Read Runyoro - rutooro 1 Sam 23 Bible Online

1 Sam 23 - Runyoro - rutooro bible

1 Sam 23

¹Abantu bakagambira Daudi ngu: “Abafirisiti nibarwanisa Keyira, kandi nibanyaga engano erukuhuurwa.”

²Daudi nukwo kukaguza MUKAMA ati: “Abafirisiti abo, ngende mbaseesire?” MUKAMA yamugarukamu ati: “Genda obaseesire ojune Keyira.”

³Baitu abasaija ba Daudi baamugambira bati “Hanu omunsi ya Yuda, ka nitutiina, kandi leero obutuligenda Keyira kurwanisa Abafirisiti, tulisura ki?”

⁴Daudi nukwo kugaruka kwekaguza hali MUKAMA. MUKAMA yamugarukamu ati: “Imuka ogende Keyira; habwokuba Abafirisiti ninyija kubakuha obasingule.”

⁵Yagenda Keyira n'abasaija be, yarwanisa Abafirisiti yabaita muno, kandi yanyaga enimi zaabo. Aba Keyira, Daudi nukwo yabajunire ati.

⁶Abyasara mutabani w'Ahimereki obu yahondiire Daudi omurubuga Keyira, efodi ye akagenda nayo.

⁷Saulo obu yahuliire Daudi nkooku airukire yagenda Keyira, yagamba ati: “Ogu, Ruhanga amuntaire omungaro; habw'okutaaha orubuga orunyakwina amalembo n'emitahimbwa, ayekingiiremu wenka.”

⁸Saulo nukwo kuzinisa amahe ge garamage gagende Keyira gagote Daudi n'abasaija be.

⁹Daudi obuyahuliire Saulo nkooku arukucika kumuseesira, yagambira Abyasara nyakatagara ati: “Efodi egi gireete hanu.”

¹⁰Nubwo yayesengeriize MUKAMA naagamba ati: “Ai MUKAMA Ruhanga owa Isirairi, nyowe omwiru wawe, mpuliire Saulo nkooku arukucika kwija omurubuga Keyira aruhwerekereze habwange.

¹¹Abantu ab'orubuga Keyira, barampayo hali Saulo? Saulo araija kwo nkooku mpuliire? Ai MUKAMA Ruhanga owa Isirairi, ngambira nyowe omwiru wawe.” MUKAMA yamugarukamu ati: “Ego naija kwija.”

¹²Daudi yagaruka yakaguza MUKAMA ati: “Abantu aba Keyira barampayo hali Saulo hamu n'abasaija bange?” MUKAMA yamugarukamu ati: “Ego, nibaija kukuhayo.”

¹³Daudi obu yahuliire eki, atabandaale yaimuka n'abasaija be abaahikaga nka rukaaga; baruga Keyira baatandika kwenjeera hoona nambere baakasangaga. Saulo obuyahuliire ngu Daudi Keyira airukireyo orugendo orwakaba ateekaniize yaruleka.

¹⁴Daudi akaikara omubigo eby'omwirungu omunsi ey'ensozi omwirungu erya Zifu, Saulo yaikaraga naamuserra buli kiro, baitu Ruhanga atamumuhe.

¹⁵Daudi akamanya Saulo nkooku arukucwa amagezi goona ag'okumwita; nukwo kwikara Horesi omwirungu erya Zifu.

¹⁶Yonasaani mutabani wa Saulo, akaimuka yabungira Daudi omukiikaro Horesi, yamugumya naagamba ati: Ruhanga naija kukulinda.

¹⁷“Leka kutiina, ise nyowe Saulo tarukwija kukukoraho kabi, niiwe orukwija kuba mukama wa Isirairi nyowe mbe Katikiro wawe, eki na ise nyowe naakimanya.”

¹⁸Abo boombi baakora ekiragaano eky'amananu eky'okugonzangana, baakikorra omumaiso ga MUKAMA. Daudi yaikara Horesi, Yonasaani yataaha owabu.

¹⁹Hakabaho abasaija abamu aba Zifu abaagenzire Gibeya hali Saulo baamugambira bati: “Daudi ngunu ayeserekere omunsi yaitu Horesi, harusozi Hakira, ha bukiizi obw'obulyo obwirungu erya Yuda.

²⁰Agutamba, tumanyire nkooku orukwenda muno kukwata omuntu ogu; hati nu, gira oije owaitu turaakora kyona ekiturukusobora, nukwo omukwate.”

²¹Saulo yabagarukamu ati: “MUKAMA abahe omugisa; habw'okungirra embabazi ezirukwingana aho!

²²Irooko mugende, mwongere kwetegerereza kimu nambere ali, kandi n'anyakumuboine; habwokuba bangambiire ngu ncwangya mali.

²³Habweki, mugende mwetegereze ebiikaro byona ebyeserekwamu nambere abundaire, nukwo mugaruke nambere ndi, mumazire kugumiza kimu. Obu nubwo turaagenda hamu; araaba akyali omunsi egi, ninyija kumuronza omu bantu enkumi n'enkumi aba Yuda boona.”

²⁴Baimuka baayebembera Saulo, baamubanza kuhika Zifu. Omu kasumi ako, Daudi n'abasaija be bakaba bali omwirungu erya Mohani omu nsi Araba, ha bukiizi obw'obulyo obwa Yesimooni.

²⁵Saulo n'abasaija be baagwa Daudi omubusinde. Eki Daudi yakimanya, nukwo kugenda ha rusozi orw'amabaale orunyakuli omwirungu erya Mahoni nuho yaikara. Saulo obuyahuliire eki, yakurata Daudi.

²⁶Saulo akatoma harubaju orumu orw'orusozi, Daudi n'abasaija be baatoma ha rubaju orundi; Daudi akaba naarahuka muno, nukwo asige Saulo, habwokuba Saulo n'abasaija be, bakaba bamuli haihi muno, baraaliire kumukwata hamu n'abasaija be.

²⁷Omu kasumi ako, hakaija omukwenda yagambira Saulo ati: “Rahuka bwango tugarukeyo, habwokuba Abafirisiti baramagiire ensi yaitu.”

²⁸Saulo nukwo kuhwamu eby'okuhondera Daudi, yagenda kurwanisa Abafirisiti; ekiikaro eki, nukwo kukyeta omwandara ogw'okubaganizaamu.

²⁹Daudi oku yarugayo, yagenda yaikara ayeserekere omunsi Enigedi.