Read Runyoro - rutooro Rus 3 Bible Online

Rus 3 - Runyoro - rutooro bible

Rus 3

¹Nubwo nyinazaara Ruusi yamukaguza ati: “Mwisiki wange, tinsemeriire kukuserurra eka nukwo okaba kurungi?

²Bowazi mukama w'abaisiki aba waikaraga nabo tali mwene waitu? Kiro kinu, naahehemukya engano harubuga.

³Habweki oyoge kandi oyesiige, ojwale engoye zawe ezirukukirra kimu oburungi, ogende harubuga, omusaija ogu otamwetondera, okuhikya obwarakamara kulya n'okunywa.

⁴Oyetegereze nambere abyamire, obwaraamara kugwijagira, ogende oimukye ebi ayeswekere obyame ha mirambi ye, uwe araakugambira eki oraakora.”

⁵Ruusi yagarukamu ati: “Byona ebyogambire, ndaabikora.”

⁶Nubwo yagenda harubuga, kandi yakora nkooku nyinazaara yamugambiire.

⁷Bowazi obuyamazire kulya n'okunywa, asemeriirwe, yagenda kubyama haihi n'omuswa gwa sayiri. Aho Ruusi yaija mpora naasooba, yaimukya ebyesweko yabyama ha mirambi ye.

⁸Omwitumbi Bowazi yasisiimuka yayehindura, kwija kurora, omukazi abyamire ha bigere bye!

⁹Yakaguza ati: “Niiwe oha?” Omukazi yagarukamu ati: “Ninyowe Ruusi omuheereza wawe, yanjurra ekyesweko kyawe onsweke, habwokuba tuli b'obuzaale bwa haihi.”

¹⁰Bowazi yagamba ati: “Mwisiki wange, Ruhanga akuhe omugisa, embabazi ezo ogizire ha kumalirra, zikizire muno eziwagizire okubanza, togondeze kuswerwa abasigazi noobu baraaba bali banaku rundi baguuda.

¹¹Hati nu mwisiki wange, leka kutiina, ndaakukorra kyona ekyoraasaba, habwokuba bagenzi bange boona ab'omu rubuga, bamanyire nkooku oli mukazi w'omugaso.

¹²Kyamananu ndi w'obuzaale bwa haihi, baitu haroho ow'obuzaale bwa haihi muno kukira nyowe.

¹³Kiro kinu, raara hanu kuhikya obwire obuburaakya, oli obwaraakukorra omuntu ebyakorra ow'obuzaale bwe, kirungi abikukorre, baitu obwatabikukorre, ndahiire Ruhanga omwomeezi, nyowe ndaabikukorra. Byama kuhikya obuburaakya.”

¹⁴Nubwo Ruusi yabyama ha mirambi ya Bowazi kuhika obwire bukiire, baitu akaimuka kara, omuntu atakamanyiriire ondi, habwokuba Bowazi atagonze abantu bamanye harubuga orwokuhuurraaho haizireyo omukazi.

¹⁵Yagamba Ruusi ati: Leeta esuuka eyojwaire, ogyanjurre. Nubwo Ruusi yagyanjurra, yalenga kiloguraamu abiri eza sayiri, yagimutweka; Ruusi yagenda omurubuga.

¹⁶Obuyahikireho nyinazaara, nyinazaara yamukaguza ati: “Bibaire bita, mwisiki wange?” Ruusi yamugambira byona omusaija ebi amukoliire, ati:

¹⁷“Ampaire kiloguraamu abiri eza sayiri nzimu, angambiire ati: ‘Otagaruka omwa nyokozaara oli ngaro nsa.’ ”

¹⁸Nyinazaara yagarukamu ati: “Mwisiki wange, linda kuhika obworaayetegereza ebigambo ebi nkooku biraaba, habwokuba kiro kinu Bowazi tarukwija kutunga businge okuhikya obwarakamalirra ekigambo eki.”