Read Runyoro - rutooro 1 Sam 17 Bible Online

1 Sam 17 - Runyoro - rutooro bible

1 Sam 17

¹Omu busumi obu, Abafirisiti bakazinisa amahe gaabu barwane; bakeesorooleza Soko eya Yuda, baateera orukande Efesi-damimu, hagati ya Soko na Azeka.

²Saulo n'Abaisirairi, nabo bayesorooza, orwabu baaruteera omukihanga kya Era, baayemerra kurwanisa Abafirisiti.

³Abafirisiti bayemerra harubaju rumu orw'orusozi, Abaisirairi baayemerra harubaju orundi, ekihanga kibali hagati.

⁴Omurusiisira rw'Abafirisiti, hakarugayo emanzi, ibara lye Golyasi ow'omurubuga Gaasi, ow'akaba araihire naahikya mita nka isatu.

⁵Yajwaraga enkofiira ey'omulinga, ataho ekyokujwara eky'ekyoma, ekirukuhikya Kiloguraamu nk'ataano na musanju.

⁶Ha maguru, yayesembaga ebyoma eby'omulinga, kandi yaikaraga ataire icumu haibega.

⁷Orubango orw'icumu lye, rwainganaga empinju eyibarukiraho engoye, kandi ekyogi kyalyo, kyahikyaga, Kiloguraamu nka musanju; akaba aina omukwasi w'engabu ye, ayagendaga amwebembiire;

⁸Golyasi ogu yayemerraga acoomera amahe g'Abaisirairi naagamba ati: “Kiki ekibaleesire kwija kurwana? Timumanyire nyowe nkooku ndi Mufirisiti, kandi inywe nkooku muli bairu ba Saulo? Omu basaija banyu, mukomemu omusaija omu aije andwanise,

⁹obwarandwanisa akanyita, turaaba bairu banyu; baitu obu ndamusingura nkamwita, muraaba bairu baitu, mutukorrege emirimo.”

¹⁰Akongera yagamba ati: “Kiro kinu, nimbateeza empaka inywe Abaisirairi; mumpe omusaija omu tukwatangane.”

¹¹Saulo n'Abaisirairi boona obubaahuliire ebigambo Omufirisiti ogu ebiyagambaga, baacwekwa enkizi, obutiini bwayenda kubaita.

¹²Daudi akaba ali mwana w'Omunyefuraati owa Beterehemu eya Yuda, ibara lye Yese, omusaija ogu akaba aina abatabani munaana. Omu bulemi bwa Saulo, akaba akuzire muno agurusire.

¹³Batabani be basatu abakuru, bakaba bakurasire Saulo ha bulemu; ganu nugo amabara gaabu: Eryabbu omuzigaijo, Abinadabu ayakurataga ogu, ow'akasatu nuwe Saama.

¹⁴Daudi nuwe akaba ali macura; bakuru be abasatu, bakahondera Saulo,

¹⁵baitu uwe akagaruka Beterehemu kuliisa entaama za ise.

¹⁶Omufiristi ogu Golyasi, yaijaga nyenkya na rwebagyo naasoisoimya Abaisirairi, okumara ebiro amakumi ana.

¹⁷Kiro kimu, Yese akagambira mutabani we Daudi ati: “Dara kiroguraamu ikumi ez'engano enyakukarangire, nemigaati ikumi enu, obitwarre bwango bagenzi bawe omurukande;

¹⁸dara n'ebitonge ikumi binu ebya magita g'ente, obitwarre engabwa y'ihe ryabo. Obaramukye, obwoliba noogaruka, ogire ekintu ekyolindeetera ekibantwekiire nuho ndimanyira nkooku obaboine kwo, kandi nkooku bali kurungi.”

¹⁹Bagenzi ba Daudi baali na Saulo hamu n'Abaisirairi abandi boona omukihanga kya Eraha, nibarwana n'Abafirisiti.

²⁰Nyenkya obubwakiire, Daudi akazinduka kara, entaama yairekera omulinzi, yatwara ebyokulya Yese ise nkooku yamuragiire; yahika harukande, ihe nirikyaturuka liti, nirigenda kurwana, niriteera enduuru ey'obulemu.

