Read Runyoro - rutooro Rus 1 Bible Online

Rus 1 - Runyoro - rutooro bible

Rus 1

¹Omu biro by'abacwi b'emisango, ensi ekagwibwamu enjara y'amaani, omusaija omu ow'omurubuga Beterehemu orwa Buyudaaya, akafurukira omunsi ya Mowabbu, uwe mukazi we na batabani be babiri.

²Ibara ly'omusaija ogu, nuwe Erimereki, kandi ibara lya mukazi we, nuwe Naume, kandi amabara ga batabani be ababiri: omu nuwe Maharooni, ondi nuwe Kiryoni; abantu abo, bakaba bali b'oruganda rwa Efuraate, bakaruga Beterehemu omu Buyudaaya, bafurukira omunsi ya Mowabbu nuho baikara.

³Baitu Erimereki iba Naume yafa, Naume yaba mufaakati, yasigara na batabani be babiri.

⁴Abatabani abo, baaswera abakazi Abamowabbu; ibara ly'omukazi omu, nuwe Orupa, ery'ondi nuwe Ruusi. Obuhaahingwireho emyaka nka ikumi,

⁵Maharooni na Kiryoni nabo baafa, aho omukazi ogu Naume yafeerwa batabani be babiri, na iba.

⁶Omukazi ogu na bak'abaana be, baaruga omunsi Mowabbu, habwokuba, akaba ahuliire MUKAMA nkooku akaba abungiire abantu be omunsi ya Mowabbu, kandi abahaire ebyokulya.

⁷Nukwo kuruga nambere akaba ali hamu na bakabaana be babiri, baakwata omuhanda, bagaruke omunsi ya Yuda.

⁸Naume yagambira bakaabaana ati: “Mugende, buli omu agaruke omuka y'owaabu nambere yazairwe. MUKAMA abakorre ebirungi, nk'ebimwakoliire abaafiire, kandi nk'ebimwakoliire nyowe.

⁹MUKAMA abakoonyere, mugaruke muswerwe, mutunge amaka!” Nubwo yabagwa omukifuba yabaraga, baatamu ekyoboobo baarra.

¹⁰Baagambira nyinazaara bo bati: “Nangwa, tugende na iwe omu bantu ab'owanyu.”

¹¹Baitu Naume yagarukamu ati: “Baisiki bange, mugaruke owanyu, kiki ekimurukwendera kugenda na nyowe? Ninkyasobora kwongera kuzaara aboojo abalibaswera?

¹²Baisiki bange, mugende mugaruke owanyu, hati nyowe nkuzire muno, tinkyasobora kugaruka kuswerwa. Nobu naakubaire ninkyanihira kuswerwa, nkatunga omusaija, kiro kimu nkazaara aboojo,

¹³mulibalinda okuhika obubalikakura? Eki nikibatanga kuswerwa abasaija abandi? Nangwa, baisiki bange, nimbasaalirirwa muno, MUKAMA nuwe yansaaliize.”

¹⁴Baagaruka baatamu ekyoboobo barra; Orupa yagwa nyinazaara omukifuba, yamuraga yagaruka owabu, baitu Ruusi yamugumiraho.

¹⁵Nyinazaara Ruusi yamugambira ati: “Oboine, mukaabaro agarukire omu bantu b'owabu noomu mbandwa ze, na iwe muhondere.”

¹⁶Baitu Ruusi yagamba ati: “Leka kumpambiriza kukurugaho nkagenda, nambere oligenda na nyowe nuho ndigenda, nambere oliikara nuho ndiikara; abantu baawe nubo baliba bantu bange, kandi Ruhanga wawe nuwe aliba Ruhanga wange;

¹⁷nambere oligwa nuho ndigwa, kandi nuho ndiziikwa, eki nikyo ndukusaba MUKAMA, busaho ekiritwahukaniza, okwihaho kufa.”

¹⁸Naume obuyarozire Ruusi nkooku acwiremu kugenda na uwe, atongereho ebigambo bindi.

¹⁹Nukwo bombi kugenda hamu, baataaha Beterehemu. Obubaahikire Beterehemu orubuga rwona rwabamu akajagarro habw'abantu abo; abakazi baakaguza bati: “Ogu taakuba Naume?”

²⁰Yabagarukamu ati: “Muleke kunnyeta Naume, (ekirukumanyisa omugonzebwa) munnyete Maara (ekirukumanyisa obusaalizi) habwokuba Owobusobozi akankorra eby'okunsaaliza.

²¹Nkagenda ntungire, hati MUKAMA amazire kumbonesa ati, Owobusobozi bwoona amazire kundeetera enaku.”

²²Naume nukwo yagarukire ati na Ruusi muka mwana we Omumowabbukati ayarugire omunsi ya Mowabbu. Bakahika Beterehemu omu kasumi k'igesa erya sayiri.