Read Runyoro - rutooro 1 Sam 5 Bible Online

1 Sam 5 - Runyoro - rutooro bible

1 Sam 5

¹Abafirisiti obubaamazire kunyaga Esanduuko y'Endagaano ya Ruhanga, bakagiiha Ebenezeeri baagitwara Asidodi;

²hanyuma baagitwara omunju y'embadwa yaabu Dagoni, baagita haihi n'ekisisani kye.

³Nyenkya Abasidodi obubaimukire, bakasanga ekisisani kya Dagoni kigwire kijuumaire omumaiso g'Esanduuko y'Endagaano ya MUKAMA. Baakiimukya baakigarra omukiikaro kyakyo.

⁴Obubaimukire ha kiro ekyakurasireho, nabwo bakasanga kigwire kijuumaire omumaiso g'Esanduuko y'Endagaano ya MUKAMA, omutwe n'emikono yombi ecwekereho, eri ha kiti ky'omulyango; hasigaireho ekinkulinkuli kyonka.

⁵Okuruga obu n'okuhika hati, baanyakatagara ba Dagoni n'abo boona abanyakumuramya ab'omunsi Asidodi nikyo batarubatira ha kiti ky'omulyango, Dagoni nambere yagwire.

⁶MUKAMA akafubira Abasidodi ataina mbabazi, yabakanga, yabarwaza ebizimba, ensi Asidodi n'ensi eyalemwaga omulemi wa Asidodi.

⁷Abasidodi obu baboine ekirukubaho, nukwo kugamba bati: “Titukyasobora kwikara n'Esanduuko y'Endagaano ya MUKAMA, nuwe arukutufubira, kandi nuwe arukufubira na Dagoni embandwa yaitu.”

⁸Nukwo kutuma abantu beete abalemi boona ab'Abafirisiti, baabakaguza bati: “Esanduuko y'Endagaano ya Ruhanga owa Isirairi tugikole ki?” Baabagarukamu bati: “Mugitwale Gaasi.” Na bo nukwo baakozire, baagitwara Gaasi, orubuga orundi orw'Abafirisiti.

⁹Baitu obubaamazire kugihikyayo, MUKAMA yafubira orubuga oru, yafubira abato n'abakuru, boona baarwara ebizimba.

¹⁰Baagitweka Ekuroni, orubuga orundi orwa Abafirisiti. Obuyahikireyo, abantu baayo baatabaana bati: “Mawe, batuleetiire Esanduuko y'Endagaano ya Ruhanga owa Isirairi, etwite kandi ite n'abantu baitu.”

¹¹Abalemi baagambira abantu abo bati: “Esanduuko y'Endagaano ya Ruhanga wa Isirairi, mugitweke eruge hanu, egaruke omukiikaro kyayo, etaija kutwita n'abantu baitu.” Habwokuba omurubuga rwona, abantu bakaba nibafa, Ruhanga akaba naabafubirra kimu.

¹²Abatarafiire, baarwara ebizimba, orubuga rwateera ekyoboobo ekyahikire haiguru.