Read Runyoro - rutooro 1 Sam 11 Bible Online

1 Sam 11 - Runyoro - rutooro bible

1 Sam 11

¹Hanyuma, Nahasi Omumooni akaramaga niihe rye kurwanisa orubuga Yabbesi orw'omunsi Giryadi, yarugota; Abasaija aba Yebusi boona, baamugambira bati: “Okole na itwe endagaano, tube batungwa bawe.”

²Baitu Nahasi Omumooni yabagarukamu ati: “Ndaayema hakintu kimu kyonka, nukwo nkole na inywe endagaano, nikyo kinu: Buli omu omuli inywe, mwihemu eriiso ery'obulyo, nukwo nswaze Isirairi yoona.”

³Abakuru aba Yabbesi baamugarukamu bati: “Otuhe akasumi aka wiiki emu, tutume abakwenda barabe omu Isirairi yoona, obuhatabeho muntu noomu ow'okutwesimbira, nubwo tuliija tukwehongere.”

⁴Abakwenda obubaahikire Gibeha omurubuga rwa Saulo, bagambira abantu ekigambo eki, boona baateera omukungo.

⁵Omukasumi ako konyini, Saulo akaba aina ente ze naaruga hamusiri, yayekaguza ati: “Kiki ekisaaliize abantu, kurra bati?” Bamugambira abakwenda abaarugire Yabbesi ebibaagambire.

⁶Saulo obu yahuliire ebigambo ebi, omwoyo wa Ruhanga yamutemba n'amaani, ekiniga kyayenda kumwita.

⁷Yakwata enimi ibiri, yaitematema, yaikwasa abakwenda abo, baitwale omunsi ya Isirairi naagamba ati: “Weena atakurate Saulo na Samwiri akagenda ha bulemu, ente ze nukwo ziraatemwatemwa ziti!” Abaisirairi baatiina MUKAMA ekyakaba naija kukora, boona nukwo kwizira hamu.

⁸Saulo yabasorooleza Bezeki, Abaisirairi bakahika mitwaro asatu, kandi Abaayuda emitwaro esatu.

⁹Baagambira abakwenda bati: “Mugende mugambire abantu banyu muti: ‘Ijo ihangwe litakahikire, nubwo mulijunwa.’ ” Abakwenda obubaagenzire, eki baakigambira abantu ba Yabbesi, omuhimbo gwararra kubaita.

¹⁰Baagambira Nahasi bati: “Ijo nubwo tulikwehongera, otukole kyona ekyorukwenda.”

¹¹Obubwakiire Saulo yabaganiza abantu omubitebe bisatu; emamba obwekaba neesara, baayeseesa omurusiisira rw'Abamooni, baabatematema okuhika omwihangwe; abaasigaireho baararanga, hatabeho abantu babiri abaasigaire hamu.

¹²Abantu nubwo baakagwize Samwiri bati: “Nibaha abaagambire ngu: ‘Saulo asobora kutulema?’ Baleete tubaite.”

¹³Baitu Saulo yagamba ati: “Kiro kinu, busaho muntu araitwa, habwokuba kiro kinu, MUKAMA nikyo ajuumuliireho Isirairi.”

¹⁴Yabagambira ati: “Hati, tugende Girigaali, tugaruke turangirre Saulo nkooku nuwe ali mukama waitu.”

¹⁵Abantu boona nukwo kugenda Girigaali, oku omumaiso ga MUKAMA, nuho baarangiririire Saulo nkooku nuwe ali mukama. Omukiikaro eki, baatambirirrayo MUKAMA ebyonzira eby'okusaba obusinge. Saulo n'Abaisirairi boona baakyanganuka omumulingo ogutagambwa.