Read Runyoro - rutooro 1 Sam 9 Bible Online

1 Sam 9 - Runyoro - rutooro bible

1 Sam 9

¹Hakaba haroho omusaija ow'oruganda rwa Benyamiini, mutabani wa Abyeri, mwijukuru wa Zerora, Zerora mutabani wa Bekorasi mwijukuru wa Afiya, ibara lye Kiisi, Omubenyamiini ogu, akaba atungire muno;

²kandi akaba aina omwana omwojo, ibara lye Saulo, akaba asemiire kandi ali musigazi. Omu Baisirairi boona hakaba hatarumu muntu noomu anyakusemiire kumukira, kandi boona akaba naabakira kuraiha.

³Kiro kimu, ezimu ha nkaina za Kiisi, ikabura, Kiisi nukwo kugamba omutabani Saulo ati: “Imuka ogende n'omu ha baheereza, oserre enkaina.”

⁴Baaraba omunsi ey'ensozi eya Efuraimu, baaraba noomu ya Salisa, enkaina zaababura, baaraba n'omunsi eya Salimu, baitu oku ikaba italiyo. Hanyuma baaraba omunsi ya Benyamiini, baitu bataizoole.

⁵Obubaahikire omunsi ya Zufu, Saulo yagambira omuheereza we ou akaba ainawe ati: “Weewe, tugaruke omuka, obututaagarukeyo, ise nyowe omukiikaro ky'okutunturra enkaina, naija kutunturra itwe.”

⁶Omuheereza yamugarukamu ati: “Omurubuga runu, harumu omuntu wa Ruhanga, kandi omuntu ogu abantu nibamutamu ekitiinisa; kyona ekyakagamba, kihikirra. Tumuhikeho, rundi yaakutugambira nambere turaazoora ekaina.”

⁷Saulo nubwo yagarukiremu omuhereza we ati: “Obuturaagenda ow'omusaija wa Ruhanga ogu turaamutwarra ki? Dora n'omugaati ogu tubaire twinagwo guhoire. Hati tumutwarre ki?”

⁸Omuheereza yagarukamu Saulo obwakabiri ati: “Hanu nyinaho akacweeka k'efeeza, egi niyo ndaamuha, nukwo atugambire nambere tusobora kuzoora enkaina.”

⁹(Omu biro ebi, omurangi yayetwaga omurozi, habweki, omuntu obu yayendaga kwekaguza ekintu hali Ruhaga yagambaga ati: “Tugende hali omurozi.”)

¹⁰Saulo yagarukamu omuheereza ati: “Obalize eky'obulyo, tugende.” Baakwata omuhanda bagenda omurubuga nambere omuntu wa Ruhanga yaikaraga.

¹¹Obubakaba nibatembatemba orusozi bahike omurubuga, baitirana abaisiki abakaba nibagya kuleeta amaizi, baabakaguza bati: “Baisiki omurozi[2] aliyo?”

¹²Abaisiki baagarukamu bati: “Murahuke, ngugwo abali omumaiso aho, nubwo yakaija omurubuga, habwokuba kiro kinu, abantu nibaija kutamba ekyonzira haitambiro erya harusozi.

¹³Obumuraaba nimutaaha omurubuga muti, nimwija kumusanga atakagenzire kulya omukiikaro eky'okuramizaamu, habwokuba abantu abanyakuraaliziibwe, tibasobora kutandika kulya uwe atakahikireyo, habwokuba ekyonzira, naabanza kukiha omugisa.”

¹⁴Nubwo baagenda omurubuga, obubakaba nibataaha omurubuga, baarora Samwiri nabeebinga, naagenda hakiikaro eky'okuramizaamu.

¹⁵Ha kiro ekyayebembiire, Saulo atakaizire, MUKAMA akaba amanyisize Samwiri naagamba ati:

¹⁶“Ijo omukasumi nka kanu, ndikutwekera omusaija ow'oruganda rwa Benyamiini, omuseeseho amagita, abe mulemi w'abantu bange Abaisirairi, nuwe alibajuna Abafirisiti, habwokuba mboine nkooku barukubonabona, kandi mpuliire okutaaga kwabu.”

¹⁷Samwiri obuyaboine Saulo, MUKAMA yamugambira ati: “Omusaija ou nakugambiireho, nuwe ogu! Nuwe arukwija kulema abantu bange.”

¹⁸Saulo nubwo yaiririire Samwiri ali ha irembo, yamukaguza ati: “Waitu ninkaguza, enju y'omurozi eri nkaha?”

¹⁹Samwiri yagarukamu Saulo ati: “Ninyowe omurozi nyebembera ogende hakiikaro eky'okuramizaamu, habwokuba kiro kinu nitwija kulya hamu, ijo nubwo ndikumanyisa byona ebirukukutuntuza, nukwo nkuleke ogende.

²⁰Enkaina zawe ezaakamara ebiro bisatu ibuzire, hati izookere, leka kutuntura. Ebirungi byona ebya Isirairi, by'oha, tibiri byawe neeka ya sso yoona?”

²¹Saulo yagarukamu ati: “Nyowe ndi w'oruganda rwa Benyamiini, nurwo oruganda orunyakukirra kimu obuke omu Isirairi, kandi omu ruganda oru, ekika kyaitu, nikyo kikomerrayo omu byona, hati osobora ota kumbaliza ebigambo nkeebi?”

²²Samwiri nubwo yatwaire Saulo n'omuheereza we yabataahya omukisiika, yabaikaliza omumaiso g'abo abakaba baraliziibwe, abahikaga nk'abantu amakumi asatu.

²³Samwiri yaragira omucumbi we ati: “Leeta enyama eri ei nkuhairege, kwahura.”

²⁴Omucumbi nukwo okuleeta ekirumbu, n'enyama y'omugongo, yabita omumaiso ga Saulo; Samwiri yagambira Saulo ati: “Ekibakwahuliire nkikyo baakikusembereze. Olye habwokuba bakakikwahurra okirye n'abagenyi ha kasumi akaategekerwe.” Kiro eki, Saulo nukwo kulya na Samwiri.

²⁵Obubaarugire omukiikaro eky'okuramizaamu, baagaruka omurubuga, baayarra Saulo ekitabu ha nju eruguru, oku nuho yaraire.

²⁶Emamba obwekaba neesara, Samwiri yayeta Saulo hanju eruguru nambere akaba abyamire naagamba ati: “Imuka nkurage ogende.” Saulo nukwo kwimuka, bombi uwe na Samwiri baaturuka hamu, baagenda ha ruguudo.

²⁷Obubaahikire nambere orubuga rurukugarukira, Samwiri yagambira Saulo ati: “Ragira omuheereza aturugeho airreyo omumaiso, obwaramara kwirrayo, iwe oikale hanu akaanya kake, nukwo nkumanyise ekigambo kya Ruhanga.”