Read Runyoro - rutooro 1 Sam 25 Bible Online

1 Sam 25 - Runyoro - rutooro bible

1 Sam 25

¹Hanyuma Samwiri yafa, Abaisirairi boona baayesorooza baamulirirra, baamuziika omuka ye Rama. Eki obukyahoire, Daudi akakwata omuhanda yagenda omwirungu erya Parani.

²Mahoni, hakaba haliyo omusaija ow'akaba aina itungo lye omurubuga Karumeeri. Omusaija ogu, akaba atungire atungurwire; akaba aina entaama enkumi isatu, embuzi rukumi. Omukasumi ako, akaba ali Karumeeri, naasara entaama ebyoya.

³Ibara ly'omusaija ogu nuwe Nabbali, kandi erya mukazi we, nuwe Abigairi. Abigairi akaba ali mukazi w'amagezi kandi asemiire, baitu iba akaba atasemiire, kandi munyangeso mbi; omusaija ogu, akaba ali w'oruganda rwa Kalebbu.

⁴Daudi obuyahuliire ali omwirungu: ngu Nabbali naasara entaama ze ebyoya,

⁵yatuma abasigazi ikumi naagamba ati: “Irooko mugende Karumeeri muhikeho Nabbali, mumundamukize.

⁶Mumuramukye nimugamba muti: ‘Ninkugondeza obusinge, nimbugondeza eka yawe, kandi nimbugondeza ebyawe byona.

⁷Mpuliire ngu oina abasazi ab'ebyoya by'entaama; biro binu, abaliisa bawe tutaaha nabo, tutabakoleko kabi, akasumi koona akabaamazire Karumeeri, busaho kintu kyabo na kimu ekyabuzire.

⁸Kaguza abasigazi bawe, nibaija kukugambira. Habweki, abasigazi abo obagirre embabazi; habwokuba tuhikire ha kiro kikuru. Kyona ekyoinakyo okihe abaheereza bawe n'omwana wawe Daudi.’ ”

⁹Abasigazi ba Daudi obubaahikire, ebi byona baabigambira Nabbali, Daudi nkooku yabaragiire; baikaraho bategeriize.

¹⁰Nabbali yakaguza baheereza ba Daudi ati: “Daudi ogu nooha? Mutabani wa Yese nooha? Biro binu, haroho abaheereza baingi abarukwirukaho bakama baabu.

¹¹Bunu nkwate ebyokulya, amaizi n'ebisoro byange ebinyitiire abasaija abasazi b'ebyoya by'entaama zange, ngu mbihe abantu abantamanyire nambere barugire?”

¹²Abasigazi ba Daudi, nukwo kukubuutuka, bakwata omuhanda ogwabaleesire, ebi byona baabimugambira.

¹³Daudi yaragira abasaija be abo ati: “Buli omu ayeteege empirima ye!” Na uwe eye yagyeteega; abasaija nkeebikumi bbina bamuhondera, kandi ebikumi bibiri, baasigara n'ebintu.

¹⁴Omu ha basigazi, akakaguza Abigairi muka Nabbo ati: “Kinu waakihuliire? Daudi akeema omwirungu yatweka abakwenda baramukye mukama waitu, obubaahikire hanu yabacoomera.

¹⁵Kandi kunu abantu abo bakatukorra ebirungi, tibaina kabi akabaatukozire, akasumi koona aka twamazire nabo tuli omukisaka, busaho kintu kyaitu ekyabuzire;

¹⁶akasumi koona akatwamazire nabo nituliisa entaama, baatulindaga nyamusana n'ekiro.

¹⁷Habweki ekintu eki okiteekereze kandi orole ekyosobora kukikoraho; habwokuba mukama waitu yagenda kwizirwa akabi hamu n'ekaye yoona, munyangeso mbi mali, tasobora kuhuliriza omuntu ekyarukumugambira.”

¹⁸Abigairi yarahuka bwango, yakwata emigaati ebikumi bbibiri, endyanga z'amarwa ibiri, enyama y'entaama itaano enyakucumbirwe kurungi, ebigega by'engano ekarangire bitaano, empagara kikumi ez'emizabbibbu, ebitonge ebikumi bibiri eby'ebijuma by'emitini, yabitweka enkaina.

¹⁹Yaragira abaheereza be ati: “Murahuke bwango munyebembere, na nyowe nimbahondera.” Baitu eki, Nabbali iba atakimugambire.

²⁰Abigairi obwakaba atembere enkaina ye naagenda, naayekiika orusozi, kwija kurora, dara Daudi n'abasaija be nibaija nambere arukuruga, yabaitirana.

²¹Daudi akateekereza ati: “Nkatalibanira busa kulinda ebintu by'omuntu ogu ebikaba biri omwirungu, habintu bye byona, busaho na kimu ekyabuzire; nyowe ayamukoliire ebirungi, ninyowe akoliire ebibi.

²²Ruhanga naakanyite, obwire buraija kukya, abasaija be boona ndaaba mbamazireho.”

