Read Runyoro - rutooro 1 Sam 28 Bible Online

1 Sam 28 - Runyoro - rutooro bible

1 Sam 28

¹Obuhaahingwireho akasumi, Abafirisiti bakazinisa amahe gaabu barwanise Abaisirairi. Akisi akagambira Daudi ati: “Omanye, iwe n'abasaija bawe, nkooku turukwija kugenda hamu omwihe.”

²Daudi yagarukamu Akisi ati: “Ego nyikiriize, Obu, nubwo oraamanya nyowe omwiru wawe ekindukusobora kukora.” Akisi yagambira Daudi ati: “Otyo! Ninyija kukufooora mulinzi wange ow'orutekerro.”

³ Omu kasumi ako, Samwiri akaba amazire kufa, Abaisirairi boona bakamulirirra, baamuziika Rama omurubuga rwe rwonyini. Omubwire obu, abaabandwaga emizimu n'abarogo, Saulo akaba ababingire omunsi.

⁴Amahe g'Abafirisiti gakeesorooza baateera orukande Sunemu; Saulo na uwe nukwo kusorooza Abaisirairi boona, nabo baateera orukande Giriboha;

⁵Saulo obuyaboine ihe ery'Abafirisiti, yatiina enkizi yaserra kumwita.

⁶Obuyayekagwize hali MUKAMA, MUKAMA atamugarukemu naamuroosa, n'amutumaho banyakatagara rundi abarangi.

⁷Saulo nubwo yaragiire abaheereza ati: “Munserurre omukazi arukubandwa emizimu, nuwe ngende nyekaguzeeho.” Abaheereza be baamugarukamu bati: “Endoori, nuho hali omukazi arukubandwa emizimu.”

⁸Saulo nukwo kwehindura aleke kumanyirirwa, yajwara ebyokujwara ebindi, obwire obubwamazire kwira, yagenda mb'omukazi oli hamu n'abasaija babiri. Saulo yaragira omukazi ati: “Ndagura nooyekonyeza omuzimu, ondeetere omuntu wena ou ndaakugambira ibara.”

⁹Omukazi yamugarukamu ati: “Ningira omanyire Saulo ekiyakozire, nkooku yabingire boona abanyakubandwa emizimu n'abarogo yabamara omunsi. Hati iwe, nontegera ki omutego ogw'okunyita.”

¹⁰Saulo yarahira omukazi naajurra MUKAMA ati: “Ndahiire MUKAMA omwomeezi, obu oraakora ekintu kinu, torukwija kuhikwaho kifubiro na kimu.”

¹¹Omukazi nubwo yakagwize Saulo ati: “Nkwetere oha?” Saulo yagarukamu ati: “Nyetera Samwiri.”

¹²Omukazi obuyaboine Samwiri, yatoka muno yakaguza Saulo ati: “Ombiihiire ki? Ka niiwe Saulo.”

¹³Omukama yagarukamu omukazi ati: “Otatiina; yamukaguza ati: Noorora ki?” Omukazi yagarukamu ati: “Nindora omuzimu niguruga omwitaka.”

¹⁴Saulo yayongera yakaguza omukazi ati: “Omuzimu ogu nigusisana guta?” Omukazi yagarukamu ati: “Omugurusi nuwe ndukurora naatemba; ajwaire ekanzu.” Saulo nukwo kumanya omuntu ogu nkooku ali Samwiri, yajuumara hansi, yamutamu ekitiinisa.

¹⁵Samwiri yakaguza Saulo ati: “Ontalibaniriizeeki kundeeta hanu?” Saulo yagarukamu ati: “Ndi omukabi akatagambwa; nindwana na Abafirisiti, kandi Ruhanga andugireho takyangarukamu naaraba omu barangi, rundi omukundoosa ebirooto, nukwo kukweta ongambire ekinsemeriire kukora.”

¹⁶Samwiri yakaguza Saulo ati: “MUKAMA obwaraaba yakurugireho yafooka munyanzigwa waawe, kandi nyowe nonkaguliza ki?

¹⁷MUKAMA akukozire ekiyakugambiriire omuli nyowe; obukama abukwihireho, yabuha omutaahi ou oherraine nawe, nuwe Daudi.

¹⁸Habwokuba otahurre MUKAMA ekiyakuragiire, tiwahweekereza Abamaleki n'ebintu byabo byona, nikyo MUKAMA arukukukorra ati.

¹⁹Torukwija kugarukira aho honka, Abaisirairi boona na iwe otabuziremu, naija kubaihamu emikono abalekere Abafirisiti; ijo, iwe n'abatabani bawe muliija nambere ndi, ihe ery'Abaisirairi MUKAMA nukwo abalekere Abafirisiti.”

²⁰Saulo, habw'obutiini nyamwingi obw'ebigambo Samwiri ebiyagambire, ahonaaho yayeteera hansi; wena amaani gaamuhwamu, habwokuba akaba asiibire kandi araire ataliire kantu.

²¹Omukazi yahikaho Saulo yamugambira ati: “Nyowe omuzaana wawe mpuliirege ekyogambire, obwomeezi bwange nabuhwamu nakora ekyondagiire;

²²hati nu na iwe, hurra nyowe omuzaana wawe; ka nkucumbire akookulya olyeho, nukwo obone agarubata orugendo rwawe.”

²³Saulo yayanga, yagamba ati: “Tindukwija kulya.” Baitu abaheereza be hamu n'omukazi oli baamuhambiriza muno; nukwo kwikiriza ebibaamugambiire. Yaimuka hansi yaikarra ha kitabu.

²⁴Omukazi ogu, akaba aina enyana egomokere, yagiita bwango, yakwata ensaano yagituga, yagicumbamu omugaati ogutatumbisiibwe,

²⁵yagusembereza Saulo n'abaheereza be; baalya. Obu baamazire kulya ha kiro eki kyonyini, baagenda.