²¹Abaisirairi n'Abafirisiti, baayemerra bakwatangane amahe garolerangaine.

²²Daudi, ebintu yabikwasa omulinzi w'ebintu by'obulemu, yairuka yagenda nambere barukurwanira, yaramukya bagenzi be.

²³Obwakaba naakyabaza nabo, haija emanzi eri, Golyasi Omufiristi owa Gaasi, yabaza ebigambo nk'ebiyakabalize kara. Daudi yamuhurra.

²⁴Abaisirairi obubaaboine Golyasi bairuka, obutiini bwayenda kubaita.

²⁵Nubwo baakagwize Daudi bati: “Omusaija ayaija ogu wamubona? Ekimuleesire, nukwo kusoisoimya Isirairi; omuntu owaliita omusaija ogu, omukama alimutungisa muno, amuhe muhara we amuswere, kandi eka ya ise agitungise obusinge bwona omu Isirairi.”

²⁶Daudi nubwo yakagwize abo abakaba bamuli haihi ati: “Boojo omuntu abaire kwita Omufiristi ogu, akaihaho Isirairi ekihemu, yaakuheebwa ki? Omufiristi atasazirwe ogu, ngu nuwe oha, kusoisoimya ati ihe rya Ruhanga omwomeezi?”

²⁷Baamugarukamu ebibaakamugambiire okubanza bati: “Omuntu ogu ow'alimwita, eki nikyo kirimukolerwa.”

²⁸Daudi obwakaba naabaza n'abasaija abo, mukuru we Eryabbu yamuhurra; yamubiihirirwa muno, nukwo kumukaguza ati: “Kiki ekikuleesire hanu? Obutaama obuke buli, omwirungu obusigiireyo oha? Okwekuliiriza kwawe n'ekitima kyawe ekibi, nimbimanya; ekikuleesire, nukwo kurora obulemu.”

²⁹Daudi yakaguza ati: “Baitu nkozire ki? Kubaza ekigambo obugambo kyonka?”

³⁰Daudi yarugaho mugenzi we, yakubukira omuntu ondi, noogu yamukaguza nk'okuyakagwize bali; boona baamugarukamuga bali nkooku baamugarukiremu okubanza.

³¹Abasaija abamu obubaahuliire ebigambo bya Daudi; baabigambira Saulo, Saulo nukwo kumweta.

³²Daudi yagambira Saulo ati: “Agutamba, abantu baleke kutiina Omufiristi ogu; nyowe omwiru wawe ninyija kugenda mmurwanise.”

³³Saulo yamugarukamu ati: “Iwe tosobora kurwanisa Omufiristi ogu, habwokuba oli muto, kandi uwe okuruga obuto bwe, obulemu nubwo aikaliza.”

³⁴Daudi yagambira Saulo ati: “Nzaire, nyowe omwiru wawe, naaliisaaga entaama za ise nyowe; obuhaijaga entale rundi edubu ekakwata ekyana ky'entaama ekakiiha omwigana,

³⁵nagiirukyaga ngiteera nkiginagisa; obuyantegaga obulemu, nagigweraga ebikya, ngiteera ngiita.

³⁶Nkaita entale n'edubu; Omufiristi ogu atasazirwe, anyakutaaha nasoisoimya ihe rya Ruhanga omwomeezi, na uwe nukwo ndukwija kumukora nti.”

³⁷Yayongera yagamba ati: “MUKAMA ayankirize entale n'edubu, nuwe aransingurra n'Omufiristi ogu.” Saulo nubwo yagambire ati: “Irooko ogende, MUKAMA abe na iwe.”

³⁸Hanyuma Saulo yajweka Daudi ebyokurwanisa bye; yamujweka enkofiira ey'omulinga n'ekooti ey'ekyoma;

³⁹Daudi yayeteega empirima ye haruguru y'ebyokurwanisa ebi, yalengaho kurubata baitu yalemwa, habwokuba akaba atabimanyiire, nukwo kugambira Saulo ati: “Tinsobora kurubata na binu byona; timbimanyiire.” Eki yakozire, nukwo kubijuura.