²³Abigairi obuyaboine Daudi, yaruga bwango ha nkaina ye, yajuumara omumaiso ge ha bigere bye.

²⁴Yagamba ati: “Mukama wange, nyowe nyenka ninyowe ojunaane; ninkusaba ohuliirize nyowe omuzaana wawe, kandi oikirize ebindukukugambira.

²⁵Eby'omuntu ogu Nabbali ataina ngeso, oleke kubifaaho. Nk'amakuru g'ibara lye, na uwe nukwo ali; ibara lye nuwe Nabbali amakuru galyo, ndoma, nikyo kirukumukoza ebi; baitu nyowe omuzaana wawe, abasigazi bawe watumire ntababone.

²⁶Mukama wange, nkurahiire MUKAMA ayakutangire kucwa omusango ogw'okuseesa esagama n'okwehorra enzigu n'omukono gwawe gwonyini, habweki abanyanzigwa bawe n'abo boona abanyakugonza kukukora akabi, babe nka Nabbali.

²⁷Mukama wange ninkusaba oikirize ekisembo kinu, nyowe omuzaana wawe ekindeesire, kiheebwe abasaija abo aboizire nabo.

²⁸Kandi ninkusaba onganyire byona ebinsobeze. MUKAMA nubwo alikufoora mukama hamu n'abaijukuru bawe, habwokuba noomurwanirra; kandi obwomeezi bwawe bwona, tolikora kabi.

²⁹Obuhalibaho omuntu akuseesira naayenda kukwita, MUKAMA Ruhanga wawe alikulinda kurungi nk'omuntu okwalinda itungo ery'omuhendo. Baitu abanyanzigwa bawe, alibahungura hara, nk'omuntu okwarasa amabaale na butida ye.

³⁰MUKAMA obwalikukorra ebintu ebirungi byona ebi yakunihiize, kandi akufoire omukama wa Isirairi,

³¹tihalibaho na kimu ekirikusaaliza rundi ekirikutuntuza habw'okuseesa esagama hataroho bulyo, rundi habw'okuhoora enzigu. Obu alikukorra ebirungi, bairaba onyijuke nyowe omuzaana wawe.”

³²Daudi yagamba Abigairi ati: “MUKAMA Ruhanga owa Isirairi anyakukutumire kunyitirana, akugizibwe.

³³Amagezi gawe gahaisanizibwe, na iwe wenka ohaisanizibwe habw'okuntanga kucwa omusango ogw'okuseesa esagama n'okwehorra enzigu n'omukono gwange.

³⁴Nkurahiire MUKAMA Ruhanga owa Isirairi, anyakuntangire kukukora akabi, kakuba obaire otaizire bwango kuntangana, obwire bwakwizire kukya, Nabbali tiyakusigaizeeho musaija noomu omwomeezi.”

³⁵Hanyuma Daudi yaikiriza Abigairi ebintu ebi yamuleetiire; yamuraga ati: “Orame, otaahe n'obusinge; ebyongambiire mbihuliire, kandi ekyonsabire nkikukoliire.”

³⁶Abigairi yagaruka omba Nabbali iba, yamusanga ateekere obugenyi omunju ye nk'obunyakuteekwa omukama. Nabbali akaba akyanganukire, habwokuba akaba atamiire; mukazi we obuyaboine biri biti, atagire ekyamugambiire, okuhika obwire obubwakiire.

³⁷Nyenkya obubwakiire, amarwa agamazire kumurugaho, mukazi we yamugambira byona ebyabaireho, yacwekwa enkizi yasarara yayoma nk'anyakufiire.

³⁸Obu haahingirweho ebiro nka ikumi, MUKAMA yamuteera yafa.

³⁹Daudi obu yahuliire Nabbali nkooku afiire, yagamba ati: “MUKAMA anyakumpooliire enzigu habw'ekijumo Nabbali eki yanjumire, yantanga nyowe omwiru we ndeke kukora akabi, akugizibwe; Nabbali ekibi ekiyakozire, MUKAMA akimusaswizeemu uwe wonyini rukikora.” Hanyuma Daudi yatuma abakwenda kwogereza Abigairi amuswere.

⁴⁰Abaheereza ba Daudi obubaahikire Karumeeri hali Abigairi, baamugambira bati: “Daudi atutumire, tumukutwarre akuswere.”

⁴¹Abigairi yaimuka yajuumara hansi yagamba ati: “Nyowe omuzaana wanyu, ndi muheereza ow'okunabya abairu ba mukama wange ebigere.”

⁴²Abigairi atasiibyemu, akaimuka yatemba enkaina, abazaana be bataano bamusendekereza; yakurata abakwenda abaatumirwe Daudi, Daudi yamuswera.

⁴³Daudi, kandi akaswera Ahinohamu owa Yezereeri; boombi yaikara nabo.

⁴⁴Omu kasumi ako, Saulo muhara we Mikaali muka Daudi, akaba amuswize Paruti mutabani wa Laisi ow'omurubuga Galimu.