Read Runyoro - rutooro Kus 8 Bible Online

Kus 8 - Runyoro - rutooro bible

Kus 8

¹Omwana gw'Entaama obu yabambwire emanyiikirizo eya musanju, haabaho okuculeera omu iguru okumara nk'ekicweka ky'esaha.

²Nubwo narozire bamalaika musanju abeemerra omumaiso ga Ruhanga baaheebwa engwara musanju.

³Haija malaika ondi yayemerra haihi n'itambiro, aina ekiswa kya zaabbu; yaheebwa emigaju nyingi ey'okwotera hamu n'eby'okusaba kw'abahikiriire ebikaba biri ha itambiro lya zaabbu omumaiso g'ekitebe ky'obukama;

⁴kandi omwika gw'omugaju gwaimuka omu maiso ga Ruhanga hamu n'eby'okusaba kw'abahakiriire, byona byaruga omu mukono gwa malaika ogu.

⁵Aho malaika yakwata ekiswa kya zaabbu, yakiijuza omurro ogwa ha itambiro, yakihungura omunsi; enkuba zaabbaruka, emirabyo yamulikya, haabaho n'omusisa.

⁶Nubwo bamalaika musanju abakaba baina engwara musanju, baayeteekaniza kuziteera.

⁷Malaika ow'okubanza yateera engwara ye, haazooka orubaale n'omurro bitabwirwemu esagama, byagwa omunsi; kimu kya kasatu eky'ensi kyamekuka, n'ekimu kya kasatu eky'emiti n'obunyansi, byona byahya.

⁸Malaika owa kabiri yateera engwara ye, ekintu ekirukusisana orusozi orukooto orurukwaka omurro, kyagwa omu nyanja.

⁹Kimu kya kasatu eky'enyanja kyafooka sagama, n'ekimu kya kasatu eky'ebihangwa ebyomeezi ebiri omu nyanja kyafa, kandi kimu kya kasatu eky'emeeri kyahwerekerezibwa.

¹⁰Malaika owa kasatu yateera engwara ye, enyunyuuzi enkooto yaruga omu iguru, neeyaka nk'ekimuli, yagwa ha kimu kya kasatu eky'ebisaaru na ha maziba.

¹¹Ibara ly'enyunyuuzi egi, niyo Nyakusarra. Kimu kya kasatu eky'amaizi gasarra pe, gaita abantu baingi, habwokuba gakaba gasaaliire.

¹²Malaika owa kana yateera engwara ye, kimu kya kasatu eky'izooba kyateerwa, hamu n'ekimu kya kasatu eky'okwezi, na kimu kya kasatu eky'enyunyuuzi. Ekyarugiremu: kimu kya kasatu eky'ekyererezi kyabyo kyaswekwa omwirima, omusana gukamara kimu kya kasatu ky'ekiro gutarukujwa. Okwezi n'enyunyuuzi nabyo byamara kimu kya kasatu ky'ekiro bitarukujwa.

¹³Aho narora kandi nahurra isamba erikaba nirihurruka omu burangasa, niryamuza n'iraka likooto liti: “Ziribabona, ziribabona, ziribabona abaliba bali omunsi engwara ezindi isatu obu zirigamba, bamalaika abasatu ezi bali haihi kuteera!”