Read Runyoro - rutooro 1 Sam 15 Bible Online

1 Sam 15 - Runyoro - rutooro bible

1 Sam 15

¹Samwiri akagambira Saulo ati: “MUKAMA akantuma kukuseesaho amagita, obe mukama oleme abantu be Abaisirairi; hati tega okutu ohurre ebyarukugamba.

²‘Ninyija kufubira Abameleki, habwokuba Abaisirairi obubakaba nibaruga Misiri, Baisenkuru bo bakabatanga kuraba omumuhanda.’

³Hati, irooko ogende obaseesire, osiisire kimu ebintu byona ebibainabyo; otabaganyira, oite abasaija n'abakazi, abaana abakuruho, n'enkerembe, enimi n'entaama, engamiya n'enkaina.”

⁴Saulo nubwo yayesire amahe ge, yagabara omukiikaro Terahimu, abaserikale aba Isirairi ab'ebigere, bakahika emitwaro abiri, kandi aba Yuda omutwaro gumu.

⁵Yahika ha rubuga rw'Abamaleki, yayesereka omukihanga.

⁶Yaragira Abakeeni ati: “Muruge hanu mugende, murugeho Abamaleki, obumutaabarugeho, nsobora kubaitira omuli bo; habwokuba Abaisirairi obubakaba nibaruga Misiri, mukabagirra embabazi.” Abakeeni nukwo kurugaho Abamaleki.

⁷Saulo yasingura Abamaleki okuruga Havira okuhika Suuro enyakuli ha bukiizi bw'emoso obwa Misiri.

⁸Agagi omukama w'Abamaleki, yamuhamba, abantu boona yabaisa empirima.

⁹Baitu Saulo n'ihe rye, Agagi bakamuganyira, hamu n'entaama, enimi, enyana n'ebyana by'entaama ebirukukirra kimu oburungi, ekintu kyona ekirungi, batagonze kukihwerekereza, ebi byonka ebikaba bitali by'omugaso kandi ebitali birungi, nibyo baahwerekeriize.

¹⁰MUKAMA akagambira Samwiri ati:

¹¹“Ekyanfoize Saulo mukama, ntakimanye; hati dora andugireho kandi ayangire kukwata ebiragiro byange.” Eki kyasaaliza muno Samwiri, yamara ekiro kyona naalirirra MUKAMA.

¹²Nyenkya kara ha kiro ekyakurasireho, akagenda kutangaana Saulo; habwokuba bakaba bamugambiire ngu: “Saulo akagenda Karumeeri, yayebyarrayo ibaale lye ery'okwijukirwahoga, yayeyongerayo yagenda Girigaali.”

¹³Samwiri obuyahikireho Saulo, Saulo yamugambira ati: “Samwiri, MUKAMA akuhe omugisa; ebiyandagiire mbihikiriize.”

¹⁴Baitu Samwiri yagarukamu ati: “Entaama n'enimi ezi ndukuhurra niijuga zinu zaaki?”

¹⁵Saulo yagarukamu ati: “Abasaija bange bakaziihaho Abamaleki; habwokuba entaama n'enimi ezirukukira oburungi, bakaireka baitambire MUKAMA Ruhanga wawe; ebintu ebindi byona ebyasigaireho, tukabihwerekereza.”

¹⁶Saulo nubwo yagambiire Samwiri ati: “Ngambira.”

¹⁷Samwiri yagamba ati: “Iwe noobu oraaba nooyerora nk'ataina mugaso, baitu niwe mwebembezi w'enganda za Isirairi. MUKAMA akakuseesaho amagita obe mukama wa Isirairi.

¹⁸Yakutuma omulimo naagamba ati: ‘Genda ohwerekereze abantu ababi abo Abamaleki, obarwanise okuhika obu orakabamaraho.’

¹⁹Kiki ekyakutangire kuhurra MUKAMA? Kiki ekyakuhambiriize kugwera omunyago okakora ekirukumubiihiza?”

²⁰Saulo yagarukamu Samwiri ati: “MUKAMA nkamuhurra, n'omulimo yantumire, nkagukora, Agagi omukama w'Abamaleki mmuleesire, kandi Abamaleki mbahwerekeriize.

²¹Baitu abasaija bange hamunyago, bakaihaho entaama n'enimi, ebintu ebirukukirra kimu oburungi ebikaba biri by'okuhwerekerezibwa, babitambira MUKAMA Ruhanga wawe omukiikaro Girigaali.”

²²Samwiri yagamba ati: “MUKAMA kiki ekyakira kugonza? Obuhulizi rundi ebihongwa eby'okwokya n'ebyonzira? Mazima obuhulizi bukira ekyonzira, okuhikiriza ekiragiro, kukira ebisajwa by'entaama empaya.

²³Habwokuba, obwemi nibwingana nk'ekibi eky'okuragura, habwokuba okanga ekigambo kye, na uwe nukwo kukwanga kukwikaza hangoma.”

²⁴Saulo yagambira Samwiri ati: “Mazima kwo nkasiisa, habwokuba nkanga kukwata ekiragiro kya MUKAMA n'ebigambo ebi wangambiire, nkatiina abantu nukwo kukora ekibarukwenda.

²⁵Hati nu nkwesengeriize, onganyire ekibi ekinakozire, tugarukeyo hamu, ndamye MUKAMA.”

²⁶Samwiri yagarukamu Saulo ati: “Tindukwija kugarukayo na iwe; habwokuba okanga ekigambo kya MUKAMA, na uwe akwangire yakwiha ha ngoma ya Isirairi.”

²⁷Samwiri obwakaba naahinduka agende, Saulo yakwata ekyebu ky'omukugiro gwa busuuti ye, yatemuka.

²⁸Samwiri yayongera yagambira Saulo ati: “Kiro kinu, MUKAMA akwihireho obukama bwa Isirairi yabuha omutaahi ou oherraine na uwe, arukukukira oburungi.

²⁹Ruhanga wa Isirairi ow'ekitiinisa, tabiiha bisuba, kandi tahindura ekyamara kucwamu. Tali muntu, omuntu nuwe ahindura ekyaba acwiremu.”

³⁰Saulo yagarukamu ati: “Ego nkasiisa, baitu nabwo ntamu ekitiinisa omumaiso g'abakuru b'abantu n'ag'abantu ba Isirairi, tugarukeyo hamu nukwo ndamye MUKAMA Ruhanga wawe.”

³¹Samwiri nukwo kugenda na Saulo Girigaali; Saulo yaramya MUKAMA.

³²Samwiri nubwo yagambire ati: “Mundeetere hanu Agagi omukama w'Abamaleki.” Agagi yaija asemeriirwe, yateekereza ati: “Mazima kwo obusaalizi bw'okufa mbutabukire tinkyafa.”

³³Samwiri yagamba ati: “Empirima yawe nkooku yacuukwire abakazi baingi abaana baabu, nyoko na uwe nukwo arukwija kucuukurwa omwana we.”

³⁴Samwiri yagenda Raama, Saulo yataaha omuka ye, Gibeya eya Saulo.

³⁵Samwiri atagaruke kurora Saulo okuhika okufa kwe, baitu yaikaraga naamusaalirirwa. MUKAMA akagamba ati: “Ekyanfoize Saulo mukama, ntakimanye.”