Read Runyoro - rutooro 1 Sam 14 Bible Online

1 Sam 14 - Runyoro - rutooro bible

1 Sam 14

¹Kiro kimu, Yonasaani mutabani wa Saulo akagambira omusigazi ayamwetwekeraga eby'okurwanisa ati: “Tuseesire ihe ery'Abafirisiti eriri nseeri.” Baitu Saulo ise, atamugambire.

²Saulo yaikaraga ha mitaano ya Gibeya hansi y'omuti omukomamahanga ogwa Miguroni; abantu abaakaba ainabo, baahikaga nka rukaaga;

³kandi Ahija mutabani wa Ahitubu owanyina Ikabodi mutabani wa Finehaasi mwijukuru wa Eri, nyakatagara wa MUKAMA ayaikaraga Siiro, nuwe yajwaraga efodi. Abantu batamanye Yonasaani nkooku agenzire.

⁴Omunkiro Yonasaani ei yagenzire kurabamu aseesire ihe ery'Abafirisiti, harubaju orumu hakaba haliyo ibaale erikooto, harubaju orundi, naho haliyo erindi; ibara ery'ibaale erimu niryo Bozezi, ery'erindi niryo Senehi.

⁵Erimu likaba liri ha bukiizi obw'emoso omumaiso ga Mikimaasi, erindi liri ha bukiizi obw'obulyo omumaiso ga Geba.

⁶Yonasaani yagambira omusigazi ayamwetwekeraga ebyokurwanisa ati: “Tuseesire ihe ery'abatasazirwe abo; MUKAMA asobora kugira ekyaraatukorra; habwokuba tiharoho ekisobora kumutanga kusinguza abaingi rundi abake.”

⁷Omwetweki w'ebyokurwanisa bye yamugarukamu ati: “Kora kyona ekyorukwenda; nyowe ndi na iwe, eki orakacwamu, na nyowe nikyo ndaahondera.”

⁸Yonasaani nubwo yagarukiremu ati: “Hati nu, twirre haihi abantu bali, tubeeyoleke.

⁹Obubaraatugamba bati: ‘Mulinde okuhika obuturaabahikaho, turaikara nambere tuli, titwabaseesire.’

¹⁰Baitu obu baraagira bati murugeyo, obu turaabarumba; aho nuho turaamanyira MUKAMA nkooku abatutaire omungaro.”

¹¹Bombi obubaayeyolekere Abafirisiti, Abafirisiti baagamba bati: “Abahebburaayo mbabo, nibaruga omubiina ebibabaire beeserekeremu.”

¹²Baayamirra Yonasaani n'omwetweki w'ebyokurwanisa bye bati: “Murugeyo, mwije hanu tubooleke.” Yonasaani yagambira omwetweki w'ebyokurwanisa bye ati: “Mpondera; habwokuba MUKAMA abataire omungaro za Isirairi.”

¹³Yonasaani yagenda naakuta, omwetweki w'eby'okurwanisa bye amukuraatiire. Abafirisiti baagwa omumaiso ga Yonasaani, omwetweki w'ebyokurwanisa bye ow'akaba amukuraatiire, yabaita boona yabamaraho.

¹⁴Omu kwita okw'okubanza, Yonasaani n'omwetweki w'ebyokurwanisa bye, bakaita abasaija nk'amakumi abiri, abakaba bali omumwanya ogw'ekicweka ky'ahiika.

¹⁵Omurusiisira n'aheeru omukisaka, haabayo obutiini obutagambwa, abantu baatukumira, ensi yatengeeta; Ruhanga nuwe yalesire obutiini oburukwingana aho.

¹⁶Abalinzi ba Saulo aba Gibeya omunsi ya Benyamiini, baanaga eriiso, baarora akanyanya k'abantu nibairuka nibatoma kunu na kuli.

¹⁷Saulo nubwo yagambire abantu be ati: “Mubale abantu murole abarukuburaho,” nukwo baakozire, kwija kurora, Yonasaani n'omwetweki w'ebyokurwanisa bye bataroho.

