Read Runyoro - rutooro 1 Sam 13 Bible Online

1 Sam 13 - Runyoro - rutooro bible

1 Sam 13

¹Saulo nambere yateeriire engoma, akaba ahikize emyaka asatu. Obwakaba yakalema Isirairi emyaka ebiri,

²Saulo akakoma omu Isirairi abasaija enkumi isatu; enkumi ibiri bakaba bali na Saulo omukiikaro Mikimaasi n'omunsi ey'ensozi eya Beseeri; kandi orukumi rukaba ruli na Yonasaani omunsi Gibeya eya Benyamiini, abaasigaireho, yabaraga baagaruka omuka, buli omu omuheema ye.

³Yonasaani akabinga ihe ly'Abafirisiti eryaikaraga Gibeya; eki Abafirisiti baakimanya. Saulo yateera engwara eyahuliirwe omunsi yoona naagamba ati: “Leeka Abahebburaayo bahurre.”

⁴Abaisirairi boona baahurra Saulo nkooku asingwire ihe ery'Abafirisiti, kandi nkooku anobangaine nabo. Abantu baayetwa bahondere Saulo Girigaali.

⁵Abafirisiti baayesorooza kurwanisa Abaisirairi, baina ebigaali emitwaro esatu, abatembi b'embaraasi kakaaga n'amahe amaingi agali nk'omusenyi ogwa ha musa gw'enyanja; baija baateera orukande Mikimaasi, Burugaizooba bwa Besiveeni.

⁶Abaisirairi obubaaboine nkooku bali omukabi habwokuba bakaba bafunziibwe muno baayesereka omumaingira, omubiina, omumyandara, omubituuro n'omumaziba,

⁷abandi, baayambuka Yorudaani, baagenda omunsi ya Gaadi na Giryadi. Saulo akaba akyali Girigaali, abantu abaakaba ainabo, obutiini bukaba buli bw'okubaita.

⁸Akategereza okumara wiiki emu, ako nuko akasumi Samwiri akayagambire; baitu Samwiri yalema kwija Girigaali, abantu nukwo kutandika kurugaho Saulo.

⁹Saulo nubwo yagambire ati: “Mundeetere ekihongwa eky'okwokya n'ebihongwa eby'okusaba obusinge.” Ekihongwa eky'okwokya yakihonga.

¹⁰Saulo akaba yakamara ati kuhonga ekihongwa eky'okwokya, Samwiri yaija; Saulo yaimuka yagenda kumutangirra n'okumuramukya.

¹¹Samwiri yakaguza Saulo ati: “Okozire ki kinu?” Saulo yagarukamu ati: “Obunaboine abantu batandikire kundugaho, kandi otaiziire omukasumi akawagambire, kandi nabona Abafirisiti beesorooliize Mikimaasi,

¹²nukwo kuteekereza nti Abafirisiti nibaija kunseesira Girigaali hanu, kandi tinkasabire MUKAMA kumpa omugisa, nikyo kyampambiriize kuhonga ekihongwa eky'okwokya.”

¹³Samwiri yagarukamu Saulo ati: “Eki okakora eky'obudoma, otakwate kiragiro MUKAMA Ruhanga wawe ekiyakuragiire; kakuba wakikwasire, yaakukufooliire kimu mukama wa Isirairi ebiro byona.

¹⁴Baitu hati torukwija kwongera kulema, MUKAMA ayeseruliire omuntu owarukugonza; ogu nuwe akomere kulema abantu be, habwokuba otakole ekiyakuragiire.”

¹⁵Samwiri nukwo kuruga Girigaali yagenda Gibbeya eya Benyamiini. Saulo yabara omuhendo gw'abantu abaakaba ainabo, baahika nka rukaaga.

¹⁶Saulo, mutabani we Yonasaani, n'abantu aba bakaba bainabo, baikara Geba eya Benyamiini; baitu Abafirisiti baateera orukande Mikimaasi.

¹⁷Abaseesi bakaruga omurukande rw'Abafirisiti, babaganiziibwe omubicweka bisatu; ekimu hali byo, kyatoma Ofura omunsi ya Swali,

¹⁸ekindi kyakwata Besi-horoni, kandi ekindi, kyagenda ha mutaano ogunyakuroleriire ekya Zebohimu, ha bukiizi bw'irungu.

¹⁹Omukasumi ako, omunsi yoona eya Isirairi, hakaba hatarumu muheesi noomu; habwokuba Abafirisiti baateekerezaaga bati: “Abaheebburaayo, tibaikara kweheesira empirima n'amacumu.”

²⁰Baitu Abaisirairi boona baagendaga hali Abafirisiti kuteekera enfuka zaabo, esuuruuru, endemu ne naijoro,

²¹omuhendo ogw'okuteekera enfuka n'esuuruuru, zikaba ziri rupiya ibiri kandi ogw'okuteekera endemu n'emihunda, rupiya emu.[4]

²²Habweki ha kiro eky'obulemu, abantu boona abakaba bali na Saulo na Yonasaani, hakaba hataroho noomu anyakwina empirima rundi icumu; baitu Saulo na mutabani we Yonasaani, ebintu ebi bakaba bainabyo.

²³Ihe ly'Abafirisiti lyaatoma omunkiro ya Mikimaasi.