Read Runyoro - rutooro 1 Sam 31 Bible Online

1 Sam 31 - Runyoro - rutooro bible

1 Sam 31

¹Abafirisiti bakarwanisa Abaisirairi baababinga. Abaisirairi baingi bakagwa omubulemu obu, obwarwaniirwe harusozi Giriboha, abaasigaireho, omuli abo Saulo n'abatabani batabuziremu, bairuka.

²Baitu Abafirisiti; Saulo bamukwata, baita abatabani basatu Yonasaani, Abinadabu na Malikisuha.

³Saulo obulemu bukamwija kubi muno; emisogi y'abanyanzigwa yamuhweraho yamuhutaaza.

⁴Nubwo yagambire omwetweki w'eby'okurwanisa bye ati: “Somora empirima yawe onsonge abatasazirwe abo bataikara kunyita bakanyebugira.” Baitu omwetweki w'ebyokurwanisa bye akatiina muno, obutiini butamwikirize kukora eki. Saulo nukwo kukwata empirima ye, yagyenagaho.

⁵Omwetweki w'ebyokurwanisa bye obuyaboine Saulo mukama we nkooku afiire, na uwe yayenaga ha mpirima ye, yatwarwa na Saulo.

⁶Batabani be basatu, omwetweki w'ebyokurwanisa bye, n'abasaija be boona, nukwo baafeeriire hamu kiro kimu bati.

⁷Abaisirairi abakaba bali ha rubaju orundi orw'ekihanga, na bali abakaba bali obuseeri bwa Yorudaani obubaaboine Abaisirairi nkooku bairukire, kandi Saulo na batabani be nkooku bafiire, embuga zaabo baazirugamu bairuka; Abafirisiti nukwo kwija kuzeetungira.

⁸Ha kiro ekyakurasireho, Abafirisiti obubaizire kujuura emitumbi, bakasanga Saulo na batabani be basatu baamazire kufeera harusozi Giribeho.

⁹Bacwaaho omutwe gwa Saulo bamujuura, eby'okurwanisa bye, baabikwasa abakwenda, babirabya omunsi y'Abafirisiti yoona, bahikyeho amakuru amarungi omubiikaro ebiikarwamu ebisisani ebi baramya, noomu bantu baabu.

¹⁰Eby'okurwanisa bye bakabita omunju y'embandwa Asitarosi, kandi omutumbi gwe, baaguhanika ha kisiika kya Besi-saani.

¹¹Enzaarwa za Yabbesi-giryadi obubahuliire Abafirisiti ekibakozire Saulo,

¹²abasaija boona emanzi baimukya baarubata okukiisa obwire, omutumbi gwa Saulo n'e'yabatabani be bagihanuura hakisiika kya Besi-saani bagitwara Yabbesi, oku nuho baagyokiize.

¹³Amagufa gaabu baagatwara baagaziika hansi y'omuti omunyinya ogwa Yabbesi, baasiiba okumara ebiro musanju.