Read Runyoro - rutooro 1 Sam 3 Bible Online

1 Sam 3 - Runyoro - rutooro bible

1 Sam 3

¹Omwana Samwiri akaikara naaheereza MUKAMA, naaroleererwa Eri. Omu biro ebi, MUKAMA tiyakiraga kubaza; kandi tiyaikaraga naayeyoleka.

²Omu kasumi ako, Eri akaba atandikire kusisikara amaiso atakyahweza kurungi, akaba abyamire omukisiika kye;

³etaara ya Ruhanga ekaba etakazimire, kandi Samwiri akaba abyamire omunju ya MUKAMA nambere haikaraga Esanduuko ey'Endagaano ya Ruhanga.

⁴MUKAMA nubwo yayesire ati: “Samwiri! Samwiri!” Samwiri yayetebuka ati: “Taata!”

⁵Yairuka yagenda hali Eri yamugambira ati: “Nyizire, habwokuba onyesire.” Eri yagarukamu ati: “Ka ntakwesire, garukayo obyame.” Samwiri yagarukayo yabyama.

⁶MUKAMA yayongera yayeta ati: “Samwiri!” Samwiri yaimuka yahikaho Eri yamugambira ati: “Nyizire, habwokuba onyesire.” Eri yagarukamu ati: “Mwana wange tinkakwesire; garukayo obyame.”

⁷Obu, Samwiri akaba atakamanyire MUKAMA, ekigambo kye kikaba kitakamusukuliirwe.

⁸MUKAMA yayongera yayeta Samwiri omurundi gwa kasatu, Samwiri nabwo yaimuka yahikaho Eri yamugambira ati: “Nyizire, habwokuba onyesire.” Eri yakenga nkooku MUKAMA nuwe akaba naayeta omwana ogu.

⁹Nukwo kumugambira ati: “Garukayo obyame; obwaraagaruka akakweta, ogarukemu oti: ‘MUKAMA gamba, omwiru wawe naahurra.’ ” Samwiri yagarukayo yabyama.

¹⁰MUKAMA yaija yayemerra haihi, yayeta nkooku yamwetaga kara koona ati “Samwiri! Samwiri!” Samwiri yagarukamu ati: “Gamba omwiru wawe naahurra.”

¹¹Nubwo MUKAMA yagambiire Samwiri ati: “Omu Isirairi ninyija kukoramu ekintu ekirihuniriza buli muntu ow'alikihurra.

¹²Ha kiro eki, nubwo ndihikiriza byona ebinagambire ha nju ya Eri okuruga ha kubanza okuhika ha mpero.

¹³Omugambire ngu: Ninyija kuhwerekereza enju ye ebiro byona, habwokuba akamanya abaana be nkooku bakaba nibajuma Ruhanga, tiyabahana.

¹⁴Habweki, ndahiire, ebiro byona, tihalibaho kyonzira rundi ekihongwa ekiriganyiza enju ya Eri, omukyeno gw'ekibi ekirukwingana aho.”

¹⁵Samwiri yabyama okuhika obwire obubwakiire; nubwo yakingura enyigi ez'enju ya MUKAMA. Baitu ekigambo eki, akatiina kukigambira Eri.

¹⁶Eri yayeta Samwiri ati: “Samwiri mwana wange” Samwiri yayetebuka ati: “Taata.” Eri yamukaguza ati:

¹⁷“MUKAMA akugambiirege ki? Otakinsereka. Obwotangambire byona ebyakugambiire, akufubirre kimu.”

¹⁸Samwiri nukwo kugambirra kimu Eri ataina na kimu eki arukumusereka. Eri yagamba ati: “Nuwe MUKAMA; k'akole ekyarakasiima.”

¹⁹Samwiri akeeyongera kukura, MUKAMA yamwikarahoga, kandi kyona ekiyakagambaga, kyahikirraga.

²⁰Isirairi yoona okuruga Daani okuhika Beeri-seba nukwo kumanya Samwiri nkooku akaba ali murangi wa MUKAMA ow'amazima.

²¹MUKAMA akongera yabonekera Samwiri, Siiro nambere yasangirwe amubonekiire okubanza; kandi nambere yabaliize na uwe. Samwiri obuyabazaaga, Isirairi yoona yahurraga.