Read Runyoro - rutooro 1 Sam 16 Bible Online

1 Sam 16 - Runyoro - rutooro bible

1 Sam 16

¹MUKAMA akagambira Samwiri ati: “Olihikya nkaha kulirirra Saulo, kandi kunu nyowe nkamwanga namwiha hangoma ya Isirairi? Ijuza ihembe lyawe amagita ogende Beterehemu, hali omusaija ibara lye Yese; habwokuba omu batabani be, nuho nyekomiire omukama.” Samwiri yagarukamu ati:

²“Eki nkikole nta? Saulo obwaraakihurra, nanyita.” MUKAMA yagamba ati: “Otwale enyana, kandi ogambe oti: ‘Nyizire kutambira MUKAMA ekyonzira.’

³Oralize Yese aije ha kyonzira eki, obu nubwo ndikugambira ekyolikora; onseesireho amagita ogu ou ndikwoleka.”

⁴Samwiri yakora MUKAMA eki yamuragiire, yagenda Beterehemu. Bakuru b'orubuga oru, bakaija kumutangirra nibatukumira baamukaguza bati: “Oleesirwe birungi?”

⁵Yabagarukamu ati: “Ndesirwe birungi; nyizire kutambira MUKAMA ekyonzira; mweyeze, nukwo tugende hamu ha kyonzira eki.” Kandi yayeza Yese na batabani be, yagenda nabo ha kyonzira eki.

⁶Obubaahikireyo, Samwiri yasimba eriiso hali Eryabbu mutabani wa Yese, yagamba ati: “Mazima kwo, omuseswaho magita wa MUKAMA, nuwe ogu, amwemeriire omumaiso.”

⁷Baitu MUKAMA yagamba Samwiri ati: “Otarora ensisana ye n'ekyemo kye, ogu nkamwanga; habwokuba endora ya Ruhanga tiniyo ndora y'abantu; abantu barora ebyaharuguru, baitu Ruhanga, uwe arora omutima.”

⁸Yese nubwo yayesire mutabani we Abinadabu, yamwemeereza omumaiso ga Samwiri. Samwiri yayanga, yagamba ati: “Onu na uwe MUKAMA tamukomere.”

⁹Yese yaleeta Saama, na uwe Samwiri yamwanga, yagamba ati: “Na uwe MUKAMA tamukomere.”

¹⁰Yese akaleeta batabani be musanju, naabeemereza omumaiso ga Samwiri, Samwiri yagamba ati: “Hali banu, busaho noomu MUKAMA ou akomereho.”

¹¹Samwiri nubwo yakagwize Yese ati: “Banu bonka, nubo baana aboojo aba oinabo?” Yese yagarukamu ati: “Hasigaireyo macura, taroho agiire kuliisa entaama.” Samwiri yagambira Yese ati: “Tuma abantu bamwete: obu arakaija, nubwo turaatandika kulya.”

¹²Yese nukwo kutuma abantu, baamutabarra, omusigazi nyakusemera, ow'amaani, aina amaiso agarukumuliikana. MUKAMA yagambira Samwiri ati: “Nuwe ogu, imuka omuseeseho amagita.”

¹³Samwiri obuyahuliire eki yakwata ihembe ly'amagita yagasesaho Daudi omumaiso g'abagenzi be. Ahonaaho mwoyo wa MUKAMA w'amaani yatemba Daudi, kandi yaikaraga nawe okuruga ha kiro eki, n'akasumi koona. Hanyuma Samwiri yakwata omuhanda yagaruka Rama.

¹⁴MUKAMA akaihaho Saulo mwoyo we, yamuha omwoyo omubi ogwaikaire nigumubonesa.

¹⁵Abaheereza be nubwo baamugambire bati: “Omwoyo omubi Ruhanga oguyakusindikiire, nigwikara nigukubonesa.

¹⁶Ragira abaheereza bawe abanyakukuheereza, baserre omusaija omuteezi w'enanga nyakabara; omwoyo omubi obuguraakukwataga, ateerege enanga, nukwo gukurugeho.”

¹⁷Saulo nukwo kugambira abaheereza be ati: “Munserurre omusaija omuteezi w'enanga nyakabara, mumundeetere.”

¹⁸Omu ha baheereza be, nubwo yagarukiremu ati: “Mboine mutabani wa Yese enzaarwa ya Beterehemu, omuteezi w'enanga nyakabara, omusaija emanzi, omurwani, ow'embaza nungi, asemiire; kandi aikara na MUKAMA.”

¹⁹Saulo nukwo kutumaho Yese abakwenda naagamba ati: “Ninkusaba ontwekere mutabani wawe Daudi arukuliisa entaama.”

²⁰Yese nubwo yakwasire enkaina yagitaho emigaati, ensaho y'amarwa n'ekyana ky'embuzi, yabiha omutabani Daudi, abitwarre Saulo.

²¹Daudi yahikaho Saulo, yatandika kumukorra. Yaganja muno hali Saulo, nuwe yamukwatiraga ebyokurwanisa bye.

²²Saulo nukwo kutumaho Yese naagamba ati: “Daudi kaikale nankorra, habwokuba nimugonza.”

²³Saulo obu yakwatwaga omwoyo omubi, Daudi yaihayoga enanga ye agiteera, omwoyo omubi gumurugaho, ahuumura.