Read Runyoro - rutooro 1 Sam 2 Bible Online

1 Sam 2 - Runyoro - rutooro bible

1 Sam 2

¹Haana akongera kwesengereza naagamba ati: “Omutima gwange nigusemerererwa omu MUKAMA, ninyenyumiriza omu MUKAMA. Ninsekereza abanyanzigwa bange, habwokuba nkyanganukire habw'okujuna kwawe.

²Busaho muntu noomu ahikiriire kwingana MUKAMA, busaho noomu okwihaho Iwe; tiharoho mwandara ogurukusisana Ruhanga waitu.

³Otongera kubaza n'emyehembo oti, Lekera aho kubaza eby'okwekuliiriza; habwokuba MUKAMA nuwe Ruhanga ow'amagezi, nuwe alenga ebikorwa by'abantu.

⁴Obuta obw'ab'amaani bucwekere, baitu abaceke beeyongiire amaani.

⁵Abalyaaga bakaiguta hati nubo barukukoleereza nukwo babone akookulya, kandi abo abaitwaga enjara, hati tekyabaita. Engumba ezaire abaana musanju, baitu ow'akaba azaire baingi takyaina noomu.

⁶MUKAMA nuwe aita kandi nuwe ayomeeza; nuwe asirimura nyabuyonga kandi nuwe aihayo.

⁷MUKAMA nuwe ainaza kandi nuwe atungisa; nuwe abundaaza, kandi nuwe anyumiza.

⁸Aimukya abanaku abaiha omu cuucu; abaseege abaiha omwiju abaikalize n'ababiito, kandi abateekaniza omubiikaro eby'ekitiinisa. Habwokuba enyomyo z'ensi za MUKAMA kandi hali zo nuho yagiteekere.

⁹Alinda abantu be abeesigwa, baitu ababi baliburra omumwirima; omuntu nukwo aleke kwenyumiza habw'amaani ge.

¹⁰Abanyanzigwa ba MUKAMA balicwacwanwa; alyema omwiguru ababbwatukire. MUKAMA alicwera ensi yoona omusango; omukama we alimuha amaani, ogu ayaseesirweho amagita amwongere obusobozi.”

¹¹Hanyuma Erikaana yagaruka owabu Rama, omwana Samwiri yasigara Siiro naaheereza MUKAMA, naroleererwa Eri nyakatagara.

¹²Batabani ba Eri, bakaba bali bantu babi; bakaba batarukutamu MUKAMA ekitiinisa.

¹³Okukorrana kwa baanyakatagara n'abantu kukaba kuli kuti: Obuhaabahoga omuntu arukutamba ekyonzira, enyama obuyabaga neekyacumbwa, haijaga omuheereza wa nyakatagara, akwasire ehuuma,

¹⁴agisimba omusafuliya, omubbinika, omunyungu rundi omukinaga; kyona ekyakaiziraga ha huuma, nikyo kyabaga kya nyakatagara. Abaisirairi boona abaagendaga Siiro nukwo baabakoraga bati.

¹⁵Ekindi, ebisajwa obubyabaga bitakookibwe, omuheereza wa nyakatagara yaijaga agambira omuntu ogu arukutamba ati, “Ompe enyama ya nyakatagara ey'okwokya; habwokuba enyama enyakucumbire, tarukwija kugikwikiririza, naayenda embisi.”

¹⁶Omuntu obuyagarukamuga ati: “Leka babanze bookye ebisajwa, nukwo otwale byona ebyorakenda,” omuheereza yagarukamuga ati: “Nangwa gimpe hati bunu bunu; obworaaba otarukugimpa, kangitwaze maani.”

¹⁷Ekibi kya batabani ba Eri, kikabiihiza muno MUKAMA, habwokuba ekihongwa kya MUKAMA bakakibuza ekitiinisa baakiretaho emigayo.

¹⁸Samwiri akaikara naaheereza MUKAMA ajwaire apuroni ya kitaani.

¹⁹Kandi buli mwaka, nyina obuyabaga naagenda na iba kutamba ekyonzira ekya buli mwaka, yamubaziirraga ekanzu agimutwarra.

