Read Runyoro - rutooro 1 Sam 12 Bible Online

1 Sam 12 - Runyoro - rutooro bible

1 Sam 12

¹Samwiri akagambira Abaisirairi boona ati: “Byona ebimwansabire mbibakoliire n'omutima gumu, nabaha omukama ow'okubalema.

²Omubiro eby'omumaiso, omukama ogu nuwe arukwija kubeebembera; nyowe ngurusire, mmezire n'enju, abaana bange muli nabo; nkabeebembera okuruga omubusigazi bwange okuhika ha kiro kinu.

³Nyowe ndi hanu, obundaaba nyina ekinasobeze mundumiirize omumaiso ga MUKAMA, n'omumaiso g'omukama owakomere. Nkatwara ente yooha? Ndatwaire enkaina yooha? Ndagobiize oha? Ndaboneseze oha? Ndaliireho omuntu enguzi nukwo nyefoole nkatarukwetegereza? Obundiba nakozire ebintu ebi, mundumirize, mbibagarurre hanu, hati bunu bunu.”

⁴Bamugarukamu bati: “Tokatugobezaaga, tokatubonesaaga, kandi tokalyaga nguzi y'omuntu.”

⁵Samwiri yagarukamu ati: “MUKAMA n'omukama owakomere, kiro kinu nubo bakaiso abarukugumya nkooku mutanzoiremu kabi.” Baagarukamu bati: “Ego MUKAMA nuwe kaiso.”

⁶Samwiri yayongera yagamba ati: “MUKAMA nuwe kaiso, ogu ayakomere Musa na Arooni, kandi nuwe yaihire baisenkuru inywe omunsi Misiri.

⁷Hati nu, mutagenda, kambanyegerre hali MUKAMA, nimbaijukya ebikuru MUKAMA ebiyabakoliire, kandi ebiyakoliire baisenkuru inywe.

⁸Yakobbo obuyagenzire Misiri hamu neeka ye, Abanyamisiri baababonesa, baisenkuru inywe bakataagira MUKAMA, na uwe nukwo kutuma Musa na Arooni abaabaihireyo, baabata omukiikaro kinu.

⁹Baitu bakeebwa MUKAMA Ruhanga wabu, na uwe nukwo kwikiriza Abafirisiti, omukama wa Mowabbu na Sisera mukuru wiihe ly'orubuga Hazora, babarwanise babasingule,

¹⁰nabwo baaterra MUKAMA omuranga nibagamba bati: ‘Tukasobya, habwokuba tukarugaho iwe MUKAMA, twaramya ba Baali na Asitarosi; hati tujune abanyanzigwa baitu, nukwo tukuramye.’

¹¹MUKAMA yatuma Yerubaali, Baraki, Yefusa na nyowe yabajuna abanyanzigwa abakaba babali orubaju n'orubaju; mwagwagwana.

¹²Baitu obumwaboine Nahasi omukama w'Abamooni naija kubaseesira, nubwo mwagambire muti: ‘Nitwenda omukama ow'okutulema,’ kandi kunu MUKAMA wonyini Ruhanga wanyu, nuwe omukama wanyu.

¹³Hati nu, omukama ou mwasabire, kandi ou mwakomere, ngunu; MUKAMA amubahaire.

¹⁴Obumulitiina MUKAMA Ruhanga mukamuheereza, mukamuhurra mukakwata ebiragiro bye, inywembi: inywe n'omukama arukubalema, obumulimukuraatira, muliba kurungi.

¹⁵Baitu obumutalimuhurra, mukanga kukwata ebiragiro bye, alibafubira, kandi afubire n'omukama wanyu.

¹⁶Hati nu, mutagenda, ka mwije murole ekyamahano MUKAMA ekyaraakora omumaiso ganyu.

¹⁷Akasumi kanu, tinuko akasumi kiigesa ery'engano? Ka nyije nsabe MUKAMA, aragire iguru lihinde, anage enjura, nukwo mumanye kandi mwetegereze nkooku mwakozire ekibi kikooto, nimusaba MUKAMA kubaha omukama.”

¹⁸Samwiri, nukwo kusaba, kiro eki, MUKAMA yaragira iguru lyahinda, yanaga n'enjura; abantu nukwo kutiina muno MUKAMA na Samwiri.

¹⁹Abantu baagamba Samwiri bati: “Tukwesengeriize, otusabire itwe abaheereza bawe hali MUKAMA Ruhanga wawe tuleke kufa; habwokuba ha bibi byaitu ebindi byona, twongiireho na kinu eky'okusaba omukama”

²⁰Samwiri yagarukamu ati: “Muleke kutiina, noobu muraaba mukozire ekibi ekikooto ekirukwingana aho, mutarugaho MUKAMA, baitu mumuheereze n'omutima gwanyu gwona;

²¹muleke kwesiga ebitaroho; tibisobora kubakonyera kandi tibisobora kubajuna, habwokuba tibiina mugaso.

²²MUKAMA akakora endagaano enyakugumire, talisobora kunaga bantu be, habwokuba akamalirra inywe kubafoora bantu be habwe.

²³Ekindi, nikikafuuhe nyowe kusobeza MUKAMA nindekera aho kubasabira; ndabeegesaaga ebirungi kandi ebihikire ebimusemeriire kukora.

²⁴Ekikuru, mutiine MUKAMA kandi mumuheereze n'omutima gwanyu gwona, mutaina bugobya; mwijuke ebikuru ebiyabakoliire.

²⁵Baitu obumuraayongera kusiisa inywembi inywe n'omukama wanyu mulihwerekerra.”