Read Runyoro - rutooro Kus 9 Bible Online

Kus 9 - Runyoro - rutooro bible

Kus 9

¹Malaika owa kataano yateera engwara ye, narora enyunyuuzi eyarugire omwiguru, yagwa hansi; enyunyuuzi egi yaheebwa ekisumuruzo eky'omunwa ogw'ekiina ekitaina h'okugarukira,

²yakingura omunwa gw'ekiina eki. Omu munwa gwakyo haarugamu omwika ogurukusisana ogw'ekikoomi. Izooba n'oburangasa byaswekwa omwika ogwarugire omu munwa gw'ekiina.

³Omu mwika ogu haarugamu enzige, zaija omunsi, zaaheebwa obusobozi obw'okwokya abantu nk'enge ez'omunsi.

⁴Zaatangwa kukora kubi obunyansi bw'omunsi, n'ekimera kyona ekibisi rundi omuti gwona; baitu ikaheebwa obusobozi hali abo bonka abataina manyikirizo ya Ruhanga ha buso bwabo.

⁵Ikaikirizibwa kubacanza okumara ameezi ataano, hatali kubaita; kandi okwokya kwazo kukaba nikusisana nk'okw'enge obu eyokya omuntu.

⁶Omu meezi ago ataano, abantu baliserra orufu baitu tibalirubona; balyegomba kufa, nakwo kulibairuka.

⁷Omu nzooka, enzige ezi ikaba niisisana nk'embaraasi ezitegekiirwe obulemu. Ha mitwe yazo hakaba haroho ebirukusisana ekondo za zaabbu; amaiso gaazo gasisanaga nk'amaiso g'abantu.

⁸Ebyoya byazo byasisanaga nk'isoke ly'abakazi, kandi amaino gaazo gali nk'ag'entale.

⁹Zikaba ziina ebigaragamba ebirukusisana ekyoma eky'okwekingira ha kifuba, okuhuuma kw'amapapa gaazo kwasisanaga okuhuuma kw'ebigaali bingi ebirukusikwa embaraasi ezirukwiruka enziriga nizigenda ha bulemu.

¹⁰Zikaba ziina emikira enyakwina emibuli nk'ey'enge, kandi omu mikira yazo nuho hali obusobozi bw'okucanza abantu okumara ameezi ataano.

¹¹Ziina omukama arukuzirema, nuwe malaika ow'ekiina ekitaina h'okugarukira; omu Ruhebburaayo, ibara lye nuwe Abadooni, kandi omu Rugiriiki ayetwa Apolyoni (amakuru gaalyo Omuhwerekereza).

¹²Omuhito ogw'okubanza guhoire, hati hakyasigaire emihito endi ebiri.

¹³Nubwo malaika owa mukaaga yatiire engwara ye, kandi nahurra iraka erirukuruga omu mbaju ina ez'itambiro erya zaabbu erinyakuli omumaiso ga Ruhanga.

¹⁴Iraka lyagambira malaika owa mukaaga, ow'akaba aina engwara, liti: “Lekera bamalaika abbana abaabohiirwe ha kisaaru ekikooto Efuraate.”

¹⁵Bamalaika abbana baalekerwa, nubo abakaba bategekiirwe esaaha, ekiro, okwezi n'omwaka ogw'okwitiramu kimu kya kasatu eky'abantu.

¹⁶Omuhendo ogw'amahe ogw'abarwanira ha mbaraasi gwahikaga obukaikuru bikumu bibiri; omuhendo gwabo nkaguhurra.

¹⁷Omu kwolekwa kwange, nukwo narozire nti embaraasi n'abakaba bazitembere: bakaba bajwaire ebyoma eby'okwekingira ha kifuba eby'erangi nk'ey'omurro rundi ey'ibaale ery'omuhendo ey'erangi ya bbururu, n'ey'obuganga; kandi emitwe y'embaraasi ekaba neesisana emitwe y'entale, omu kanwa kaazo haarugamu omurro, omwika n'obuganga.

¹⁸Enfu ezi isatu nizo zaisire kimu kya kasatu eky'abantu: omurro, omwika, n'obuganga ebyarugire omu kanwa k'embaraasi ezi.

¹⁹Habwokuba obusobozi bw'embaraasi buli omu kanwa kaazo n'omu mikira yazo; emikira yazo ina emitwe erukusisana enjoka, kandi niyo zeekonyeza kutema abantu.

²⁰Abantu abaasigaireho, abataraisirwe nfu ezi, bateegarukemu ebikorwa ebi baakozire n'emikono yabo, noobu kwakuba kuleka kuramya emizimu n'embandwa ebyaheesirwe omu zaabbu, omu feeza, omu mulinga rundi ebyabaizirwe omu mabaale n'omu miti, ebintu ebitasobora kurora rundi kuhurra rundi kurubata.

²¹Kandi bateegarukemu obwisi bwabo, oburogo bwabo, obusiihani bwabo, n'obusuma bwabo.