Read Runyoro - rutooro 1 Sam 26 Bible Online

1 Sam 26 - Runyoro - rutooro bible

1 Sam 26

¹Haija abasaija abamu Abazifu, baagambira Saulo ngu: “Daudi ayeserekere harusozi Hakira, orunyakuli Burugaizooba obwa Yesimooni.”

²Saulo nukwo kwimuka ahonaaho aina abasaija enkumi isatu abakomere omu Isirairi, yagenda kuserra Daudi omwirungu erya Zifu.

³Yateera orukande harusozi orwa Hakira, enyakuli haihi n'oruguudo, Burugaizooba bwa Yesimooni. Baitu Daudi, uwe yaikara omwirungu; kandi obu yahuliire ngu Saulo amuhondiire,

⁴yatuma entasi, yamanya Saulo nkooku akaba aizire kwo.

⁵Daudi nukwo kwimuka yahika ha kiikaro nambere Saulo akaba atiire orukande; yayetegereza ekiikaro ekyakaba abyamiremu hamu na Abbuneeri mutabani wa Neeri engabwa y'iherye; Saulo akaba ali omurukande abyamire, amahe gamwehinguliriize.

⁶Daudi nubwo yakagwize Ahimereki Omuhiiti na Abisayi owanyina Yowabu mutabani wa Zerwiya ati: “Hali inywe ababiri, nooha ou ndaagenda na uwe omurukande rwa Saulo?” Abisayi yagarukamu ati: “Nyowe ndaagenda na iwe.”

⁷Kiro eki, Daudi na Abisayi baagenda omurukande, baasanga Saulo abyamire omurukande hagati, icumu lye lisimbire hamusago gwe; Abbuneeri n'amahe gabyamire gamwehinguliriize.

⁸Abisayi nubwo yagambire Daudi ati: “Kiro kinu, omunyanzigwa waawe, Ruhanga amukuhaire; hati nu, leka mmuteere icumu limu lyonka, limuturuukane litaahe omwitaka, timmwongere erya kabiri.”

⁹Baitu Daudi yagarukamu Abisayi ati: “Leka, otakisura! Weena alikoraho akabi omukama we ayakomerwe, mazima kwo MUKAMA alimufubira.”

¹⁰Yayongera yagamba Ati: “Ndahiire MUKAMA omwomeezi, nkimanyire kurungi, MUKAMA wenka nuwe aliita Saulo, rundi akasumi ke ak'okufa kalihika, afe abantu boona nkooku bafa, rundi aligenda omu bulemu, obu nubwo aligwamu.

¹¹Nikikafuuhe, nyowe kukora akabi omuseeswaho magita wa MUKAMA; ihayo icumu lye n'enjooje[6] ey'amaizi ebinyakuli ha musago tugende.”

¹²Daudi nukwo yatwaire ati icumu n'enjooje, yabiiha ha musago gwa Saulo; baagenda. Eki, busaho muntu noomu ayakiboine, busaho noomu ayakimanyire kandi busaho noomu ayasisiimukire; boona bakaba bagwijagiire, habwokuba MUKAMA nuwe yabagwijagiize oturo otuli nk'otu.

¹³Daudi nubwo yagenzire ha rubaju orundi, yayemerra hara hamutwe gw'orusozi, aho nambere yayemerire, hakaba haroho omwanya mukooto ogurukubaahuranamu.

¹⁴Yayeta ihe n'Abbuneeri mutabani wa Neeri naagamba ati: “Abbuneeri, tongarukamu?” Abbuneeri yakaguza ati: “N'oha ogu arukutoka kusisiimura omukama?”

¹⁵Daudi yakaguza Abbuneeri ati: “Iwe toli musaija? Omu Isirairi yoona n'oha arukukwingana? Kiki ekirukukutanga kulinda mukama wawe omukama? Hati bunu bunu, haroho omuntu anyakutaahire omu rukande naayenda kumwita.

¹⁶Ekyokozire, tikihikire, ndahiire MUKAMA omwomeezi, inywena musemeriire kufa, habwokuba mukama wanyu, omuseswaho magita wa MUKAMA, timumulinzire. Hati orole, icumu ly'omukama, n'enjooje ey'amaizi ebinyakubaire hamusago gwe, biri nkaha?”

¹⁷Saulo nubwo yahuliire iraka lya Daudi, yakaguza ati: “Daudi mwana wange eri iraka lyawe?” Daudi yagarukamu ati: “Mukama wange mwebingwa, ego iraka lyange.”

¹⁸Yayongera yagamba ati: “Mukama wange, nyowe omwiru wawe noonkuratirirra ki? Nkakora ki? Nkacwa musango ki?

¹⁹Hati nu Mwebingwa, ohurre nyowe omwiru wawe ebi ndukugamba. MUKAMA obwaraaba ali nuwe yakwimukiriize kundwanisa, aikirize ekihongwa; baitu obubaraaba bali bantu, MUKAMA abakyene, habwokuba kiro kinu, bambingire nukwo ndeme kutunga omugabo omubugwetwa bwa MUKAMA, nibagamba bati: ‘Genda oheereze embandwa.’

²⁰Habweki otaikiriza esagama yange kuseeseka haitaka ntali omumaiso ga MUKAMA; habwokuba omukama wa Isirairi ekyaiziriire nukwo kunyita, naasisana nk'omuntu kahiiga ndahi omu nsozi.”

²¹Saulo nubwo yagarukiremu ati: “Mwiru wange Daudi, wegarukireyo, ninyowe nasobeze, baitu tindyongera kulengaho kukukora akabi, habwokuba kiro kinu, orozire obwomeezi bwange nkooku kiri kintu ky'ekitiinisa; nkakora eky'obudoma kandi nkasobya muno.”

²²Daudi yagarukamu ati: “Agutamba icumu lyawe daralyo, tuma omu ha basigazi bawe alitabarre.

²³MUKAMA aheera buli muntu habw'oburungi bwe n'obwesige bwe; kiro kinu akuntairege omungaro, baitu tingondeze kukora akabi omuseswaho magita wa MUKAMA.

²⁴Kiro kinu, nkooku ndozire obwomeezi bwawe kiri kintu ky'omuhendo, obwomeezi bwange nabwo bube bw'omuhendo omumaiso ga MUKAMA, anjune emihito yoona.”

²⁵Saulo nubwo yagambire ati: “Mwiru wange Daudi, MUKAMA akuhe omugisa! Olikora ebintu bingi kandi olibikora kurungi mali.” Daudi nukwo kukwata omuhanda gwe yagenda, Saulo na uwe yagaruka omuka ye.