²⁰Eri yasabiraga Erikaana na mukazi we omugisa naagamba ati: “MUKAMA akuhe okuzaaraho omukazi onu abaana abandi, bagaruke omukiikaro ky'oli ou yamuhongiire”; eki obukyahwaga, nubwo bagarukaga owabu bo.

²¹MUKAMA akaha Haana omugisa, nukwo kutwara enda, yazaara abaana aboojo abandi basatu, n'abaisiki babiri. Omwojo oli Samwiri, akaikara naaheereza MUKAMA.

²²Omukasumi ako, Eri nobwaraaba yali akuzire muno, yahurraga byona abaana be ebibaakoraga Abaisirairi boona, kandi nkooku baasiihanaga n'abakazi abaaheerezaaga ha mulyango ogwatwaraga omu Heema ey'okutangatanganiramu.

²³Nukwo kubakaguza ati, “Kiki ekirukubakoza ebintu nkeebi? Abantu baingi nibangambira amahano agamurukukora.

²⁴Baana bange, ebi mubifuuhye! Ebigambo abantu ba MUKAMA ebindukuhurra nibabaza, tibiri birungi.

²⁵Omuntu obwasobyaho omuntu mugenzi we, asobora kutonganirra ogu omusobya hali Ruhanga; baitu omuntu kakuba asobyaho MUKAMA, ogu nooha asobora kumutonganirra?” Ise bo ebiyabagambiire, batabihulirize; habwokuba MUKAMA akaba amaliriire kubaita.

²⁶Omwojo oli Samwiri, yagenda naayeyongera kukura omu maani, omukugonzibwa MUKAMA n'abantu.

²⁷Eri akaizirwa omuntu wa Ruhanga yamugambira ngu: “MUKAMA naagamba ati: ‘Swenkuru Arooni hamu neeka ye obu bakaba bali bairu ba Faraaho omukama wa Misiri, nkamweyoleka.

²⁸Omu nganda zoona eza Isirairi, nuwe nkomere abe nyakatagara wange, nuwe atembege ha itambiro lyange kwokya obubbani, kujwara efodi[1] omumaiso gange; enju ye nkagiha obusobozi obw'okutwaraga ebyonzira ebinyakwokebwa ha itambiro.

²⁹Habwaki mwikara nimururukira ebyonzira n'ebihongwa byange ebinaragiire, okankiza abaana bawe, nukwo kubaikiriza kulya ebirukukirra kimu obwingi, abantu bange Abaisirairi ebibampongera?’

³⁰Habweki, MUKAMA Ruhanga owa Isirairi naagamba ati: ‘Nkanihiza nti enju yawe neeya swenkuru, nizo ziramperezaaga nizikora omulimo gw'obunyakatagara ebiro byona’; baitu hati naagamba ati: ‘Eki kitalibaho! Habwokuba abanyakuntamu ekitiinisa, na nyowe mbatamu ekitiinisa, kandi abanyakungaya mbagaya.

³¹Hati nu omanye, akasumi kali haihi, nyite abasaija abato boona ab'ekika kyawe n'ab'oruganda rwawe, omu kika kyawe, nukwo habulemu omuntu noomu alikura akagurusa.

³²Oliizirwa emihito, okwatwe ihali noorora emigisa ei ndiba nimpa abantu kubamu omuntu ow'alikura akagurusa.

³³Omuntu omu hali inywe ou ntaliiha ha itambiro lyange, ogu aliganyirwa, aikalege narra, amaziga gamwite amaiso, kandi omutima gwikalege nigumusarra; abantu abandi boona abalyeyongera omunju yawe, abantu abandi balibaisa empirima.

³⁴Ekirigwera batabani bawe ababiri Hofuni na Finehaasi, eki nikyo olimanyiraho. Boombi balifeera ha kiro kimu.

³⁵Ndyekomera nyakatagara omwesigwa, ogu nuwe araakoraga kyona ekindukutegeka n'ekindukugonza; ndimwombekera enju enyakugumire, nuwe araayebeemberaga omuseeswaho magita wange ebiro byona.

³⁶N'ondi weena ow'omunju yawe alisigaraho, araijaga kumusabiriza akasente rundi akagaati. Nkwesengeriize, onte omukiikaro kimu ha biikaro by'abanyakatagara, na nyowe nukwo nsobole kulyahoga akagaati.’ ”