Read Runyoro - rutooro 1 Sam 21 Bible Online

1 Sam 21 - Runyoro - rutooro bible

1 Sam 21

¹Hanyuma nubwo yagenzire Nobbu, hali Ahimereki nyakatagara; Ahimereki yaija kumutangirra naatukumira, yamukaguza ati: “Kiki ekikuleesire wenka otaina muntu?”

²Daudi yamugarukamu ati: “Omukama aina ekiyantumire; ‘kandi akanteererra ekintu eki, ekiyantumire kandi ekiyandagiire kutakigambiraho muntu noomu.’ Abasigazi bange, ndagaine nabo nti: Turaasaangaana omukiikaro bunanka.

³Yamukaguza ati: Oina ki? Mpa emigaati etaano, rundi ekintu ekindi kyona ekyoinakyo.”

⁴Nyakatagara yagarukamu Daudi ati: “Tinyina mugaati ogwa butoosa, nyina omugaati ogurukwera; abasaija bawe obubaraaba bamazire ebiro ebihingwire batarukweyiriza haihi bakazi, nugwo nkuhe.”

⁵Daudi yagarukamu nyakatagara ati: “Obumba ningenda orugendo, tufuuhiza kimu abakazi; noobu tuba nitugenda orugendo orwa butoosa, ebikwato eby'abasigazi biikara nibyera, kandi kaaswa hati, tibayere kukiraho muno?”

⁶Nyakatagara nukwo kuha Daudi omugaati ogurukwera; habwokuba omugaati ogwakaba ainagwo, nugwo ogu ogukaba guhongiirwe MUKAMA, ogwaihirwe ha meeza erukwera, omukiikaro kyagwo haagarurwamu ogundi ogwakaruga kucumbwa.

⁷Kiro eki, omusaija omu ha baheereza ba Saulo, ayamazire akasumi ali omu maiso ga Mukama, yasangwaho; ibara ly'omusaija ogu nuwe Dohegi Omwedomu, mukuru w'abaliisa ba Saulo.

⁸Daudi, yakaguza Ahimereki ati: “Oina icumu rundi empirima okagimpa? Omukama andagiirege kwimukya bwango, nukwo kutasobora kuleeta empirima yange, rundi ekyokurwanisa kyange ekindi.”

⁹Nyakatagara yagarukamu Daudi ati: “Empirima ya Golyasi omufirisiti ou wanagire omukihanga kya Era, ngiri esemberwe omurugoye, enyuma y'efodi; obworaaba nogyenda, gitwale. Eki nikyo eky'okurwanisa kyonka ekinyinaho.” Daudi yagarukamu ati: “Gimpe, tiharoho mpirima erukukira egi.”

¹⁰Kiro eki, Daudi yairuka yaruga omunsi ya Saulo yagenda omwa Akisi omukama wa Gaasi.

¹¹Abaheereza ba Akisi baayekaguza bati: “Ogu tali nuwe Daudi omukama w'ensi ey'owabu? Tali nuwe ogu abakazi ou baagambaga nibazina ngu: ‘Saulo akaita enkumi, baitu Daudi aisire emitwaro?’ ”

¹²Ebigambo ebi byacumita muno Daudi omutima, kandi byatiinisa Akisi omukama wa Gaasi.

¹³Obuyabaga abali omumaiso, nukwo kuhindura engeso ze, obubaamukwataga, ayenaga iraro, ayehandahandiikisa ha nyigi z'irembo, ayesamirra ebirusu bimwituruuka bimuhika omumuleju.

¹⁴Akisi nukwo kukaguza abaheereza be ati: “Mawe! Omusaija onu ka mugu w'iraro? Mundeetiire waki onu?

¹⁵Mbuzirwe abagu b'iraro, nukwo kundeetera omuntu nk'onu akole eby'obugu bw'iraro omumaiso gange? Ogu ndamutaahya omuka yange?”