Read Runyoro - rutooro 1 Sam 8 Bible Online

1 Sam 8 - Runyoro - rutooro bible

1 Sam 8

¹Samwiri obuyagurusire, abaana be nubo yafoora bacwi b'emisango ba Isirairi.

²Ibara ly'omwana we omuzigaijo, nuwe Yoweri, omusubiro nuwe Abiya; emisango baagicweraga Beeri-seba.

³Baitu abaana abo, batabe n'engeso nke'zaise bo, omutima bakagumarra ha sente, nukwo kweha kulya enguzi n'okutagendera habwinganiza.

⁴Abakuru boona aba Isirairi, nukwo kwesorooza, baagenda Rama hali Samwiri,

⁵baamugambira bati: “Hati, wakura, kandi abaana bawe tibaina ngeso nk'ezaawe; otukomere omukama ow'okutulema, na itwe tube n'omukama nk'amahanga agandi goona.”

⁶Baitu ekintu eki eky'okusaba omukama, kikabiihiza Samwiri, uwe nukwo kusaba MUKAMA.

⁷MUKAMA yagambira Samwiri ati: “Ohurre kyona abantu ekibarukukugambira; habwokuba tibangire iwe, bangire nyowe, ndeke kuba mukama wabo nkabalema.

⁸Byona ebibaakankozire okuruga ha kiro ekinabaihiireho Misiri okuhika na hati: nk'okundugaho n'okuheereza embandwa, hati nibyo barukukukora na iwe.

⁹Habweki, iwe ohurre ekibarukugamba; kyonka obahabule kurungi, kandi obakengese engeso z'omukama arukwija kubalema.”

¹⁰Ebigambo MUKAMA ebiyagambire, Samwiri nukwo kubagambira abantu abo, abakaba nibamusaba omukama.

¹¹Yabagambira ati: “Binu nibyo mukama wanyu alibakora: abamu ha baana banyu, alibafoora baserikale, abamu hali bo baheerezeege omu bulemu obunyakurwanirwa ha bigaali, abandi baheerezeege omu bulemu obunyakurwanirwa ha mbaraasi, abandi bairukege omumaiso g'ebigaali bye.

¹²Abamu alibafoora ngabwa ez'abantu enkumi n'ab'amakumi ataano, kandi abandi balimi abaramulimiraga, abaraamugeseraga, kandi abaraamuheesiraga ebyokurwanisa n'ebintu eby'ebigaali bye.

¹³Alitwara bahara banyu bamukorrege ebintu ebirukuboya, bamucumbirege ebyokulya n'emigaati.

¹⁴Emisiri yanyu, ey'emizabbibbu, n'ey'emizaituni erukukirra kimu yoona oburungi, aligibaihaho agihe abaheereza be.

¹⁵Ha ngano yanyu na hamisiri yanyu ey'emizabbibbu, aliihaho kimu kya ikumi, akihe abalemi be n'abaheereza be.

¹⁶Abairu banyu n'abazaana banyu alibabaihaho, ente n'enkaina zanyu ezirukukirra kimu oburungi, alizibaihaho azikoze omulimo gwe.

¹⁷Ha magana ganyu ag'embuzi, alitwaraho kimu kya ikumi, kandi inywe inywenka, mulifooka bairu be.

¹⁸Ekiro eki obu kirihika, muliteera omukungo habw'omukama wanyu ogu ou mwayekomiire; baitu obu, MUKAMA talibaanukura.”

¹⁹Baitu abantu baayanga kuhurra Samwiri ekiyabagambiire; baagamba bati: “Nangwa! Nitwenda omukama,

²⁰na itwe nukwo tusisane n'amahanga agandi goona, omukama waitu ogu, nukwo atuleme, atwebembere, aturwanire amalemu.”

²¹Samwiri obuyamazire kuhurra byona abantu ebibaagambire, yagenda yabigambira MUKAMA.

²²MUKAMA yagambira Samwiri ati: “Bakorre ekibarukwenda obahe omukama.” Samwiri nubwo yagambiire Abaisirairi ati: “Buli omu ataahe owabu.”