Read Runyoro - rutooro 1 Sam 10 Bible Online

1 Sam 10 - Runyoro - rutooro bible

1 Sam 10

¹Samwiri nubwo yakwasire ecupa y'amagita, yagiseesa hamutwe gwa Saulo, yamugwa omunda naagamba ati: MUKAMA akuseesireho amagita, ofooke mulemi w'abantu be Abaisirairi, olirema abantu be, obajune abanyanzigwa baabu boona. Kinu nikyo oraamanyiraho MUKAMA nkooku akukomere obe mulemi w'abagwetwa be.

²Obuturaayahukana kiro kinu, noija kusanga abasaija babiri haihi n'ekituuro kya Rakeeri ekinyakuli Zeruza omunsi ya Benyamiini, nibaija kukugambira bati: “Enkaina eziwagenzire kuserra, ikazooka, hati ezi sso takyaitunturra, kandi natuntuurra iwe, naagamba ati: Nkole ki? Omwana wange kayabura, akagwerwa ki?”

³Obworaaruga aho okairrayo, noija kuhika hamuti omuhomozi ogwa Tabora; aho oraitiranaho abasaija basatu nibagenda Beseri kuhongera Ruhanga ekyonzira. Omu hali bo, araaba ayebembiire embuzi isatu, ondi aina emigaati esatu; kandi ondi aina ensaho y'oruhu enyakurumu amaarwa.

⁴Nibaija kukuramukya, bakuhe emigaati ebiri, ogiikirize.

⁵Eki obukiraahwa, ogende ha kasozi ka Ruhanga akanyakuli Gibeyaselohimu,[3] nambere hali ihe erya Abafirisiti, obworaaba noohika harubuga oti, oraasanga ekitebe ky'abarangi nibaruga haitambiro erya harusozi, nibateera ebidongo, enjogera, enyamulere n'enanga nibaranga. Omukasumi ako

⁶omwoyo wa Ruhanga araakutemba n'amaani, naiwe orange hamu nabo, ofooke muntu ondi.

⁷Ebintu ebi obubiraabaho, okole kyona eki oraasobora habwokuba Ruhanga araaba ali na iwe.

⁸Onyebembere ombanze Girigaali; oku nuho ndikusanga, kuhonga ebihongwa eby'okwokya, n'okutamba ebyonzira eby'okusaba obusinge, ondinde okumara wiiki emu, okuhika obundikakuhikaho nkwoleke ekyolikora.

⁹Saulo akaba yakahinduka ati ayahukane na Samwiri, Ruhanga yahindura omutima gwe; byona Samwiri akaba amugambiire, byahikirra ha kiro eki kyonyini.

¹⁰Saulo n'omuheereza we obubaahikire Gibeha, baitirana ekitebe ky'abarangi; omwoyo gwa Ruhanga yamutemba, na uwe yatandika kuranga hamu nabo.

¹¹Boona abakaba bamumanyire kara obubaarozire nkooku arukuranga n'abarangi abo, baakaguzangana bati: “Mutabani wa Kiisi, abaire ki? Saulo na uwe aba murangi?”

¹²Omu ha bantu ab'omukiikaro eki, yakaguza ati: “Ise bo na uwe, aba omu ha barangi?”

¹³Saulo obuyamazire kuranga, yagenda haitambiro erya ha rusozi.

¹⁴Isento yamukaguza hamu n'omuheereza we ati: “Mutaaha nkaha?” Saulo yagarukamu ati: “Tutaaha nituserra enkaina; obuzaatubuzire, twagenda hali Samwiri.”

¹⁵Isento yayongera yamukaguza ati: “Samwiri akakugambira ki?”

¹⁶Saulo yagarukamu isento ati: “Akatunanura enkaina nkooku zaazookere.” Baitu ekigambo ky'obukama Samwiri ekiyabalizeeho, atakimugambireho.

¹⁷Samwiri nubwo yasoroize abantu, baagenda mba MUKAMA omukiikaro Mizipa;

¹⁸yabagambira ati: “MUKAMA Ruhanga wa Isirairi naagamba ati: ‘Inywe Abaisirairi, nkabaiha Misiri nabajuna Abanyamisiri n'abakama boona abakaba nibababonesa.’

¹⁹Ninyowe Ruhanga wanyu ayabajunire enaku n'emihito; baitu kiro kya hati, munyangire mwagamba muti: ‘Tuhe omukama ow'okutulema.’ Hati nu, mwesorooleze omumaiso ga MUKAMA, nkooku muli omu nganda zanyu n'omubika byanyu.”

²⁰Samwiri, nubwo yairiize haihi enganda zoona eza Isirairi, akaruuru kaakwata oruganda rwa Benyamiini.

²¹Yairiza haihi oruganda rwa Benyamiini nkooku ruli omu bika byarwo, akaruuru kaakwata ekika kya Matiri; ha kumalirra, yairiza haihi ab'ekika kya Matiri, naaleta omuntu omu omu, Saulo mutabani wa Kiisi nuwe yakwasirwe akaruuru. Baitu obu baamuserwire yabura.

²²Nukwo kugaruka kukaguza MUKAMA bati: “Omuntu turukuserra aizire hanu?” MUKAMA yagarukamu ati: “Nguli ayeserekere omu bintu biri.”

²³Nubwo bairukire baamwihayo obu yayemeriire omu bantu, yaboogamu boona, baamugarukiraga ha ibega.

²⁴Samwiri nukwo kukaguza abantu ati: “Ruhanga ou akomere mumuboine? Omu bantu boona, busamu noomu arukumwingana.” Abantu boona baatoka nibagamba bati: “Hangiriza Agutamba!”

²⁵Hanyuma Samwiri yasoborra abantu obusobozi n'emirimo y'omukama; ebiyabihandiika omukitabu yakita omumaiso ga MUKAMA. Nubwo yaraga abantu, buli omu yakwata ogw'owabu.

²⁶Saulo, na uwe akagenda omuka ye Gibeha, hamu n'abasaija ab'amaani Ruhanga abayayorobeze emitima.

²⁷Hakabaho abantu abamu abaagambire bati: “Omuntu nkoogu, asobora ata kutujuna?” Bakamugaya, baayanga n'okumurabuka ebisembo. Baitu eki, uwe atakifeeho.