Read Runyoro - rutooro 1 Sam 6 Bible Online

1 Sam 6 - Runyoro - rutooro bible

1 Sam 6

¹Esanduuko y'Endagaano ya MUKAMA obuyamazire omunsi y'Abafirisiti ameezi musanju,

²abantu bakeeta baanyakatagara n'abaraguzi baabakaguza bati: “Esanduuko y'Endagaano ya MUKAMA, tugikole ki? Mutugambire omukiikaro kyayo turagigarrayo naki?”

³Baagarukamu bati: “Obumuraaba nimugigarrayo, mutagigarrayo yonka, baitu mutwekereho MUKAMA ekisembo eky'okubaganyiza ebibi byanyu nubwo mulikira kandi mulikimanya ekyamwikaize nabafubira.”

⁴Baakaguza bati: “Ekihongwa eky'okuganyiza omusango ekituraamutwekera, nikiha?” Baagarukamu bati: Ebisisani eby'ebizimba bya zaabbu bitaano, n'embeba za zaabbu itaano, ebirukwinganaingana n'omuhendo ogw'abalemi ab'Abafirisiti; habwokuba kagingo eyabahikireho inywena, niyo yahikireho n'abalemi banyu.

⁵Habweki, kibahikiriire, mukole ebisisani eby'ebizimba byanyu, n'eby'embeba zanyu ezirukusiisa ensi, kandi muhe ekitiinisa Ruhanga owa Isirairi; rundi nubwo araalekera aho kubafubira n'embadwa zanyu, n'ensi yanyu.

⁶Habwaki nimugumanganiza emitima yanyu nk'Abanyamisiri na Faraaho? Ruhanga obuyamazire kubaleetera akabi, abantu batabaikirize kugenda, kandi baagenda kwo?

⁷Hati nu, muteekanize ekigaali ekihyaka, muleete ente ibiri ezirukukamwa, ezitakahikwahoga kikoligo, mwitwale omuka.

⁸Hanyuma Esanduuko ey'Endagaano ya MUKAMA, mugite ha kigaali eki, kandi ebintu ebya zaabbu ebimurukumutwekera, biri kihongwa eky'okuganyiza omusango, mubite omu sanduuko endi, nayo mugite haihi neeri, hanyuma mugitweke, ebarugeho egende.

⁹Mugiteho amaiso; obweratoma omuhanda ogurukutwara omunsi yayo yonyini, ogurukugenda Besi-semesi, aho nuho turaamanyira nkooku Ruhanga owa Abaisirairi nuwe yatuleetiire akabi kanu akakooto; baitu obwetaatome omuhanda ogu, turaamanya nkooku atali nuwe ayatuleetiire akabi kanu akatagambwa, buli kakaija konka kaatugwera.

¹⁰Abantu baakora ekibaabaragiire, baakwata ente ibiri ezirukukamwa, baazibohaho ekigaali, enyana zaazo baazigarra omu ka omunju y'ente.

¹¹Hanyuma, baata ha kigaali Esanduuko y'Endagaano ya MUKAMA, baata ha kigaali Esanduuko y'Endagaano ya MUKAMA, hamu n'esanduuko enyakurumu embeba eza zaabbu, n'ebisisani eby'ebizimba byabo.

¹²Ente zaagenda itereekeriire, zaakwata omuhanda ogurukutwara Beesi-semesi, ziri omumuhanda gumu ogu, itarukugurugamu, kunu niijuga; itakubuke ha mukono gw'obulyo, rundi ha gw'emoso, abalemi ab'Abafirisiti bakagenda baikuraatiire, okuhikira kimu hamutaano ogwa Beesi-semesi.

¹³Omu kasumi ako, abantu aba Beesi-semesi bakaba bali omwigesa ly'engano yabo omukihanga; obubaimukize amaiso, baabona Esanduuko ey'Endagaano, baagenda kugitangirra, baijwire omuhimbo.

¹⁴Ekigaali obukyahikire ha musiri gwa Yosuha owa Besi-semesi, kyayemerra. Aho nambere kyayemeriire, hakaba haroho ibaale likooto; baayasa ekigaali, ente baaziita, baazokya, baazihongera MUKAMA, zaaba kihongwa eky'okwokya.

¹⁵Abaleevi baihaho Esanduuko ey'Endagaano ya MUKAMA, hamu n'Esanduuko endi ey'ekaba egiri ha rubaju, erumu ebintu ebya zaabbu, ebi byona baabita ha ibaale liri erikooto; ha kiro eki, abantu aba Beesi-semesi, bakahonga ebihongwa eby'okwokya, kandi baatambira MUKAMA ebyonzira.

¹⁶Abakama abataano ab'Abafirisiti obubaaboine ebi, ha kiro eki baagaruka Ekuroni.

¹⁷Binu nibyo bizimba ebya zaabbu, Abafirisiti ebi baatwekiire MUKAMA, bibe kihongwa eky'okwihisaaho omusango: Asidodi kimu, Gaaza kimu, Asikeroni kimu, Gaasi kimu, na Ekuroni kimu;

¹⁸kandi bakatweka n'embeba eza zaabbu, ezirukwinganaingana omuhendo ogw'embuga eza Abafirisiti; abaalemwaga abalemi abataano, embuga ezombekerwe kurungi zaaguma, n'ebyaro ebitazitiriirwe. Ibaale liri erikooto ery'omumusiri gwa Yosuha owa Beesi-semesi, eribaataireho Esanduuko ey'Endagaano ya MUKAMA, likyaliyo okuhika na hati, nubwo bwakaiso obw'ekintu eki ekyabaireho.

¹⁹MUKAMA akaita abantu aba Beesi-semesi nsanju habwokuba bakalinguza omu Sanduuko y'Endagaano, abantu barra, habwokuba MUKAMA akaita abantu baingi muno.

²⁰Abantu ba Beesi-semesi nukwo kugamba bati: “Nooha asobora kwemerra omumaiso ga MUKAMA, Ruhanga omuhikiriire onu? Okumwejuna turaamukwatiriza oha?”

²¹Nubwo baatumire abakwenda omu bantu aba Kiryasi-yalimu nibagamba bati: “Abafirisiti bagarwire Esanduuko ey'Endagaano ya MUKAMA, mwije mugitabarre mugitwale owanyu.”