Read Runyoro - rutooro 1 Sam 1 Bible Online

1 Sam 1 - Runyoro - rutooro bible

1 Sam 1

¹Omunsi ey'ensozi eya Efuraimu, hakaba haliyo omusaija owa Ramasaimu-zofimu, ibara lye Erikaana, mutabani wa Yerohaamu, mwijukuru wa Erihu, Erihu mutabani wa Tohu mwijukuru wa Zufi Omwefuraimu.

²Omusaija ogu akaba aswire abakazi babiri; ibara ly'omukazi omu, nuwe Haana, ery'ondi nuwe Penina; Penina akaba azaire abaana, baitu Haana akaba atazaire mwana noomu.

³Buli mwaka omusaija ogu, yarugaga omurubuga rw'owabu, agenda Siiro kuramya n'okutambira ebyonzira MUKAMA ow'amahe, batabani ba Eri, Hofini na Fenehaasi nambere baikaraga bali banyakatagara ba MUKAMA.

⁴Ha kiro Erikaana eki yatambirrahoga ebyonzira, mukazi we Penina, batabani be na bahara be boona, yabahaga emigabo;

⁵baitu nobwakubaire yagonzaaga muno Haana, yamuhaga omugabo gumu gwonka, habwokuba MUKAMA akaba amwimire oruzaaro.

⁶Mukaiba yaikara naamuswahiriza amukwase ekiniga habwokuba MUKAMA akaba amwimire abaana.

⁷Eki kikatwara emyaka nyingi. Obubaagendaga omunju ya MUKAMA, Penina yakwasaaga muno Haana ekiniga, ekyarugamuga, Haana atandika kurra ayanga n'okulya.

⁸Erikaana iba, nukwo kumukaguza ati: “Haana noolizibwa ki? Kiki ekirukukutanga kulya. Kiki ekirukukutuntuza muno kiti? Nyowe tindukukukirra abaana aboojo ikumi?”

⁹Kiro kimu, obubakaba bali omunju ya MUKAMA Siiro, bamazire kulya n'okunywa, Haana yaimuka, omu kasumi ako, Eri nyakatagara akaba aikaliire hantebe haihi n'ekiti ky'omulyango ogw'enju ya MUKAMA.

¹⁰Haana akaba aina obusaalizi obutagambwa, yatandika kwesengereza MUKAMA, kunu narra.

¹¹Yakora ekiragaano naagamba ati: “Ai MUKAMA ow'amahe; obwolirora nyowe omuzaana wawe arukusaalirwa ati, okanyijuka okampa omwana w'obwojo, ndimukuhongera iwe MUKAMA, abe wawe obwomeezi bwe bwona, kandi tibalimumwa isoke.”

¹²Haana obu akaba naayesengereza MUKAMA, Eri akaikara amutaireho eriiso, aroleriire eminwa ye.

¹³Haana akaba naabaliza omumutima gwe atarukwatura bigambo; eminwa ye yonka niyo yatengeetaga, baitu iraka litarukuhulirwa; Eri nukwo kuteekereza ati omukazi onu atamiire.

¹⁴Yamugamba ati: “Etamiiro yawe eraagarukira nkaha, ag'onywire gakurugeho!”

¹⁵Haana yagarukamu Eri ati: “Taata tintamiire, ndi mukazi anyakwina obusaalizi; tinkanywireho viini rundi ekyokunywa eky'amaani ekindi, baitu nindirirra MUKAMA obujune bwange.

¹⁶Nyowe omuzaana wawe, otateekereza oti ndi muntu entagasa, akasumi ako koona, nkamazire nimbaza ebirukuntuntuza n'ebirukunsaaliza.”

¹⁷Eri nubwo yamugarukiremu ati: “Ogende n'obusinge, Ruhanga owa Isirairi akuhe ekyomusabire.”

¹⁸Omukazi yagarukamu ati: “Obutoosa onkorrege eby'embabazi.” Obuyamazire kugamba eki, yagaruka omunju, yalya, obujune bwamuhwaho.

¹⁹Ha kiro ekyakurasireho, Erikaana neeka ye bakaimuka kara, obu baamazire kuramya MUKAMA, baataaha owabu Rama. Erikaana yatemba ekitabu kya mukazi we Haana, MUKAMA yaha Haana ekiyamusabire;

²⁰atabandaale, nukwo kutwara bwango enda, yazaara omwana w'obwojo, yamuruka ibara Samwiri nukwo kugamba ngu: “Onu nkamusaba MUKAMA.”

²¹Akasumi aka Erikaana neeka ye ak'okugenda Siiro okutambira MUKAMA ekyonzira ekyenyahukana ekyakaba araganiize, kakagaruka kaahika.

²²Baitu Haana atagende, akagambira iba ati: “Omwana onu obwalimara kucuuka ndimutwara omunju ya MUKAMA, nuho aikale obwomeezi bwe bwona.”

²³Erikaana iba yamugarukamu ati: “Kora ekyorukurora kisemeriire kwo, linda okuhika obwolikamucuukura, MUKAMA akukonyere ohikirize ekiwaraganiize.” Haana nukwo kusigara omuka, yayonkya omwana we, okuhika obu yamucuukwire.

²⁴Obuyamazire kumucuukura, yamutwara Siiro, hamu n'enimi ey'emyaka esatu, kiloguraamu ikumi z'ensaano, n'endyanga emu y'amarwa; yamutahya omunju ya MUKAMA; Samwiri akaba akyali muto.

²⁵Obubaamazire kwita enimi, omwana baamutwarra Eri.

²⁶Haana yakaguza Eri ati: “Nyowe nonyijuka? Ninyowe omukazi ou waboine nyemeriire hanu, ninyesengereza MUKAMA.

²⁷Nkamusaba omwana onu, kandi yamumpa.

²⁸Na nyowe hati omwana onu, nikyo ndukumuhongerra MUKAMA, abege Uwe obwomeezi bwe bwona.” Hanyuma aho baaramizaaho MUKAMA.