Read Runyoro - rutooro Rus 4 Bible Online

Rus 4 - Runyoro - rutooro bible

Rus 4

¹Bowazi akagenda yaikarra hairembo ly'orubuga, orw'oruganda rwa Erimereki ow'ahaihi Bowazi owakaba agambireho yaija. Nubwo Bowazi yagamba ati: “Nganjani yange, garuka ha rubaju, irra hanu,” omusaija yakubuka, yaikarra.

²Bowazi yatwara abasaija ikumi, ha beebembezi b'abantu b'orubuga, yagamba ati “Mwikarre hanu;” baikarra.

³Aho nubwo yagambira omusaija mwene wabo ati: “Naume anyakugarukire naaruga omunsi ya Mowabbu, naaguza ekibanja ekikaba kiri kya mwene waitu Erimereki.

⁴Habweki nteekeriize nti osemeriire kukimanya. Hati obworaaba nookyenda, kigule oli omumaiso g'abantu banu abaikaliire hanu, noomumaiso g'abebembezi b'abantu bange. Obworaaba nokicungura kicungule, baitu obworaaba otarukukicungura, ngambira nukwo mmanye, baitu kwihaho iwe rundi nyowe busaho ondi araakicungura.”

⁵Oli yagamba ati: “Ndaakigura.” Nubwo Bowazi yagambire ati: “Ha kiro ekyoraagurraho ekibanja kukiihaho Naume, noogurranamu na Ruusi Omunyamowabbukati muka kifa, nukwo kugarra ibara lya kifa omubugwetwa bwe.”

⁶Nubwo mwene wabo Bowazi yagamba ati: “Nubwo kiraaba kiri kiti nyowe tindukukicungura, tinyikara kweyihaho obugwetwa bwange, iwe kicungule omukiikaro kyange, nyowe tinsobora.”

⁷Omu busumi bwaira, ekaba eri ngeso y'Abaisirairi, omuntu obu yabaga naacungura rundi naahingisa, ekintu, kugumya ebikozirwe, kiguza yajuuraga enkaito ye agiha kigura, kandi omu Isirairi, nukwo baagumyaga ekintu bati.

⁸Habweki mwene wabo Bowazi obu yamugambiire ati: “Iwe kyegurre,” uwe nukwo kujuura enkaito ye akagiha Bowazi.

⁹Nubwo Bowazi yagambiire abakuru b'abantu n'abandi boona ati: “Kiro kinu, inywe muli bakaiso abarukugumya nkooku naguraho Naume ebintu byona ebikaba biri bya Erimereki na byona ebikaba biri bya Kiryoni na Maharoni.

¹⁰Kandi Ruusi Omunyamowabbukati omufakati wa Maharoni namugurranamu muswere, alinde ibara lya kifa omubugwetwa bwe, nukwo ibara lya kifa lireke kucweka omu bagenzi be n'omurubuga orw'ensi ei yazairwemu; kiro kinu muli baakaiso.”

¹¹Aho abantu boona abakaba bali hairembo n'abakuru b'enganda, nubwo baagambire bati: “Ego tuli baakaiso. Omukazi arukwija omuka yawe, Ruhanga omukorre ebiyakoliire Rakeri na Leya, abaayeteeraniize baayombeka eka ya Isirairi. Na iwe obe muguuda omu ruganda rwa Efuraate, kandi oranganwe omu Beterehemu.

¹²Kandi habw'abaana MUKAMA aba alikuha kuzaara ha mukazi ogu omuto, eka yaawe esisane eya Pereezi, Yuda ou yazaireho Tamara.”

¹³Nubwo Bowazi yatwara Ruusi yamuswera, MUKAMA yaha Ruusi omugisa yatwara enda yazaara omwana w'obwojo.

¹⁴Nubwo abakazi bagambiire Naume bati: “Ruhanga anyakukuhaire omwijukuru ow'okukulindaga, kiro kinu asiimwe kandi ibara lye liranganwe omu Isirairi!

¹⁵Omwijukuru ogu naija kukuhuumuza, akukonyere omumyaka yawe ey'obukuru, habwokuba mukaamwana waawe anyakukugonza, anyakukukirra abaana musanju nuwe amuzaire.”

¹⁶Naume yakwata omwana yamukiikira omukifuba kye, yatandika kumulera.

¹⁷Abakazi b'abataahi baagambira abantu boona bati: “Naume bamuzaaliire omwana w'obwojo.” Omwana ogu, baamuruka ibara Obedi, Obedi ogu nuwe yazaire Yese isenkuru Daudi.

¹⁸Kandi banu nubo abaijukuru ba Perezi akazaara Hezirooni,

¹⁹Hezirooni ise Raamu, Raamu ise Aminadabbu,

²⁰Aminadabbu ise Nahasoni, Nahasoni ise Salimooni,

²¹Salimooni ise Bowazi, Bowazi ise Obedi,

²²Obedi ise Yese, na Yese ise Daudi.