Read Runyoro - rutooro Rus 2 Bible Online

Rus 2 - Runyoro - rutooro bible

Rus 2

¹Naume akaba aina muramu we, ow'ekika kya Erimereki ibara lye Bowazi, omuntu ogu akaba atungire muno.

²Ruusi Omumowabbukati yagamba Naume ati: “Kangende omumusiri mpumbe engano enyuma y'omusaija ow'araangirra embabazi.” Naume yagarukamu ati: “Genda mwisiki wange.”

³Nubwo Ruusi yagenda, yatandika kuhumba enyuma y'abagesi; akeesanga ahikire omu kicweka eky'omusiri ogwa Bowazi, ow'ekika kya Erimereki.

⁴Bowazi akaruga Beterehemu, yaramukya abagesi ati: “MUKAMA abe na inywe!” Baamugarukamu bati: “MUKAMA akuhe omugisa.”

⁵Bowazi yakaguza omuheereza ayarolerraga abagesi ati: “Omwisiki ogu wooha?”

⁶Omuheereza yagarukamu Bowazi ati: “Omwisiki ogu Mumowabbu, nuwe yaizire na Naume, baaruga omunsi ya Mowabbu.

⁷Aizirege yansaba kuhumba nambere abagesi bagesire. Atandikire kukora nyenkya kara, takahuumwireho noobukakuba kati.”

⁸Bowazi yagambira Ruusi ati: “Mwisiki wange otaruga omumusiri gunu okagenda kuhumba omumusiri ogundi, baitu oikale haihi n'abaisiki bange.

⁹Orole omusiri ogu barukugesa; na iwe obahondere ohumbe nambere bamazire. Abasigazi abo mbagambiire baleke kukutalibaniza. Obworaakwatwaga iroho, ogendege onywe amaizi abasigazi agabaleesire.”

¹⁰Omwisiki yajuumara hansi, yakaguza Bowazi ati: “Ntungire nta omugisa, nyowe omunyaihanga kugirirwa embabazi?”

¹¹Bowazi yamugarukamu ati: “Byona ebiwakoliire nyokozaara okuruga baro amazire kufa, nkabimanya kurungi, nkooku wasigire Sso na nyoko n'ensi y'owanyu, waija omu bantu abookaba otakamanyahoga.

¹²MUKAMA akusasule byona ebi wakozire; MUKAMA Ruhanga owa Isirairi ou wayebingire akuhe byona ebikusemeriire!”

¹³Ruusi yagarukamu Bowazi ati: “Taata, nyowe omuzaana wawe, kandi kunu tindi omu ha bazaana bawe ompumwiize kandi ombaliize n'embabazi.”

¹⁴Akasumi ak'okulya obukaahikire, Bowazi yayeta Ruusi ati: “Irra hanu olye omugaati, ogwibike omu viini.” Ruusi yaikarra haihi n'abagesi, Bowazi yamuheereza engano enyakukarangire; yalya yaiguta, n'okulemwa yalemwa.

¹⁵Obu yaimukire kuhumba, Bowazi yaragira abasigazi ati: “Omwisiki ogu, mumuleke ahumbe, noobwakubaire omu biba omu, mutamutanga.”

¹⁶Kandi habiba ebi na inywe mumwihireho endi nayo agitwale.

¹⁷Ruusi yasiiba omumusiri naahumba yaiza obwire, yahuura engano ei yahumbire, ekahika kiloguraamu ikumi,

¹⁸yagyetweka yagitwara omurubuga; yagyoleka nyinazaara, kandi yaihayo ebyokulya ebyamulemere amazire kwiguta, nabyo yabimuha.

¹⁹Nyinazaara yamukaguza ati: “Engano enu yoona ogihumbire nkaha? Ogiihire omumusiri gwoha? Omusaija ogu anyakukugiriire embabazi aheebwe omugisa.” Ruusi yagambira nyinazaara ati “Omusaija ou nkozire nawe kinu ibara lye nuwe Bowazi.”

²⁰Naume yagambira mukaamwana ati: “MUKAMA atanaga aboomiire n'abafu, amuhe omugisa omusaija ogu!” Naume yagaruka yagambira mukaamwana ati: “Omusaija ogu w'oruganda rwaitu, nuwe omu ha b'oruganda rwaitu ab'ekika kyaitu kyonyini.”

²¹Ruusi Omumowabbukati nukwo kugamba ati: “Kandi omusaija ogu angambiirege ati: ‘Oikalege noohumba haihi n'abakozi bange, okuhika obubalikamarra kimu kugesa.’ ”

²²Naume yagambira Ruusi muka mwana we ati: “Mwisiki wange, kirungi ogendege n'abaisiki be, otaligenda omumusiri ogundi, otaliikara kusangayo okutalibanizibwa.”

²³Okuruga obu, Ruusi yaikaraga haihi n'abaisiki ba Bowazi naahumba, okuhika igesa lya sayiri obu lyahoire.