebyomeezi, baajuumara omu maiso g'ekitebe ky'obukama, baaramya Ruhanga,

¹²nibagamba bati: “Nukwo kibe kiti! Ruhanga waitu anyumiziibwe kandi aheebwe ekitiinisa, amagezi, okusiimwa, okukugizibwa, obusobozi n'amaani obusinge bwona! Amiina.”

¹³Nubwo omu hali abakuru yankagwize ati: “Banu abajwaire ekanzu ezirukwera nibaha, kandi barugire nkaha?”

¹⁴Nyowe namugarukamu nti: “Waitu, niiwe orukumanya.” Nandiki uwe ati: “Banu nubo abo abaarugire omu mihito mingi; baayogya ekanzu zabo, baazeereza omu sagama ey'Omwana gw'Entaama.

¹⁵Nikyo barukwemererra omumaiso g'ekitebe ekya Ruhanga, nibamuheereza omunju ye nyamusana n'ekiro; kandi Ogu anyakusingire ha kitebe ky'obukama, alibasangirra n'ekitiinisa kye.

¹⁶Tibaligaruka kurumwa njara, noobwakubaire kukwatwa iroho; tibaliteerwa musana, noobu kyakubaire ekibabu kyagwo.

¹⁷Habwokuba Omwana gw'Entaana anyakwemeriire omu maiso g'ekitebe ky'obukama, aliba muliisa wabo, alibeebembera abahikye ha nsoro ez'amaizi ag'obwomeezi; kandi Ruhanga alibasusura amaizi goona ag'omumaiso gabo.”