¹⁸Saulo nubwo yaragiire Ahija ati: “Leeta hanu bwango Esanduuko ey'Endagaano ya Ruhanga.” Habwokuba omukasumi ako, Esanduuko y'Endagaano ya MUKAMA yagendaga n'Abaisirairi.

¹⁹Saulo obwakaba naakyabaza na nyakatagara, akoogo akakaba kali omurukande rw'Abafirisiti kakwata hansi na haiguru. Saulo nukwo kugamba nyakatagara ati: “Ihaho omukono gwawe.”

²⁰Saulo n'abantu boona abaakaba ainabo, baakwata omuhanda, baagenda kurwanisa Abafirisiti, abakaba nibarwana bonka na bonka, batakyaina ekibarukumanya. Buli muntu yacumitaga mugenziwe.

²¹Abahebburaayo kara abakaba bali hamu n'Abafirisiti, kandi abakaba bagenzire nabo omurukande, nabo baayehindura, baayeteeraniza n'Abaisirairi abakaba bali na Saulo na Yonasaani.

²²Kandi Abaisirairi boona abakaba beeserekere omunsi ey'ensozi ey'Efuraimu, obubaahuliire ngu Abafirisiti nibairuka, nabo baayeteerana na bagenzi baabu bairukya Abafirisiti.

²³Kiro eki, MUKAMA nukwo yajunire ati Isirairi; obulemu bwagenda hara na Besaveeni.

²⁴Kiro eki, Abaisirairi bakaba bataina maani habw'enjara, habwokuba Saulo akarahiza abantu naagamba ati: “Omuntu weena ow'aralya ebyokulya orwebagyo rutakahikire, ntakahoire enzigu abanyanzigwa bange, ogu akyenwe.” Habweki busaho noomu ayaliire ebyokulya.

²⁵Abantu boona baagenda omukibira eki, hansi hakaba haroho obwoki.

²⁶Obubaataahire ekibira eki, baasanga obwoki nibutonya, baitu hatabeho noomu ayabuliireho; habwokuba bakaba nibatiina endahiro baarahiziibwe.

²⁷Baitu Yonasaani, ise obwakaba naarahiza abantu, atamuhurre; uwe, entuli y'omwigo ogwakaba akwasire, nukwo kugiibika omubisasara, yayeriira, ahonaaho, yahurra yagarukwamu amaani.

²⁸Omu hali bo, nubwo yamugambiire ati: “Sso akarahiza muno abantu naagamba ati: ‘Weena aralya ebyokulya kiro kinu, akyenwe.’ Obu, abantu bakaba baagwa ensazi.”

²⁹Yonasaani yagarukamu ati: “Taata yaita kubi ensi! Murole nkooku ndi kurungi muno habw'okulyaho akooki katoito!”

³⁰Kiro kimu, abantu kakuba babaire baliiriire kimu ebyokulya ebibanyagireho abanyanzigwa baabu bamazire kubabinga, kyakubaire kirungi mali; nubwo bakwisire Abafirisiti baingi kukiraho.

³¹Kiro eki, Abaisirairi bakaita Abafirisiti, okuruga Mikimaasi okuhika Aiyaroni. Omukasumi ako, enjara ekaba ebali kubi,

³²nukwo kugwera ebibanyagireho abanyanzigwa: entaama, enimi n'enyana, baaziita, baaliiramu n'esagama.

³³Nubwo baagambire Saulo bati: “Abantu basiisire hali MUKAMA, nibaliirana esagama omunyama yayo.” Saulo yagamba ati: “Mukozire kubi; mukumbye ibaale erikooto, mulindeetere hanu.”

³⁴Yagaruka yagamba ati: “Murarange omu bantu mubagambire muti: ‘Buli muntu aleete ente rundi entama ye, muziitire hanu mulye; baitu mutongera mukasiisa hali MUKAMA nimuliirana esagama omunyama yayo.’ ” Kiro eki, boona baaleeta ente, zaabo, baaziitira aho.

³⁵Saulo yayombekera MUKAMA itambiro; niryo itambiro ery'okubanza eriyamwombekiire.