⁴⁰Hanyuma yakwata omwigo gwe, yakoma omukisaaru obubaale butaano, oburukuterra, yabuta omu ndyanga ye ei yagendaga nayo kuliisa, akwasire butida ye, yairirra Omufiristi.

⁴¹Omufiristi ayebembiirwe omukwasi w'engabu ye, yairirra Daudi.

⁴²Obuyaimukize amaiso yarora Daudi, yamugaya; habwokuba Daudi akaba ali mwojo muto, mwomeezi, kandi asemiire.

⁴³Nukwo kumukaguza ati: “Noogira ndi mbwa, nikyo orukwizira nambere ndi okwasire akaigo?” Yamukyena naasaba embandwa ze.

⁴⁴Yamugambira ati: “Rugayo, enyama yawe ngihe amanyonyi ag'omumwanya, n'enyamaiswa ez'omwirungu.”

⁴⁵Daudi nubwo yagarukiremu Omufiristi ati: “Onyiziire n'empirima, okwatiraine amacumu, erikooto n'eritoito; baitu nyowe nkwiziire omwibara lya MUKAMA ow'amahe, Ruhanga ow'amahe ga Isirairi owogayire.

⁴⁶Kiro kinu kyonyini, MUKAMA naija kukunta omungaro, ninyija kukwita, nkucweho omutwe; omutumbi gwawe n'ey'Abafirisiti abandi, ngihe amanyonyi ag'omumwanya, n'enyamaiswa ez'omwirungu, ensi yoona nubwo emanye omu Isirairi nkooku harumu Ruhanga.

⁴⁷Nubwo ekitebe kinu kyona, kimanye Ruhanga nkooku atajunisa mpirima rundi icumu; habwokuba nuwe musinguzi, inywena naija kubatuta omungaro.”

⁴⁸Omufiristi obuyaimukire kwizira Daudi, Daudi yairuka bwango yagenda omumaiso ha irwaniro, akwatangane na uwe.

⁴⁹Yakwata omu ndyanga ye, yaihamu akabaale, yarasa Golyasi, akabaale kaamuteera obuso, kaataahira kimu, yagwa ajuumaire.

⁵⁰Daudi nukwo yasingwire Omufiristi ati, yamusinguza butida n'akabaale, yamwita kunu ataina mpirima.

⁵¹Nubwo yairukire yagenda yamurubatira, yamusomoramu empirima omukiraaro kyayo, yagimucwisaaho omutwe. Abafirisiti obubaboine emanzi yabo efiire, bairuka.

⁵²Aba Isirairi n'aba Yuda baimuka baateera akaruuru, baahondera Abafirisiti okuhikira kimu Gaasi, na ha malembo g'Ekuroni, Abafiristi emputa, baagendaga nibagwa ha muhanda, okuruga Saraimu okuhika Gaasi na Ekuroni.

⁵³Abaisirairi obubaarugire kwirukya Abafirisiti, banyaga orukande rwabu.

⁵⁴Daudi, omutwe gwa Golyasi akagutwara Yerusaalemu, baitu ebyokurwanisa bye, akabyahura omuheema ye.

⁵⁵Saulo obuyaboine Daudi naagenda kurwanisa Golyasi, akakaguza Abbuneeri mukuru w'ihe rye ati: “Omwojo ogu, mutabani wooha?” Abbuneeri yagarukamu ati: “Agutamba, timmumanyire.”

⁵⁶Omukama yaragira ati: “Genda okaguliirize ise mwana ogu, nooha?”

⁵⁷Daudi akaba naaruga kwita Golyasi, Abbuneeri yamuhikya hali Saulo, n'omutwe gw'Omufiristi agukwasire.

⁵⁸Saulo yamukaguza ati: “Weewe musigazi, sso nooha?” Daudi yagarukamu ati: “Ndi mwana wa Yese omwiru waawe owa Beterehemu.”