Read Runyoro - rutooro 1 Sam 19 Bible Online

1 Sam 19 - Runyoro - rutooro bible

1 Sam 19

¹Saulo akaragira mutabani we Yonasaani n'abaheereza be boona ati: Mwite Daudi. Baitu Yonasaani yagonzaaga muno Daudi;

²nukwo kumuhabura naagamba ati: “Ise nyowe Saulo naacwa amagezi ag'okukwita; omu bwire bwa nyenkya oyerinde, oikale harubaju kandi oyesereke;

³ninyija kugenda omu kisaka nambere oraaba oli, nyemerre haihi na ise nyowe, ngire ekindamubaliza hali uwe. Obundaahurra ekigambo ndaakikugambira.”

⁴Yonasaani akabazaaho kurungi Daudi hali ise, yamugambira ati: “Otakora kubi omwiru wawe Daudi, habwokuba takakukoraga kubi; kandi akakukorra eby'omugaso;

⁵akeehwaamu yaita Omufiristi Golyasi, MUKAMA yaha Isirairi yoona obusinguzi obutagambwa. Eki okakyerorra wenka, wasemererwa; kandi osobora ota kukora ekibi eky'okuseesa esagama y'omuntu ataina musango, noita Daudi otaina ekyorukumutura?”

⁶Saulo ebigambo bya Yonasaani mutabani we bikamutaaha, nukwo kurahira ati: “Ndahiire Ruhanga omwomeezi tindukwija kumwita.”

⁷Yonasaani nukwo kweta Daudi, yamugambira ebigambo ebi byona, yamuhikya hali Saulo, Daudi yagaruka kuheereza omukama nkooku yakoraga kara.

⁸Kandi obulemu bukagaruka bwacweka; Daudi akaramaga yarwana n'Abafirisiti, yabaita muno, nukwo kwiruka.

⁹Kiro kimu, Saulo obwakaba aikaliire omunju ye akwasire icumu lye; na Daudi ali aho naateera enanga, omwoyo mubi ogwarugire hali MUKAMA gwamutemba.

¹⁰Yalengaho kucumita Daudi amukwasize hakisiika, baitu Daudi yamwesumba, icumu lyakwata ekisiika. Daudi yairuka yakira.

¹¹Kiro eki kyonyini Saulo akatuma abakwenda balinde enju ya Daudi nukwo amwite nyenkya ha kiro ekirukukurataho. Mikaali muka Daudi nubwo yagambiire iba ati: “Obwotairuke ekiro kinu kitakakiire, ijo noofa.”

¹²Mikaali yaturukya Daudi yamurabya omwidirisa, Daudi yairuka, yakira.

¹³Mikaali yakwata ekisisani, yakibyamya ha kitabu, yakisagura ekisago eky'obwoya bw'embuzi, yakisweka engoye.

¹⁴Saulo obuyatumire abakwenda kukwata Daudi, Mikaali yabagambira ati: “Arumu omunju omu, murwaire.”

¹⁵Saulo yabagamba ati: “Mugarukeyo mumwerorre inywenka, mumuhimbire ha kitabu kye mumundeetere hanu, mmwite.”

¹⁶Abakwenda obubataahire omunju, bakasanga ekisisani nikyo kibyamire omukitabu, kisagwirwe ekisago eky'obwoya bw'embuzi.

¹⁷Saulo yakaguza Mikaali ati: “Kiki ekikumbiihisize oti, wacwisa omunyanzigwa wange yairuka?” Mikaali yagarukamu Saulo ati: “Akagamba ati: ‘Ncwisa ngende, obwotancwise, ninkwita.’ ”

¹⁸Daudi nukwo yairukire ati yakira, yahikaho Samwiri, yamusanga Rama, yamugambira byona Saulo ebyakaba amukozire. Baagenda hamu na Samwiri, baikara Nayosi.

¹⁹Abantu bakagambira Saulo ngu: “Daudi ali Nayosi omunsi Rama.”

²⁰Saulo yatuma abakwenda bamukwate; obubaaboine ekitebe ky'abarangi nibaranga, Samwiri abarumu nuwe ali mukuru wabo, mwoyo wa MUKAMA yabatemba, nabo baatandika kuranga.

²¹Eki Saulo obuyakihuliire, yatuma abakwenda abandi, nabo baaranga nka bali. Yagaruka yatuma abakwenda omurundi gwakasatu, nabo nukwo baakora.

²²Uwe wenka, nubwo yagenzire Rama, obuyahikire haiziba erikooto erya Seeku, yakaguza ati: “Samwiri na Daudi bali nkaha?” Baamugarukamu bati: “Bali Nayosi omunsi Rama.”

²³Obwakaba akyali omumuhanda naagenda, na uwe mwoyo wa Ruhanga yamutemba yagenda naaranga okuhika kutaaha Nayosi.

²⁴Yajuura ebyokujwara bye, yayongera kuranga omumaiso ga Samwiri, yasiiba ali busa ekiro eki kyona, kandi yaraara ali busa. Aho nuho haarugire orufumo orurukugamba ruti: “Saulo nawe ali omu ha barangi?”