³⁶Saulo nubwo yagambiire abantu be ati: “Ekiro tuseesire Abafirisiti, tubanyage okuhika ha mamba kusara, boona tubaitire kimu hatali kulekaho noomu.” Baamugarukamu bati: “Kora kyona ekyorukwenda.” Baitu nyakatagara yagamba ati: “Tubanze twekaguzeeho MUKAMA.”

³⁷Saulo yayekaguzaaho Ruhanga naagamba ati: “Nseesire Abafirisiti? Oraabaha Abaisirairi babasingule?” Kiro eki, atamugarukemu.

³⁸Saulo nubwo yagambire abebembezi b'abantu ati: “Mwije hanu mwetegereze ekibi ekinyakukozirwe kiro kinu.

³⁹Ndahiire Ruhanga omwomeezi anyakuha Isirairi obusinguzi, anyakukozire ekibi eki, noobwaraaba mwana wange Yonasaani, afe.” Omu bantu boona, hatabeho noomu ayamugarukiremu.

⁴⁰Hanyuma yabagambira ati: “Inywe mwemerre harubaju runu, nyowe na mutabani wange Yonasaani, twemerre harubaju orundi.” Bamugarukamu bati: “Kora nkooku orukwenda.”

⁴¹Saulo yagamba ati: “Ai MUKAMA Ruhanga owa Isirairi, kiki ekikutangire kugarukamu omwiru wawe kiro kinu? Omusango obuguraaba gucwirwe nyowe rundi omwana wange Yonasaani, eki kyolekwe ibaale ery'omuhendo Ulimu[5], baitu obu guraaba gucwirwe abantu bawe Abaisirairi, kyolekwe Tumimu.” Engarukamu yayoleka Yonasaani na Saulo; abantu baihwamu omusango.

⁴²Saulo nubwo yagambire ati: “Muteere akaruuru hali itwe ababiri, nyowe n'omwana wange Yonasaani.” Akaruuru kakwata Yonasaani.

⁴³Saulo nukwo kumukaguza ati: “Eki okozire kintu ki?” Yonasaani yagarukamu ati: “Ndiireho akooki kake, nakaiha ha ntuli y'omwigo ogumbaire nkwasire; dara nyowe nyikiriize kufa.”

⁴⁴Saulo yamugambira ati: “Mazima kwo, Ruhanga naakanyite osemeriire kwo kufa.”

⁴⁵Abantu nubwo baakagwize Saulo bati: “Yonasaani anyakuleetiire Isirairi obusinguzi nka bunu, nuwe afe? Nikikafuuhe! Turahiire Ruhanga omwomeezi ha mutwe gwe tiharugeho kasoke na kamu kakagwa ha itaka; ekyakozire kiro kya hati akikozesiibwe Ruhanga.” Abantu nukwo baajunire Yonasaani bati, tiyayeyita.

⁴⁶Eki obukyahoire, Saulo yalekera aho kwirukya Abafirisiti; baagarukayo owabu.

⁴⁷Saulo obuyamazire kuteera engoma ya Isirairi, akarwanisa abanyanzigwa boona aba hoona hoona; Abamowabu, Abamooni, Abeedomu, abakama aba Zoba, n'Abafirisiti. Hoona hoona ha yakarwaniraga, yasinguraga.

⁴⁸Akarwana n'obumanzi yasingura Abamaleki, yajuna Abaisirairi, yabaihaho abo ababanyagaga.

⁴⁹Ganu nugo amabara ga batabani ba Saulo: Yonasaani, Isivi, na Malikisuha; kandi ag'abahara be nugo ganu: Omukuru, nuwe Merabu, ery'omuto nuwe Mikaali.

⁵⁰Muka Saulo ibara lye, nuwe Ahinohamu muhara wa Ahimaazi. Ibara ly'omukuru w'ihe rye, nuwe Abbuneeri, mutabani wa Neeri, isento Saulo;

⁵¹Kiisi nuwe ise Saulo, kandi Neeri ise Abbuneeri, akaba ali mutabani wa Abyeri.

⁵²Omu bulemi bwa Saulo bwona, akarwana obwitane n'Abafirisiti; omusaija wena ow'amaani kandi emanzi ou yaroraga yamutahyaga omwihe rye.