Read Runyoro - rutooro 1 Sam 30 Bible Online

1 Sam 30 - Runyoro - rutooro bible

1 Sam 30

¹Ha kiro ekya kasatu, Daudi n'abasaija be eki baahikiireho Zikiraga, Abamaleki bakaba bamazire kuseesira Negebbu na Zikiraga. Zikiraga bagisingwire kandi bagyokeze n'omurro,

²banyagire abakazi na boona abakaba barumu, abato n'abakuru; bataine muntu noomu, baitu bakabanyaga baabatwara.

³Daudi n'abasaija be obubaahikire omurubuga, bakasanga orubuga ruhiire, bakazi baabu, batabani baabu na bahara baabu banyagirwe.

⁴Daudi n'abo abakaaba ainabo, baateera ekyoboobo, baarra okuhika amaani obugaabahoire, baalemwa n'ag'okwongera kurra.

⁵Na baka Daudi ababiri: Ahinohamu owa Yezereeri, n'Abigairi muko mubule Nabbali owa Karumeeri, nuho bagenderaine.

⁶Daudi yaba omu mwetunturo ogutagambwa; habwokuba abantu be boona habw'okufeerwa batabani baabu na bahara baabu, bakaba nibasaalirwa muno, nukwo kugamba kumuteera amabaale; baitu MUKAMA Ruhanga we yamugumya.

⁷Yaragira Abyasara nyakatagara mutabani wa Ahimereki ati: “Ndeetera efodi” egi, Abyasara yagimuleetera.

⁸Daudi nubwo yayekagwize hali MUKAMA ati: “Abaseesi abo mbahondere? Ndabakwata?” MUKAMA yamugarukamu ati: “Bahondere noija kubakwata kandi abanyagwa obanagise.”

⁹Daudi nukwo kwimukya hamu n'abasaija be rukaaga abaakaba ainabo, baahika hakasaaru Besora, abamu hali bo, abo nubo baasigaire.

¹⁰Daudi yairrayo, aina abasaija ebikumi bbina; ebikumi bibiri abakaba bajwaahire muno batarukusobora kwambuka akasaaru Besora, baasigara enyuma.

¹¹Abasaija abaikaraga na Daudi, bakasanga Omunyamisiri ali omubwerre, baamumuleetera; baamuha ebyokulya yalya, baamuha n'amaizi g'okunywa,

¹²baamuteeraho n'ekitonge eky'ebijuma by'emitini, n'empagara ibiri ez'emizabbibbu. Obuyamazire kulya yagarukwamu amaani; habwokuba akaba amazire ebiro bisatu musana n'ekiro ataliire by'okulya kandi atanywire maizi.

¹³Hanyuma Daudi yamukaguza ati: “Oli muntu w'oha, kandi nooruga ha?” Oli yagarukamu ati: “Nyowe ndi musigazi Munyamisiri, ndi muheereza w'Omumaleeki; mukama wange akansiga habwokuba nkarwara, hati hahingwireho ebiro bisatu.

¹⁴Tukaba tuseesiire Negebbu ey'Abakeresi, eya Yuda, na Negebbu eya Kalebbu; Zikiraga twagyokya n'omurro.”

¹⁵Daudi yamukaguza ati: “Abaseesi aboosobora kubampikyaho?” Omusigazi yagarukamu ati: “Ndahira noojurra Ruhanga, nkooku otanyite, kandi nkooku otante omumikono ya mukama wange, nukwo mbakuhikyeho.”

¹⁶Omusigazi nambere yahikiizeeyo Daudi, bakasanga bamoomere ensi yoona, bali omukulya n'okunywa, nibazina habw'eminyago enyingi ei bakaba banyagire omu nsi ey'Abafirisiti n'eya Yuda.

¹⁷Daudi yabaita okuruga obwire nibukwata amaiso okuhika omurwiririzi orw'ekiro ekyakurasireho; okwihaho abasigazi ebikumi bbina abaatembere engamiya bairuka, busaho noomu ayatabukire.

¹⁸Byona Abamaleki ebibakaba banyagire akabigarra hamu n'abakazi be ababiri.

¹⁹Byona ebikaba binyagirwe busaho ekyasigaireyo, ekitoito n'ekikooto, abaana aboojo n'abaisiki. Buli kintu ekikaba kinyagirwe, byona akabigarra.

²⁰Kandi yanyaga namagana goona ag'embuzi n'ag'enimi; abasaija be baagafunya, uwe naabahondera, nibagamba bati: “Ogu nugwo munyago gwa Daudi.”

²¹Hanyuma Daudi yahikaho abasaija bali ebikumi bibiri, abaajwahire muno, baalemwa ag'okumuhondera, baasigara ha kasaaru Besora; abasaija baija kutangaana Daudi, n'abaakaba ainabo. Daudi obuyabahikireho, yabaramukya.

²²Abasaija abamu ababi kandi abataina ngeso abakaba bagenzire na Daudi, nubwo baagambire bati: “Abo batagende na itwe, habwaki babagana ha munyago ogu tuleesire, titurukwija kubahaho; buli musaija atwale mukazi we n'abaana; bagende.”

²³Daudi yagarukamu ati, “Bagenzi bange, eki mutakisura, mumazire kurora byona MUKAMA ebyatukoliire! Akatulinda, abaseesi abo abaatuseesiire, yatuha kubasingura.

²⁴Ekimurukugamba, busaho noomu asobora kukiikiriza. Abantu boona basemeriire kwinganaingana: ogu ayagiire ha bulemu omugabo ogu araatunga, noogu ayasigaire naalinda ebintu, na uwe nugwo aratunga.”

²⁵Okuruga ha kiro eki, eki yakifoora kiragiro mali, ekikyaroho omu Isirairi, okuhika na hati.

²⁶Daudi obuyagarukire Zikiraga, yakwata ekicweka eky'omunyago yakitwekera banywani be bakuru b'abantu ba Yuda naagamba ati: “Mbahaire ekisembo nkikyo, kirugire hamunyago ogwanyagirweho abanyanzigwa ba MUKAMA;”

²⁷Ekisembo eki, ky'abantu aba Beseri, Ramoosi eya Negebbu na Yatiri,

²⁸Abaroheri, Sifumoosi, Esitemoha,

²⁹aba Rakali omu mbuga ez'Abayerameeri, omumbuga ez'Abakeeni,

³⁰aba Horuma, aba Borasaani, ab'Ataki,

³¹aba Heburooni, ky'abantu ab'omubiikaro byona, Daudi n'abasaija be ebi bakaba bahikiremu.